yohane 1 4 - buacou seiso no faeva esvʉtʉ

a'ʉmtʉ ci piepiya ho meknuyu ci piepiya

¹ songohia ci maananghia, mi'usnu tola invonvo mainca mio yaa seilei, o'atemu acʉha taa'uzva, conino hʉsvtana'a na piepiyahe mio nana i'mi to hamo, maica micu yaa botngonʉ ci meyoyongensa mo nongabo yuyafo.

² temu yainenu nate hia honga no piepiya to hamo? siya namo ebobohngʉ to iesu kilisto homo nomzo ta cou ho uhta hpʉhpʉngʉ, 'aeno siya namo yaa i'mi to hamo ci piepiya.

³ siya namo o'te apa'to mahsansano to iesu, 'aeno siya namo uk'a i'mi to hamo ci piepiya; na acʉcʉhʉsi zou mihango to kilisto ci piepiya. ohmu tac'ʉhi tena cmʉ'ho 'e piepiya eni, maitan'e micu yonta hpʉhpʉngʉ.

⁴ at'inghi, mao'o'oko, mimu tma'usnu to hamo, a'vinano mimucu atpʉtʉ to meyoyongensa, maica i'omo no'ayumonʉ muu ci piepiya mo tasohe tamo no'ayumonʉ ta yata hpʉhpʉngʉ ci piepiya.

⁵ ho lahe engha 'e hi'hioa ta hpʉhpʉngʉ, lahe talʉi ta yata hpʉhpʉngʉ, maica 'amoeno'so tma'usnu ta hpʉhpʉngʉ.

⁶ at'inghi, mito tma'usnu to hamo. i'omo bohngʉ to hamo ci cou la tmalʉ a'to; na o'amo tma'usnu to hamo o'ala tmalʉ a'to. ieni tamo coni tan'e, tetocu cohivi te yainenu hote peelʉi hupaevazi na so'emio ci piepiya ho ina meknuyu ci piepiya.

zou himngonghi 'o hamo

⁷ ngohia ci maananghia, tetola yupa himngonghi, maica 'e himngonghi mo i'mi to hamo. inamo yaa himngonghi, zou 'o'oko to hamo, yaeza honga 'o hamo.

⁸ na mo uk'a himngonghi, o'a mo bohngʉ to hamo, maica 'o hamo zou himngonghi.

⁹ isi popeoskuna to hamo 'o pecnia ci okosi ho cmʉ'ho ta hpʉhpʉngʉ, teto ieni to oko ho meelʉ mayo no nsou; isi ieni tan'e to hamo ho pa'teni ho isi ngohia a'to.

¹⁰ 'aeno eni na himngonghi: o'as'a a'to namo himngonghi to hamo, ma i'o hamo 'omo himngonghi a'to, popeoskuna 'o okosi, nomzo a'to ho ciha 'o feangosi, i'mi to kuisi ho psuovei a'to.

¹¹ ngohia ci maananghia, ho isieno yaica ci hia ngohia to hamo na a'to, 'antetoeno maezo anana'o yupa himngonghi.

¹² uk'a mocu ci mosola baito to hamo, at'inghi hocito yupa himngonghi, micu no'ayumonʉ ta nsouto 'o hamo, ina himngonghisi cu ieni a'to ho a'sʉftona peiseafi.

¹³ isi pafeni a'to to hamo na piepiyasi, i'mi tan'e itocu cohivi, pano nsou to hamo ta 'ayumonato, i'o hamo mo no'ayumonʉ ta nsouto.

¹⁴ 'o amopepe isi popeoskuna 'o okosi ho leto'usnu ta yata hpʉhpʉngʉ; 'e hi'hioa eni omzala aiti, yaeza mi'usneni ta mocmo ci cou ho 'akasi.

¹⁵ namo apa'to ebobohngʉ to iesu ho zou oko to hamo, 'o hamo micu yonto 'ayumona to nsousi, mo maezo yonto nsousi 'o hamo.

¹⁶ ko'koeno, ito cohivi, a'vinano taa'uzva 'o hamo isi ngohia a'to. zou himngonghi 'o hamo. na micu yaa himngonghi na nsousi ci cou 'amicueno yayo ta nsousi 'o hamo. 'o hamo mo no'ayumonʉ to nsousi.

¹⁷ maicac'o, na himngonghi cu ieni a'to ho a'sʉftona peiseafi, poa o'te ma'sasmoyo no hiesi no yʉsvʉtʉ na a'to; teto asansano meelʉ maica, maica ho mito yonta hpʉhpʉngʉ mo yaa totiski to kilisto ci nsou.

¹⁸ homo yaa himngonghi uk'a naci ma'sasmoyo; na a'sʉftona ci himngonghi tesi aapayo'a na afu'u ma'sasmoyo. ko'koeno, namo yaa ma'sasmoyo o'a mo a'sʉftonʉ na himngonghi, maica ina ma'sasmoyo ho patvovei mo yupa natʉ'ca.

¹⁹ ho mito himngonghi, maica ho isi auevahe ngohia to hamo a'to.

²⁰ hoci panonte mainca , ho asʉsʉ'no no iachi nanat'ot'ohaesa, 'amicu meknuyu; ho o'a isieno maka ngohia 'e isi teolʉi ci nanat'ot'ohaesa, mante mainenu hoci himngonghi no o'a isi teolʉi ci hamo?

²¹ ko'koeno, mo maica 'o hiasi mashʉyʉ a'to to kilisto: nala himngonghi to hamo. te asansana yaeza ngohia na iachisi nanat'ot'ohaesa.