yohane 1 2 - buacou seiso no faeva esvʉtʉ

isi aomotʉ'neni to kilisto na a'to

¹ mao'o'oko'u, ho os'o tposi 'emo ma'maica te'o akoeva no o'te poa peiskuisi muu; hoci pano mo peiskuisi ci cou, mito yaa cihi ci moulʉlʉ ci iesu kilisto, la mi'usnu to amopepe ho aomotʉ'neni a'to.

² 'o kilisto isi ciha 'o iachi, phini 'o kuisito; o'a anouc'o na kuisito, isi yaeza nomzi 'e kuisi ta yatatiskova ho ciha 'o iachi.

³ hocito noyʉci 'o mashʉyʉ to hamo, tetocu cohivi ito honga 'o hamo.

⁴ hoci pano mo mainca , ho o'te noyʉci 'o mashʉyʉsi, 'emo maica ci cou mo meknuyu, uk'a ci natʉ'casi to so'emio.

^5-6 at'inghi i'ola noyʉcʉ to e'e to hamo ci cou, na mi'usnu to hamo ci himngonghi micu a'sʉftonʉ. i'ola mainca pano nsou to hamo, nte maito peipeis'ausna to iesu kilisto na h'oyunsova; maicac'o, tetoeno peelʉi pahsansana ho yainca, mitocu yaa nsou to hamo.

faeva ci mashʉyʉ

⁷ ngohia ci maananghia, 'e os'o tposi ho faeni muu, o'as'a faeva ci mashʉyʉ, ma noana'o ci mashʉyʉ. 'a i'o imueno asonghoza tiova. 'e noana'o ci mashʉyʉ 'aeno 'o ohmucula talʉi ci e'e.

⁸ at'inghi. 'e os'o tposi ho faeni muu. te peelʉi yainca faeva ci mashʉyʉ; na so'emiosi ta mashʉyʉ tan'e mo yonto feango to kilisto. yaeza peiseafi ta taicomu. maica homo seolʉa no aapayo'ʉ 'o voecʉvcʉ. 'o a'ʉmtʉ tiskova micu ahoi psoevohngʉ.

⁹ hoci pano mo mainca mio yaansou no taico no tiskova, ho himsʉ'no no iachisi maanat'ohaesa, mioc'on'a asngʉcʉ no'ayumonʉ no voecʉvcʉ.

¹⁰ nala himngonghi no maanat'ohaesa, 'amoeno yaansou no mo tiskova, o'atesi poa m'evio na mocmo ci cou ho poa peiskuisi.

¹¹ at'inghi. i'ola himsʉ'no to maanat'ohaesa. 'amoeno no'ayumonʉ no voecʉvcʉ; la coeconʉ nomo voecʉvcʉ. o'a isi cohivi 'e iachi tena emo'vonʉ. maica ho isicu poa bʉkngʉ no voecʉvcʉ.

¹² mao'o'oko, mi'o tmopsʉ ta tengami ho faeni muu. maica ina kuisimu isicu ieni to kilisto ho noa peteongasa.

¹³ maameoi. mi'o tmopsʉ ta tengami ho faeni muu. maica ho imu honga 'o mohcu asonghoi yayo. yu'fafoinana. te'o tmopsʉ ta tengami ho faeni muu. maica imucu atpʉta 'o kokuzo.

¹⁴ mao'o'oko, mi'o tmopsʉ ta tengami ho faeni muu, maica imu honga 'o amopepe. maameoi, mi'o tmopsʉ ta tengami ho faeni muu, maica imu honga 'omo asonghoicu yayo. yu'fafoinana, mi'o tmopsʉ ta tengami ho faeni muu, maica ho mimu yutataso; mo yunsou ta nsoumu na e'e to hamo, a'vinano mimucu tosa'ohe tola kokuzo.

¹⁵ teav'a ngohia 'e hpʉhpʉngʉ, ho ina mo afu'u tma'usnu ta hpʉhpʉngʉ ci macucuma. hocimu ngohia 'e hpʉhpʉngʉ, temucu uk'a na 'tohʉngʉ no himngonghi to amopepe.

¹⁶ 'emo afu'u tma'usnu ta hpʉhpʉngʉ ci hi'hioa, mais'aeno 'ola tata'ia ta feango, tata'ia ta mcoo, ho i'ola afu'a epapaata'ieni ta cou, acʉhʉ o'a mo i'mi to amopepe, mamo i'mi ta hpʉhpʉngʉ.

¹⁷ 'e hpʉhpʉngʉ ho i'e mo afu'u tma'usnu ta hpʉhpʉngʉ cila tata'ia mo seolʉa no aapayo'ʉ; at'inghi, inala peiseafi na 'tohʉngʉ to hamo ci cou te 'auesiesi nongaco.

i'ola mihango to kilisto

¹⁸ mao'o'oko, na puesona ta hpʉhpʉngʉ tec'u esmi! ohmula tac'ʉhi te cmʉ'ho 'ote mihango to kilisto; maitan'e 'o botngonʉ ci hangʉ to kilisto micu biyoyafo, i'mitan'e tetocu cohivi tec'u esmi na puesonasi.

¹⁹ 'emo maica ci cou o'amo tma'usnu a'to, ko'ko mo mongoi a'to; hoci mio tma'usnu a'to, 'ate ahtuo'te no'upu a'to. at'inghi, mo emose'u, cu humzi ho o'a mo a'ʉmtʉ tma'usnu a'to.

²⁰ mimucu tiou no s'os'o to socofkoya, ko'ko mimu acʉhʉ bohngʉ to so'emio.

²¹ mi'o tmopsʉ ta tengami ho faeni muu, o'a mos'a i'mi no o'a mimu bohngʉ to so'emio, mamo i'mi ho mimucu acʉhʉ bohngʉ, a'vinano cohivi na afu'u eknuyu acʉhʉ o'a mo i'mi no so'emio.

²² zoueno siya namo meknuyu? o'a i'omos'aeno peeco to iesu ho zou kilisto? 'emo maica ci cou 'ai'olaeno mihango to kilisto; ihe hopsʉpseni 'o socofkoya ci amo, yaeza hopsʉpseni 'o socofkoya ci oko.

²³ maica, nala afu'u bʉʉpsʉpsʉ to socofkoya ci oko, 'amoeno maezo bʉʉpsʉpsʉ to socofkoya ci amo; namo afu'u apa'to ebobohngʉ to socofkoya ci oko, te yaeza elʉa 'o socofkoya ci amo.

²⁴ homo maica, temu asansana noyʉci 'o ohmula ahoza talʉi ci e'e. hocimu noyʉci 'o ohmula ahoza talʉi ci e'e, temucu meelʉ asngʉcʉ yaansou to 'ayumona to socofkoya ci oko ho ito socofkoya ci amo.

²⁵ na eni 'ai'o ohsilaeno iachia teomneni to kilisto ho faeni a'to ci 'auesiesi nsou.

²⁶ ho os'o tposi 'emo maica ci hi'hioa. os'o pas'usna tola mici meknuyu muu ci cou ho engha.

²⁷ inacu muu, isicu faeni muu to kilisto na piepiyasi. hoci mako no'upu muu na piepiyasi, 'anatemu 'ahʉya noa po'pa'cohivi no mocmo ci cou; maica ina piepiyasi tesi acʉha po'pa'cohivneni muu na acʉcʉhʉ ci hi'hioa, a'vinano na lasi hia mo'ma'cohio mo acʉhʉ aʉ'ʉmtʉ, o'amo meknuyu. ko'koeno, temula meo'uzo no lasi hia mo'ma'cohio to seilei, conino yaansou to 'ayumona to nsou to kilisto.

²⁸ 'aeno zou, mao'o'oko, temula yaansou to 'ayumona to nsousi; maicac'o. ho tac'u hiesi no yuovei ho aopa'to 'o kilisto, tetocu meelʉ tobohtʉ o'te ma'sasmoyo, o'ate nama totoefʉngʉ.

²⁹ imu asansana 'o kilisto zou moulʉlʉ; ko'koeno, ntemucu cohivi, nala mee'ofeihni no moulʉlʉ ci cou 'aeno 'o'oko to hamo.