tito 2 - buacou seiso no faeva esvʉtʉ

yoayokeo ci 'omahsʉfta

¹ inacu suu, na lako po'pa'cohivneni la poa toseolʉ to yoayokeo ci 'omahsʉfta.

² teko eucufna 'o mamameoi ci cou, la mouyʉcʉ, ʉmnʉ ci yu'ausna, atʉkca 'e iachi, yaa yoayokeo ci singkoo, himngonghi, ho luaveica.

³ teko yaeza eucufna 'o mameoi ci maamespingi, la bumemealʉ na peipeis'ausna. 'otela buusumsu, 'ote noa tolei no emi. la yaa ʉmnʉ cila hu'ofeihni,

⁴ po'pa'cohivi 'o mon'a yu'fafoinana ci maamespingi, poa aʉsvʉsvʉtʉ no himngonghi to vcongʉ ho 'o'oko,

⁵ yainenu nate hia atʉkca 'e iachi, la ma'cocofkoya, tvaezoya no asusucza na emoo, ma'to'usnu to cou, meo'uzo to vcongʉ, tees'ala noa eaknuesa 'o e'e to hamo.

⁶ totiski, teko yaeza eucufna 'o yu'fafoinana, la poa atʉkceni na iachi.

⁷ 'ecu iachisu, 'upena no mainenu ci hi'hioa la acʉha poa ʉmnʉ nala peipeis'ausna, mooyai no tehela peis'ofeihni. hola mo'ma'cohio to cou la eʉlʉ, ho mouyʉcʉ,

⁸ la poa suuseoseolʉ na e'e, poa o'te yaa 'eongʉ no eayaezoya no mocmo ci cou. maicac'o, i'ola mihango suu ci cou, maica ho uk'a ci lahe elʉa ci lato peis'epo, iachi ma'kokoe'i ho uk'a na e'e.

⁹ teko eucufna 'ola soskuskunu, la meo'uzo to tauke, aa'pucu noa ʉmnʉa to tauke, 'ote la yʉhcʉvho,

¹⁰ maezo 'otela meo'eoi, tamo macoconi ci hi'hioa la pa'teni na meot'ʉt'ʉcʉ ho noe'oci, peelʉi asuhca poa einveni 'o lasi po'pa'cohivneni to nooe'oca hamo ci h'omahsʉfta.

¹¹ maica na mengumi no to'usnu ta yatatiskova to hamo isicu husansana.

¹² 'e mengumi eni isi poa aʉsvʉtʉ bʉʉpsʉpsʉ nomo 'oha einu ho inomo tma'usnu ta ceoa ci ma'konvosʉ, yonta ceoa ho mino mo atʉkcʉ, mousʉngcʉ, ho einu ci h'oyunsova.

¹³ totea hocic'u esmi na hiesi to lato mingeovi ci mengumi; homio, 'o psoevohngʉ to so'einva ci hamo ho i'o nooe'ocato ci iesu kilisto te hupopayoi.

¹⁴ 'o kilisto isi nomzi a'to ho ciha 'o iachi, to'usni a'to ho poa momeesih'i no afu'u kokuzo, poacu cofkoya ci 'o'okosi, tma'usnu to hamo, ho poa popeislʉlʉ.

¹⁵ tekola yue'engha 'emo maica ci hi'hioa, a'sʉftona titha na tonʉsu ta lako hi'hioa ho eucufnu ta cou ho kokoicʉ. teav'ala poa hupotfʉngneni ta cou na suu.