tito 1 - buacou seiso no faeva esvʉtʉ

¹ na a'o - poolo zou soskuskunu to hamo, sitoo to iesu kilisto. mi'o noa eoho'a, noa popeoskuna ho to'usni 'o singkoo to ohsila epeiya to hamo ci cou, eahafa ho poa bohngʉ to isi po'pa'cohivneni ci so'emio ta singkoomia;

² 'e so'emio eni mo i'tohungu to isi ieni to mingeou no 'auesiesi nsou. i'o o'ala meknuyu ci hamo, ne auyusi ta mauhpʉhpʉngʉ, ohsicula teomneni ho pafeni a'to 'e 'auesiesi nsou,

³ ho micu mic'ʉhi 'e hiesi, isicu ieni ta isi psoyaska ci e'e ho hupopayoi. mi'o noa tovei to hamo - to mashʉyʉ to nooe'ocato, sviei 'e hioa no psoyaski ta e'e tan'e.

⁴ tito, te'o tmopsʉ ta tengami ho faeni suu; yontamo totiski ci singkooto zou a'ʉmtʉ'u oko na suu. pafeni suu'sio to amohamo ho ito nooe'oca kilisto iesu na mengumi, ho soanonosi!

hi'hioa to tito homo yone kolitho

⁵ ho os'o teongasi ne kolitho na suu, na atuhcusi te'o poa tasuczeni 'o o'amocu os'o aepʉnga ci hi'hioa, a'vinano yonta mahohosa ho m'eac'ʉ no coolo. o'ucula eutotaveiya:

⁶ namo coolo asansano o'ate yaa 'o'emamzi no koica ci cou. tec'o cihi na vcongʉsi na 'o'okosi nte acʉhʉ sinto. o'ala 'aʉnpʉnpʉ hocieno 'oha tmaolalʉ ci a'a'ausna.

⁷ ho teeno so'ehti ta kiokai, leaʉt'ʉcʉ ta emoo to hamo, nte uk'a 'o'emamzi no koica, o'ate ʉmnʉ hoci bobitano, pak'i, voemi, youbobai, makonvosʉ no yupasʉ;

⁸ la kokaebʉ aʉt'ʉt'ʉcʉ to cou, kokaebʉ peis'ʉ'ʉmnʉ, iachi ayʉyʉcʉ, la mousʉngcʉ, acocofkoya, peelʉi atʉkca 'e iachi.

⁹ tesi asansana noyʉci 'ola peelʉi noe'oci, toseolʉ to mou'ʉmtʉ ci mahsʉsʉftʉ. maicac'o, tesieno peelʉi titha 'emo noyaemʉhʉ ci 'omahsʉfta ho ptav'ohʉ no mocmo ci cou, a'vinano peelʉi pesngʉcva 'o ma'peu tola yutasufku suu.

¹⁰ maica mo botngonʉ 'ola yuszozʉ ta ceonʉ, boemi to e'ankʉ uk'a a'a'ausna ci e'e ho meknuyu to cou, aavaho 'olan'a ephou no s'e'honga ci sinto ta yutaya.

¹¹ teko asansana potani hoci aomotʉ'ʉ 'emo maica ci cou, maica, la nomio no ma'konvosʉ no yupasʉ, micu boemi to o'ante psoyaska ci motposʉ hocu aon'oza 'omo man'i ci emoo.

¹² 'e coukolitho mo iachi yaa cihi ci eyongensa panto e'esi isi yainca:

¹³ 'e e'esi o'amo epeu. ko'koeno, teko eyʉyʉci ho meoino koica, ko'ko peelʉi poa yaa yoayokeo ci singkoo,

¹⁴ o'tena i'vaho tmalʉ to e'ankʉ ci niala ehohamva to couyutaya ho ito lahe atʉkca ci h'ofiha tola pef'uhu to so'emio ci cou.

¹⁵ hoci e'usna tola acocofkoya ci cou, la acʉhʉ cofkoya 'e acʉcʉhʉ; at'inghi hoci e'usna tola coca'i ho o'te tmaa'uzo ci cou, uk'a ci mo conci cofkoya ci macucuma, maica 'o ʉmnʉ ci 'tohʉngʉhe micu acʉhʉ kuici ca'i.

¹⁶ la mainca mo bohngʉ to hamo, at'inghi la yonto peipeis'ausna ho peecveni 'o hamo. zou kokuzo, zou moyutasufku, cuma nantehe peelʉi hioa cimo ʉmnʉ.