yakovu 5 - buacou seiso no faeva esvʉtʉ

engaho tomo yuyupasʉ ci cou

¹ homo maica, 'e mimu yuyupasʉ ci cou, tmalʉ ta e'e'u. temu nomio tote esmi ci meakvo'ʉ ho tmunoi mongsi!

² na yupasʉmu tec'u payo'a, 'o 'i'ihosa cu ana no yoi.

³ na king ho ngingmu tec'u fkʉngeo; 'e fkʉngeo eni 'ateeno huomza hote ehpʉngneni muu, te maezo mais'a puzu ho hmoi 'e feangomu. ta puesona ta hpʉhpʉngʉ, inac'o a'pʉ'pʉyʉ no yupasʉ na lamu cohivi.

⁴ lamu pa'maesih'a 'ola yaahioa to ezoezoyʉmu ci leyaahioa, aovoha 'o ntehe hnoo, ma ihe o'te ehpʉngneni na muu! 'o fihngau no eokvo'ʉ tomo efeutu micu yʉmeʉmʉ to koyu to nooe'oca - to papoevʉ to heetai.

⁵ 'e lamu hia au'hi'hisi ho 'auveoveoyʉ, la poa onoyʉnʉ 'e iachi, mooteo no hiesi no chua.

⁶ lamu to'anki topci no kuisi 'o uk'acila nama hioa ci cou, ho opcoza; o'ala mako yu'hango.

buveici ho 'inoli

⁷ ko'koeno, maanat'ohaesa, temula buveici, toc'ʉha ho tac'u i'vaho esmi 'o nooe'oca. aiti. 'o leyaezoi la a'ʉmtʉ buveici ho mooteo hocic'u tov'oha 'ola emʉemʉ'a ta ezoezoyʉ, buveici ho mingeou hoci ahtu mʉchʉ.

⁸ temula maezo buveici. temu yaa mahtʉicʉ ci ta'usni, maica tec'u mon'i esmi 'o hiesi no i'vaho cmʉ'ho 'o nooe'oca.

⁹ maanat'ohaesa, 'otela yupa eubut'u, tesis'a yʉsvʉta to hamo na muu. tec'u mon'i cmʉ'ho 'ote yʉsvʉtʉ ci nooe'oca, cu yonta phingi.

¹⁰ maanat'ohaesa, la talʉa 'omoso boemi to ongko to nooe'oca ho aomotʉ'ʉ ci eyongensa, yoyayaeza 'o nia hiahe noututumzo ho luaveica.

¹¹ maica homoso apaezumo buveici, lato yainca micu ʉm'ʉmnʉ ci cou. ohmucula talʉi na nia luaveica to yovu, yaeza cohivi ohsi yainenu to hamo na nia hia mʉʉt'ʉci no ataveisi, maica 'o hamo mo a'sʉftonʉ na himcocoveoi ho himngonghi.

¹² maanat'ohaesa'u, nate sotva'esa zou: 'ote esvʉtʉ, o'te mi'usnu ta pepe ho ita ceoa, hocieno ito mav'ov'o ci macucuma ho esvʉtʉ. hoci zou, 'ateeno yainca zou; hoci o'a, 'ateeno yainca o'a. maicac'o, 'anatemu noa yʉsvʉta to hamo.

¹³ ta taicomu pano mo nana esmi no 'atutumzo? ntela 'inoli; pano mo nana kokaekaebʉ? ntela tohmomoengʉ;

¹⁴ pano mo nana tma'congo? ntela eoho'ʉ to coolo ta kiokai ho poa inolineni, boemi to ongko to nooe'oca ho siesa no s'os'o.

¹⁵ 'e 'inoli eni honci i'mi no singkoo, 'ate ahtuo'te yov'o 'emo tma'congo ci cou; tesi poa yuovei yoayokeo to nooe'oca, na ohsi hioa ci kuisi tamo tma'congo ci cou, te elʉ no peteongasa.

¹⁶ ko'koeno, temula yupa mo'esansano no kuisi, yupa nia 'inoli, teeno peelʉi poa yov'o na tma'congomu. 'o 'inoli to coumoulʉlʉ la na'no yaa tonʉa.

¹⁷ 'o 'iliya moc'o totiski a'to ci cou; isi pnanfi na 'tohʉngʉsi ho 'inoli, m'ene to hamo ho o'te poa mʉchʉ, micu a'ʉmtʉ totueha ho ang'osʉ to hia noana'o homo o'te mʉchʉ.

¹⁸ moso i'vaho 'inoli, cu kuici smʉnʉ'ʉ 'e pepe, micu cmʉfeʉ 'o heoheoemʉ'ʉ ta ceoa.

¹⁹ maanat'ohaesa'u, ta 'ayumonamu hoci panomo eʉngcʉ ho mongoi ta ceonʉ no so'emio, pano mo himhohioa ho eoveiya,

²⁰ temu cohivi: namo poa miovei 'emo eʉngcʉ ho yaa kuisi ci cou, 'aisieno i'mi no mcoi ho tasvoveiya na piepiyasi, a'vinano peelʉi peteongasa namo man'i ci kuisi.