yakovu 4 - buacou seiso no faeva esvʉtʉ

'ote enananghia ta hpʉhpʉngʉ

¹ ta taicomu mioeno i'mi nenu na yu'totokʉ ho youbobai? mo i'mi talamu ehtothomneni ta taicomu ci ma'konvosʉ!

² lamu konvosʉ ho ti'eingi, hoci o'te ma'vo'ho tamucu opcoi; lamu ma'kokonvosʉ, hocimu o'te ma'vo'ho. tamucu yu'konvosʉ ho yu'totokʉ. ho lamu o'te elʉa na ntemu tata'ia, 'amoeno maica ho o'alamu mi'usnu to hamo ho m'ene.

³ hocimu m'ene leac'o o'te m'elʉ, mo maica hola 'oha ʉmnʉ na koyumu; na lamu p'enza lac'o ti'hi'hisa to eabobonʉ ho kokaekaebʉ.

⁴ 'e mimu 'oha meot'ʉt'ʉcʉ ho o'te tmaa'uzo ci cou, o'aimueno cohivi hoci enananghia ta hpʉhpʉngʉ, te nahanga 'o hamo, siya nate nanghia ta hpʉhpʉngʉ, 'aeno siya na hangʉ to hamo!

⁵ yainca to seiso:

⁶ at'inghi, na isi pafeni to hamo ci mengumi mo na'nohe atngaso, aʉlʉ mais'a 'o isi yainca to seiso:

⁷ ko'koeno. temula meo'uzo to hamo; la bʉʉpsʉpsʉ to 'akuma. 'o 'akuma 'ate ahtuo'te toekameosʉ.

⁸ hocimu bicmu'u to hamo, 'atesi ahtao'te bicmu'i to hamo na muu. 'ola yaa kuisi ci cou, la poa cofkoya na emucumu! 'ola me'ʉ'ʉmnʉ ci cou, la poa cofkoya na 'tohʉngʉmu!

⁹ temu nac'o, smoesʉ'sʉ'ʉ, mongsi; la poa tmumongsi na cocvo, poa ma'nanac'o na kokaekaebʉ.

¹⁰ la yonto tuhcu to hamo ho ma'einu, 'atesi ahtao'te taspepza muu.

'ote la eayaezoyʉ

¹¹ maanat'ohaesa, 'otela yupa etfʉngʉ. siya namo etfʉngʉ hocieno eayaezoyʉ no nanat'ot'ohaesa, 'aisieno etfʉnga ho eayaezoya 'o hoolicu to moose. hociko etfʉnga ho eayaezoya 'o hoolicu, o'ana miko meo'uzo to hoolicu, ma isi eayaezoya 'o hoolicu.

¹² 'ai'oc'o hamo 'ola m'eac'ʉ to hoolicu, leyʉsvʉtʉ; i'oc'o hamo nate meelʉ to'usnu, meelʉ aapayo'ʉ. zou siya na suu, cis'a smeecʉ'ho eayaezoyʉ ta ehuehungusu!

'ote la etano

¹³ pantola mainca: at'inghi'so, talʉin'a a'o.

¹⁴ o'aimu cohivi temu nana makon'a yaansoua ho hucma! lamuc'o mais'a meansohʉ ci cmʉcmʉ, akameosʉ yuyafo tac'u huapayo'i.

¹⁵ mantemu mainca:

¹⁶ at'inghi, nama lamu bitano ho bimeoisi; 'emo maica ci bitano zou acʉhʉ kokuzo.

¹⁷ ko'koeno, hoci cohivi namo peis'ʉ'ʉmnʉ ho o'te hioa zoucu kuisi.