yohane 3 1 - buacou seiso no faeva esvʉtʉ

¹ zou coolo a'o; te'o tmopsʉ ta tengami ho faeni ta os'o songohia ci nanghia kaiyo - la'u a'ʉmta ngohia ci nanghia:

² ngohia ci nanghia, te'o tooyokeoi suu aa'pucusola so'so'eʉ, yoayokeo na feango, aʉlʉ totiski to piepiyasu ho yuayayokeo.

³ panto piyo ci sinto mo uhtan'e ho eʉsvʉta a'o, na lako hia a'ʉmtʉ meot'ʉt'ʉcʉ to so'emio, conino poa taiconeni no lako h'oyunsova 'o so'emio. poa a'sʉftonʉ kokaekaebʉ a'o.

⁴ uk'a ci mocmo ci hi'hioa nante tmakakaebʉhe ho os'o tac'ʉhi na 'o'oko'u hola acʉhʉ yunsou no 'ayumona to so'emio.

emomoengʉa 'o kaiyo

⁵ ngohia ci nanghia, lako maica mou'ʉmtʉ ci 'tohʉngʉ ho yaahioaneni 'o sinto, ac'ʉhʉ no o'a osko honga ci sinto leac'o totiski.

⁶ ohela mi'usneni ta kiokai tan'e ho ec'ʉha na himngonghi ci 'tohʉngʉsu. teko'so maino lasi ʉmnʉa to hamo, to'usni ho meelʉ smai'cʉ'cʉnʉ no tehe mia ci ceonʉ.

⁷ la nomio to kilisto ho yuyafo yaahioa. o'a la tiou no to'usni to o'a sinto.

⁸ ko'koeno, teto a'ʉmta aʉt'ʉt'ʉca 'emo maica ci cou, toehungneni nomio to so'emio ho yaahioa.

titofei ho i'o timitho

⁹ mo'ula tmopsʉ to tengami ho faeni to kiokai; at'inghi, 'o mo mici papoevʉ ci titofei o'a isi cumasa 'o nia e'e'u.

¹⁰ ho ta'u cu esmi, tena'u eafa 'o ohsila hi'hioa. mo boemi to kuici e'e ho ekuzkuzoa a'mi, mooyai e'e ho eayaezoya. o'a moc'o anou maica, la iachi o'te aʉt'ʉcʉ tola i'eafo ci sinto, ac'ʉhʉ no potani 'ola mici aʉt'ʉt'ʉcʉ ci cou, ho peteoyafa ta kiokai!

¹¹ ngohia ci nanghia, 'ote maezo tomo kuzo, la maezo tomo ʉmnʉ. siya namo yaa ʉmnʉ ci peipeis'ausna, 'aeno siya namo tma'usnu to hamo, siya namo peiskuzkuzo, 'aeno siya na o'a mo bohngʉ to hamo.

¹² la toehunga emomoengʉa 'o timitho. isi 'akasineni to so'emio; temza yaeza 'akasineni. osko cohivi 'e imza engha ci e'e mo emzo.

sotavei ci tuayokeo

¹³ mion'a man'i 'o nte'o e'e ho faeni suu, at'inghi o'a os'o 'ucia ieni ta tposʉ ho psoecʉ'ha.

¹⁴ os'o tata'za o'ate noana'o ta'ucu aiti suu, aʉlʉ yupa mi'usnu ho eʉsvʉsvʉta.

¹⁵ teko'so la soanono! 'e maananghiasu te acʉhʉ tuayokeo suu. tekon'a mi'usnu to macicihi ci maananghia ne'e ho tuayokeoneni a'o.