yakovu 1 - buacou seiso no faeva esvʉtʉ

¹ na a'o - yakovu zou soskuskunu to hamo ho ito nooe'oca iesu kilisto; te'o tuayokeo tamo nopeaski ta mauhpʉhpʉngʉ ci 'o'oko to hamo.

singkoo ho moutʉs'ʉ

² maanat'ohaesa, homimu elʉ to mav'ov'o ci hʉsvʉta, ntemula ma'unano mo abohtʉ ci hi'hioa,

³ maica la cohivi na singkoomu mac'ocu sucaefi no hʉsvʉta teeno cmʉfeʉ na luaveica.

⁴ temu apaezumo buveici niantec'u a'sʉftonʉ yʉepʉngi, uk'ana ake'i avzovzo.

⁵ ta taicomu hoci panomo o'te amso na moutʉs'ʉ, nte mi'usnu to hamo ho m'ene, tesi pafi no moutʉs'ʉ na muu, maica lasi kaeba at'otngasa ho pafeni tamo macicihi ci cou.

⁶ at'inghi, temula boemi no singkoo ho m'ene, 'otes'a ake'i ma'pepecvai; i'ola ma'pepecvai ci cou, la mais'a 'o smahu to etʉpʉ. noa peaot'ovneni to poepe, ho conino tmau'fu.

^7-8 'emo maica ci cou lac'o ma'pehaeso ho e'vaevoezuhu, 'otes'a ma'unano panonte p'elʉa ci cuma to nooe'oca.

thi'cia ho atngaso

⁹ 'omo noaceaco ci sinto ho lasi poa taspepza to hamo. nte kokaekaebʉ;

¹⁰ 'omo atngaso ci cou hoci taspueha nte maezo maica, 'omo atngaso ci cou la mais'a bʉvnʉ ho suehi.

¹¹ homo bohinoi 'o hie, ta'poepza to cuveu ci poepe, la oemi'mi 'o maukukuzo, suehi 'o bʉvnʉ, na nia yonghusi cu acʉhʉ aapayo'ʉ. totiski, 'omo atngaso ci cou la asno'zonʉ yaezoi, tec'o maezo aapayo'ʉ.

hʉsvʉta ho topani

¹² 'ola elʉ to hʉsvʉta ho apaezumo buveici ci cou te ʉm'ʉmnʉ; maica ho micu yupaezumo no hʉsvʉta, tena tiou to isi ayocneni tomo himngonghi to hamo ci ohsi teomneni ci tafange no nsou.

¹³ 'e cou hoci mitamo maica ci hʉsvʉta, o'ate mainca: ; maica 'o hamo o'ate peelʉi hʉsvʉta no kokuzo, maezo o'ala bʉhsʉftʉ ta cou.

¹⁴ homo tiou no hʉsvʉta 'e mo cihi ci cou, 'aisic'oeno peolʉa no iachi ma'konvosʉ.

¹⁵ hoci ngangho'ʉ na ma'konvosʉsi, la peyafa 'o kuisi, hoci yʉepʉngi 'o kuisi tec'u cmʉfeʉ 'o mcoi.

¹⁶ songohia ci maanat'ohaesa'u, 'ote noa tonongonongoi!

¹⁷ acʉcʉhʉ 'ola yonghu ho ʉmnʉ ci hi'hioa ho i'omo mav'ov'o ci a'sʉftonʉ ci mengumi mo acʉhʉ i'mi ne pepe, mo i'mi to amopepe; moso mooyai ta tiskova ci nooe'oca. o'amo ahtu aezuhu, maezo uk'a cimo tmaiezuhu ci ongko.

¹⁸ la maino iachisi 'tohʉngʉ, ieni no so'emio ci e'e ho teyai a'to, poa notmoyaevonʉ ta ohsila afu'a teyai ci acʉcʉhʉ na a'to.

tmalʉ ho hioa

¹⁹ songohia ci maanat'ohaesa'u, 'e mimu macicihi ci cou ntela aa'pucu tmalʉ no 'tohʉngʉ no mocmo ci cou, 'ote 'aumeumeusu ya'ei, 'otela angu luesasʉ'no.

²⁰ 'e yuububciki ta cou o'ate peelʉi peihcʉ'hi na atuhcu moulʉlʉ to hamo.

²¹ ko'koeno, temula momeesih'i no afu'u 'oha ʉmnʉ ci h'oyunsova ho i'ola kokuzo ci peipeis'ausna, boemi no meo'uzo ci 'tohʉngʉ ho tiova na isi emʉ'a ta 'tohʉngʉmu ci e'e to hamo, 'ai'o teeno meelʉ to'usnu ta nsoumu ci e'e.

²² at'inghi, teav'ala peknui si iachimu, ma'unano tec'u amso hocic'o tmalʉ no e'e; apuyu, temula asansana peiseafi 'e e'e.

²³ i'ola tmalʉ to e'e ho o'te fihi hioa, aʉlʉ mais'a 'emo cihi ci cou mo buh'ongko ho aiti 'o iachisi mi'a'ausna,

²⁴ aomanza hʉʉlʉlʉi, hocu emose'u, cu osnia ta'payo'a 'o iachisi mi'a'ausna.

²⁵ at'inghi, i'ola ma'eʉyʉcʉ ho 'ucia ta'sansana 'ola koa ziu ta cou ci 'ofiha ho fihi, o'alasis'a talʉi hocu ta'payo'a, malasi asansana fihi hioa; 'emo maica ci cou te yonta lasi hi'hioa ahtuo'te noa pafi no ʉm'ʉmnʉ to hamo.

²⁶ siya nala ma'unano mo yaa singkooa, ho o'te atʉkca na iachi umo, isicu peknui 'e iachi; ina singkoosi uk'a ci tesi ake'a a'a'ausna.

²⁷ inalasi hia baito to amohamo, i'ola cofkoya ho uk'a heo'tʉ ci singkoo 'aeno: aʉt'ʉcʉ tola 'atutumzo ci 'o'oko ho itola tuvcongʉ ci mamespingi, ayʉca 'e iachi ho o'te poa uv'ohneni no tokuzo ta hpʉhpʉngʉ.