tesalonike 2 3 - buacou seiso no faeva esvʉtʉ

'inolineni a'mi

¹ atavei, maanat'ohaesa, temu'sola 'inolineni a'mi, ko'ko peelʉi aupcieva psoyaska 'e fukuin to nooe'oca, a'vinano noa einva, mais'a ne ohola psoyaska ta 'ayumonamu ho noa einva.

² temu'so yaeza eoho'neni to hamo. to'usni a'mi ho momeesih'i to kokuzo ci cou, maica ma'imoc'oso acʉhʉ tmaa'uzo to nooe'oca.

³ at'inghi, zou 'o'emio 'o nooe'oca; tesi peelʉi poa bimahtʉicʉ muu, o'te poa suv'ohneni tola kokuzo.

⁴ isi poa taa'uzveni a'mi to nooe'oca na singkoomu, imza ta'sansana ho imu peiseafi, a'vinano a'cʉ'cʉna peiseafi 'o omzala eutotaveineni.

⁵ tesi'sola eahafa to nooe'oca muu, asuhcu mʉ'eona na lamu ta'hongi ci himngonghi to hamo, a'vinano yayo na isi pafeni to kilisto ci luaveica.

peihcʉ'hi nante anana'va hioa

⁶ maanat'ohaesa, temia epici to ongko to nooe'oca iesu kilisto ho pashʉya muu: la nose'u tola biyavoveic'o ho o'te tmalʉ to lamza hia mo'ma'cohio ci sinto.

⁷ imu iachia na'no ta'sansana, nte mainenu nate hia momaemaezo a'mi, ne momzan'a no'upu muu, ma'i momzala mo'ma'mio,

⁸ maezo o'amimza obohtʉ no naveu no mocmo, apuyu peisngongoseo ho peihtutumzo, huhucmasi yaahioa, akoeva no o'te poa e'ngoseo muu.

⁹ homo maica 'o lamza hioa, o'aisis'a yainca o'atemza meelʉ m'ene no temza tititha no h'oyunsova, matemza 'ucia poa momaemaezo no lamza hioa na muu.

¹⁰ ne momzan'a no'upu muu omzacula yainca:

¹¹ ho imza e'e eni, maica ho imza tac'ʉhi ta 'ayumonamu la yaa biavoveic'o ci h'oyunsova, concono hie o'te yaahioa, ho cu'cumaso nola hioa no mocmo.

¹² 'emo maica ci cou, temia epici to ongko to nooe'oca iesu kilisto ho ehangva, pashʉya ho poa amzocni, la iachi yaahioa ho p'ayunsova 'e iachi.

¹³ at'inghi, maanat'ohaesa, temu la o'te ma'sasmʉzʉ ho peismi nomo ʉmnʉ.

¹⁴ nenusino pano o'ate meo'uzo ta imza eutotaveiya ta tengami; 'emo maica ci cou, temula etngoeva, teav'ala noteuyuneni, poa iachi ma'kokoe'i.

¹⁵ at'inghi, teav'a tahangʉa, la mais'a hola mi'usnu ta sinto ho poucufna.

tooyokeo

¹⁶ i'ola mofi no soanono ci nooe'oca tesi'sola boemi no mav'ov'o ci peipeis'ausna ho pafi no soanono muu! asngʉcva'so la no'upi to nooe'oca muu!

¹⁷ te'o iachia tposi: <'e poolo te'o tooyokeoi muu.> 'emo macoconci tengami'u la'u acʉha yaica ci hia tmopsʉ; zou tma'a'ausna'u eni.

¹⁸ 'o nooe'oca iesu kilisto tesi'so pafi no mengumisi na muu!