yakovu 2 - buacou seiso no faeva esvʉtʉ

koica 'ola ma'peu

¹ maanat'ohaesa'u, ho zoueno sinto to psoevohngʉ ci nooe'oca iesu kilisto na muu, 'otela buhmi ta yafana ta cou, boemi nomo o'te totiski ci teo'ausna ho mi'usnu ta cou.

² maihocieno yaa cihi cimo yuyupasʉ, maasku no king ho maceofʉ nomo 'ukini ci yʉsʉ, uhta imu yoni yu'eteuyunu, conosi ho mio mo maezo esmi namo sʉ'eʉsʉ nomo athʉthʉsʉ ci thi'cia,

³ hociko mi'usni namo sʉ'eʉsʉ no 'ukini ci cou ho afnasa einva, mi'usni ho yainca: ho mi'usnu tomo thi'cia ho yainca: , hocieno yainca: ,

⁴ 'amikocueno ma'peu, mo kuici koyu ho hupotfʉnga 'e cou.

⁵ songohia ci maanat'ohaesa, temu tmalʉ: isi epeiya to hamo 'o thi'cia ta hpʉhpʉngʉ, poa yonto singkoo ho atngaso, yaeza poa ticngihi to ohsila teomneni tola himngonghi to hamo ci cou 'o faeva ci hpʉhpʉngʉ.

⁶ nama lamu aokoe'i tomo thi'cia ci cou! a'ʉmtʉsi, i'ola pohcinghi muu ho e'usna to taicini. 'aeno 'emo maica yuyupasʉ ci cou!

⁷ i'ola ekuzkuzo to lamu tiova ho einva ci ongko, 'aeno maezo 'emo maica ci cou.

⁸ honcimu meot'ʉcʉ to isi tposi to seiso ci p'ofiha to faeva ci hpʉhpʉngʉ. 'amicu emzo.

⁹ at'inghi, hocimuc'o buhmi ta yafana ta cou ho mi'usnu ta cou, 'amicu peiskuisi; 'e hoolicu tesi yʉsvʉta na muu mo yuszozʉ.

¹⁰ siya namo pef'uhu tamo mehacni ta 'ayumona ta h'oesvʉta, 'amicueno maihoci pef'uha 'e acʉcʉhʉ ci h'oesvʉta.

¹¹ maica 'omo mashʉyʉ ho yainca <'ote mseezo>, yaeza yainca <'ote opcoi no cou>. 'upena hociko o'te mseezo, ho opcoi no cou 'amoeno maezo pef'uhu to hoolicu.

¹² ho temueno tiou to yʉsvʉtʉ tola koa ziu ta cou ci h'ofiha, 'atemueno poa touseoseolʉ ta isi esvʉta na lamu e'e ho peipeis'ausna.

¹³ maica i'o hamo ho tena yʉsvʉtʉ, o'atasi yomza no ma'cocacni ho mi'usni 'ola 'oha ma'cocacni ci cou. at'inghi, na ma'cocacni la tosa'ohe to yʉsvʉtʉ.

singkoo ho peipeis'ausna

¹⁴ maanat'ohaesa'u, hoci panonte mainca mi'o yaa singkooa, ho o'te peelʉi honga no peipeis'ausnasi, cuma na koasi ʉmnʉ? tesieno peelʉi to'usni tamo maica ci singkoosi:

¹⁵ ta 'ayumonamu hoci pano nanat'ot'ohaesa mo uk'a maka paceofa,

¹⁶ temu mi'usni ho yainca: ho o'te fii no tehe tititha, ma cuma na tesi koa ʉmnʉ?

¹⁷ totiski, hoci uk'a peipeis'ausna na singkoo 'amoeno mcoi.

¹⁸ at'inghi, panomo mainca: <'e cou eni mo yaa singkoo, ta cou ta'e mo yaa peipeis'ausna.> te'o yut'inga:

¹⁹ osko taa'uzva moc'o cihi na hamo, mio a'ʉmtʉ ʉmnʉ! 'o h'aokuv'o la maezo maica ci hia tmaa'uzo, a'vinano isi na'na smoyoa 'o hamo.

²⁰ nongonongo ci cou, temula cohivi 'omo uk'a peipeis'ausna ci singkoo panoeno ʉmnʉsi?

²¹ 'o nia maameoito ci 'avulahamu mosoeno mainenu na hiasi meelʉ yupa toseolʉ na natʉ'ca to hamo? 'amoeno i'mi to peipeis'ausnasi ne moso yonto 'oyona sʉ'tʉ ho sʉ'teni to hamo 'o okosi ci 'isaku.

²² tec'u honga, 'o singkoosi ho i'o peipeis'ausna mo toepohʉ, 'o singkoo te ieni no peipeis'ausna niantec'u a'sʉftonʉ.

²³ yainca to seiso: 'aisieno miya 'e e'e eni; isicu yainca zou nanghia to hamo.

²⁴ ko'koeno, hoci meelʉ yupa toseolʉ ci natʉ'ca to hamo 'e cou te ieni no peipeis'ausna, o'atec'o anova ieni no singkoo.

²⁵ 'o a'a'ausna to noasisi ci laaho 'amoeno totiski. homo meelʉ yupa toseolʉ ci natʉ'ca 'o hamo mo maezo i'mi to peipeis'ausnasi; ohsi aʉt'ʉca 'o soskuskunu to couyutaya, isin'a to'usni ho poa mito mocmo ci ceonʉ ho poa pkaakoa.

²⁶ ko'koeno, aʉlʉ mais'a 'e feango hoci uk'a nsou 'amoeno mcoi, hoci uk'a peipeis'ausna 'e singkoo mo maezo mcoi.