yohane 1 5 - buacou seiso no faeva esvʉtʉ

atpʉtʉ ta hpʉhpʉngʉ

¹ namo afu'u tmaa'uzo to iesu ho zou kilisto. zou acʉhʉ 'o'oko to hamo. hocito ngohia na cihi ci amo, 'ate ahtao'te yaeza ngohia na 'o'okosi.

² i'mi ho mito himngonghi to hamo, a'vinano meot'ʉcʉ to mashʉyʉsi, tetocu cohivi ito ngohia na 'o'okosi.

³ meot'ʉt'ʉcʉ no mashʉyʉ to hamo 'amoeno himngonghi to hamo; 'o mashʉyʉsi o'amo ngoveoa noʉt'ʉci,

⁴ maica na macicihi ci 'o'oko to hamo te acʉhʉ meelʉ atpʉtʉ ta hpʉhpʉngʉ. inamo koa atpʉtʉ ta hpʉhpʉngʉ 'aeno singkooto.

⁵ siya nate meelʉ atpʉtʉ ta hpʉhpʉngʉ? 'ai'o moc'o tmaa'uzo to iesu ho zou oko to hamo ci cou nate meelʉ atpʉtʉ ta hpʉhpʉngʉ.

'akasineni 'o iesu kilisto

⁶ 'o iesu kilisto homo uhta hpʉhpʉngʉ isi ieni to chumu no toonono ho ito hmuyu no ciha 'o nsousi; o'amo anouc'o boemi to chumu, mamo boemi to chumu ho hmuyu. 'o seilei isi iachia 'akasi na eni ho zou mou'ʉmtʉ, maica 'o seilei 'aeno so'emio.

^7-8 'o seilei, chumu, ho i'o hmuyu mo acʉhʉ 'akasi, 'emo tuyu mo acʉhʉ tohmʉskʉ.

⁹ ho mitoeno tiou ta 'akasi ta cou, na 'akasi to hamo ahtuo'te h'unano yaa tonʉa, 'e 'akasi eni isi 'akasineni to hamo 'o okosi.

¹⁰ ko'koeno, siya namo tmaa'uzo to oko to hamo, 'aeno siya na micu yaa 'akasi ta 'tohʉngʉsi; siya namo o'te tmaa'uzo to hamo, 'aisieno toleleoknuyui 'o hamo, maica ho o'a isi taa'uzva 'o hamo ho ohsila 'akasineni 'e okosi.

¹¹ 'e 'akasi eni 'aeno: isi faeni a'to to hamo na 'auesiesi nsou, na i'hozisi ta nsou tan'e 'aeno 'o okosi.

¹² siya namo yaa oko to hamo, 'aeno siya na micu yayo 'e nsou eni; siya namo uk'a oko to hamo, 'aeno siya namo uk'a 'e nsou eni.

'auesiesi ci nsou

¹³ os'o tposi 'emo ma'maica ho faeni muu, te poa cohivneni muu, 'e mimu tmaa'uzo to oko to hamo ci cou mo yaa 'auesiesi ci nsou.

¹⁴ ho mito o'te ma'sasmoyo ho yonto tuhcu to hamo; mo maica ho ito ta'sansana cohivi, hocito maino 'tohʉngʉsi ho eyoho'ʉ, tesi acʉha talʉi.

¹⁵ ho itoeno cohivi ho lasi talʉi na lato afu'a eoho'neni. 'atetocueno yaeza cohivi na lato mi'unei ho p'enza. 'atesi ahtao'te pafeni a'to.

¹⁶ hoci pano mo baito no maanat'ohaesa homo peismi no o'amocu tesi aʉla tumzi ci kuisi, ntesi mi'usneni to hamo ho eoho'neni, tesi ahtao'te pafi no nsou to hamo. na eni ma isi pas'usna tola peismi to o'amocu tesi tumzi ci kuisi ho engha. at'inghi, panto te meaosu'u mcoi ci kuisi, os'o yainca 'emo maica ci kuisi o'a temu 'ahʉya eoho'neni.

¹⁷ na afu'u 'oha moulʉlʉ ci peipeis'ausna zou acʉhʉ kuisi, at'inghi panto o'ate aʉlʉ mcoi ci kuisi.

¹⁸ ito cohivi, na 'o'oko to hamo o'a te a'cʉ'cʉnʉ peiskuisi, maica lasi noʉt'ʉci to oko to hamo, poa o'te akuzkuzoneni to kokuzo.

¹⁹ ito cohivi, acʉhʉ 'e hpʉhpʉngʉ e'vono yono lasi atʉkca to kokuzo, tetoc'o asngʉcʉ tma'usnu to hamo.

²⁰ ito cohivi, micu cmʉ'ho 'o oko to hamo, a'vinano pafi no toutʉs'ʉ na a'to, ko'ko poa bohngʉ to a'ʉmtʉ hamo na a'to. mito no'ayumonʉ no nsou to a'ʉmtʉ hamo. 'aeno 'ayumona to nsou to okosi iesu kilisto. zou a'ʉmtʉ hamo, 'aeno 'auesiesi ci nsou.

²¹ mao'o'oko, temu boemocvihi to uacoua!