yohane 1 3 - buacou seiso no faeva esvʉtʉ

'o'oko to hamo

¹ temueno aiti, mo mainenu na lasi hia ngohia a'to to amopepe! ac'ʉha no yainca zou 'o'oko to hamo na a'to; a'ʉmtʉsi, 'aeno a'ʉmtʉ 'o'oko to hamo a'to. ho lahe ko'ko o'te honga ta yata hpʉhpʉngʉ a'to, mo maica ho o'a ihe honga 'o hamo.

² ngohia ci maananghia, maitan'e zou 'o'oko to hamo na a'to, tenala mainenu ho noana'o, o'a mocu isi husansana. at'inghi, ito cohivi, ho tena aopa'to 'o kilisto, tato acʉhʉ mimamaezo, maica tato aiti na a'ʉmtʉsi mi'a'ausna.

³ nala afu'u mooteo no aopa'to 'o kilisto ci cou te acʉhʉ iachi ayʉyʉcʉ acocofkoya, totiski to kilisto ho cofkoya.

⁴ i'ola peiskuisi, 'amoeno yutasufku to hoolicu to hamo, maica ina kuisi 'amoeno yutasufku to hoolicu.

⁵ imu cohivi, na atuhcusi homo aopa'to 'o kilisto tesi aapayo'a na kuisi; 'o kilisto uk'a ci kuisi.

⁶ ko'koeno. namo yaa nsou to 'ayumona to nsou to kilisto ci cou o'ala peiskuisi; i'ola a'cʉ'cʉnʉ peiskuisi ci cou o'amocu ohela aiti 'o kilisto. yaeza o'amocu ohela ahta honga 'o kilisto.

⁷ mao'o'oko, 'ote noa peknui no mocmo ci cou. nala mee'ofeihni no moulʉlʉ, niante tamza no cou moulʉlʉ. aʉlʉ mais'a 'o kilisto zou moulʉlʉ.

⁸ nala a'cʉ'cʉnʉ peiskuisi, mo tma'usnu to 'akuma, maica ina 'akuma mosola asonghoi peiskuisi. nomio tan'e, micu aopa'to 'o oko to hamo, tesi atuhca aapayo'a na lasi hioa to 'akuma.

⁹ na 'o'oko to hamo. o'ate a'cʉ'cʉnʉ peiskuisi. maica homo no'ayumonʉ to nsouhe na nsou to hamo. ho zoueno amohe 'o hamo. o'anate a'cʉ'cʉnʉ peiskuisi.

¹⁰ na 'o'oko to hamo ho ina 'o'oko no 'akuma isi husansana 'o hia yupa h'unasi: i'ola o'te mee'ofeihni to moulʉlʉ, o'te ngohia 'o iachi maanat'ohaesa, o'a na 'o'oko to hamo.

yupa himngonghi

¹¹ 'o ohmula ahoza talʉi ci e'e 'aeno: teto yupa nia himngonghi.

¹² o'ateto mais'a 'o kai'in. mo tma'usnu to kokuzo; ohsi opcoza 'o iachisi ohaesa. mo mainci isi opcoza 'o ohaesasi? 'amoeno maica homo kokuzo 'o peipeis'ausnasi, 'o ohaesasi mo mousʉngcʉ 'o lasi peipeis'ausna.

¹³ ko'koeno, maanat'ohaesa, hocihe sʉ'nova ta yata hpʉhpʉngʉ muu, o'atemu nama yamci.

¹⁴ ito cohivi mitocu yuyafo no mcoi hocu yaansoua; ho ito ko'ko cohivi 'aitoeno'so ngohia 'e nanat'ot'ohaesato. i'ola uk'a himngonghi, mioc'on'a asngʉcʉ noskufu no tonʉ no mcoi.

¹⁵ nala afu'u himsʉ'no no nanat'ot'ohaesa, 'amoeno opcoi no cou; imu cohivi, nala afu'u opcoi no cou, cu uk'ana 'auesiesi nsou.

¹⁶ mo nomzo a'to 'o kilisto ho ciha 'o nsousi, i'mi ta moc'o coni tan'e, itocu cohivi zou cuma na isi yainca himngonghi. homoeno maica. 'antetoeno maezo maica ho nomzo no nanat'ot'ohaesa ho ciha 'e nsou!

¹⁷ namo cihi cimo atngaso ci cou aiti 'e iachi nanat'ot'ohaesa homo aviovio, sʉmcʉ na 'tohʉngʉsi ho o'te cumasa, teeno ahta peelʉi yainca isi ngohia 'o hamo?

¹⁸ mao'o'oko, na himngonghito o'ante anovac'o ngov'eni ta sumsu, ahtuo'te aʉ'ʉmtʉ ci himngonghi, boemi no peipeis'ausna ho soomei!

yonto tuhcu to hamo ho o'te ma'sasmoyo

¹⁹ homo maica, 'atetocueno i'mi tamo coni tan'e ho cohivi, mito tma'usnu to so'emio; mito yonto tuhcu to hamo ho ma'sosohuyu 'e 'tohʉngʉto.

²⁰ 'upena hocisi koica no iachi ʉmnʉ ci 'tohʉngʉ, iton'a cohivi mo cocoyahe a'to na 'tohʉngʉ to hamo; lasi so'eʉh'ʉta 'e acʉcʉhʉ.

²¹ ko'koeno, ngohia ci maananghia, hocisi o'te koica no ʉmnʉ ci 'tohʉngʉto, tec'u meelʉ o'te ma'sasmoyo hoteto yonto tuhcu to hamo.

²² 'upena hocito mi'usnu to hamo ho m'ene no cuma, tesi acʉha pafeni a'to; maica ho mito meot'ʉt'ʉcʉ to mashʉyʉsi, hioa 'o lasi afu'a ʉmnʉa ci hi'hioa.

²³ 'o mashʉyʉsi 'aeno: teto asansana taa'uzva 'o ongko to okosi ci iesu kilisto, a'vinano maito mashʉyʉ to kilisto ho yupa himngonghi.

²⁴ i'ola meot'ʉt'ʉcʉ to mashʉyʉ to hamo, micu yaa nsou to hamo, na nsou to hamo mo maezo no'ayumonʉ ta nsousi. teto yainenu hoci cohivi ho mio no'ayumonʉ a'to na nsou to hamo? 'amoeno i'mi to isi pafeni a'to ci seilei.