yakovu 3 - buacou seiso no faeva esvʉtʉ

atʉkca 'e iachi umo

¹ maanat'ohaesa'u, o'antemu ma'i'iachi acʉhʉ mici lema'cohio, maica, imu cohivi ina lema'cohio te tiou no asuhcu ecvʉhʉhe no mocmo ci yʉsvʉta.

² lato asngʉcʉ peis'epo. inala yono e'e ho o'te mat'epo micu a'sʉftonʉ ci cou; isicu peelʉi aucunva atʉkca 'e iachi.

³ hocito peelʉi teapha to ngayo to 'uma 'o popngayasi, tec'u peelʉi poa tmaolalʉ, popeoskuna ho poa uhno teto 'ucia poa usaneni.

⁴ ivaha aiti, 'omo coni ci 'apangʉ mo e'vono maica 'o hiasi meoisi, yonto mo taso ci poepe, lac'o boemi tomo okosi ci pulopela ho poʉt'ʉca, tac'u meelʉ fiho to 'tohʉngʉ tola poʉt'ʉcʉ ho emo'usnu tote atuhca usa.

⁵ totiski, 'e umo e'vono moc'o na'no okosi, tena meelʉ emeoisi. aʉsvʉta ta'to'tohʉngva. 'omoc'o meaemo'ʉ ci ksiksi. 'alasieno peelʉi pae'ʉhi 'o meoino poneo?

⁶ 'e umo mo aʉlʉ mais'a 'o puzu, ta 'ayumona ta maesoesouto zou kokuzo ci hpʉhpʉngʉ, peelʉi acaca'ia 'e feango; lasi ieni to puzu ne vooecʉvcana ho aucunva hmoi 'e h'oceona no nsou ta cou.

⁷ la peelʉi atpʉta ta cou 'o yuansou, mazozomʉ, mayoyoi, ho i'o mayayayo ta chumu; a'ʉmtʉsi, isicu acʉha atʉkca ta cou 'e mav'ov'o ci yuansou.

⁸ at'inghi, o'amocuisi ahta peelʉi atʉkca ta cou 'e umo; la o'te peelʉi atʉkca ci kokuzo, isi nongcʉngci tola tumzi ta nsou ci peucu no mahiz'o.

⁹ lato boemi ta umo ho tohmomoengʉ to nooe'oca, to amopepeto, tena maezo boemi ta umo ho patkuzoi 'e ohsila teyai to hamo ho poa mi'u'usnu no mi'ausnasi ci cou.

¹⁰ 'o tohmomoengʉ ho matkuzkuzo mo yuyafo ta moc'o conci ngayo! maanat'ohaesa, o'ante maica!

¹¹ teeno ahtu i'mi nomoc'o conci esbobuka namo cohʉmʉ ho mayʉmʉ ci chumu?

¹² maanat'ohaesa, 'o moezunge o'ate beahci no 'olivu; 'o amcuyu o'ate beahci no moezunge; 'omo maski ci esbobuka o'ate moheafo nomo cohʉmʉ ci chumu.

i'mi ne pepe ci moutʉs'ʉ

¹³ ta taicomu panomo yaa mau'to'tohʉngʉ ho moutʉs'ʉ ci cou? hoci pano, nte ieni no a'sʉftonʉ ci ma'einu ho toutʉs'ʉ ci peipeis'ausna, ho peispa'teni na mo yonghu ci h'oyunsovasi.

¹⁴ ho mimueno yaa ma'konvosʉ mahiz'o ci smo'eubut'u ho ma'cachi ta 'tohʉngʉmu, o'a na temu meelʉ iachi etano, 'ote lolekoknuyu ho mihango to so'emio.

¹⁵ 'o lamu yainca moutʉs'ʉ o'amo i'mi ne pepe, mamo tma'usnu ta ceoa, tma'usnu no ma'konvosʉ, tma'usnu no 'akuma.

¹⁶ namo afu'u yaa smo'eubut'u ho ma'cachi, ahtuo'te yaa ep'ʉcʉ ho mav'ov'o ci kokuzo ci peipeis'ausna.

¹⁷ at'inghi, 'omo i'mi ne pepe ci moutʉs'ʉ mo piyo cila humzi: 'o ahoisi zou cofkoya, 'o cnguhusi zoucu moususeomʉ, luaeinva, nanghia, nongcʉngci to himngonghi, meelʉ beahci nomo atngaso ci ʉmnʉ, o'ala ma'cachi, o'amo me'ʉ'ʉmnʉ.

¹⁸ acʉcʉhʉ na beahci no moulʉlʉ mo acʉhʉ i'mi tola miyapo to moususeomʉ ci cou, nomio tola asno'zonʉ miyapo to tutu no moususeomʉ ho cmʉfeʉ.