tesalonike 2 2 - buacou seiso no faeva esvʉtʉ

'ola popeiskuzkuzo

¹ maanat'ohaesa, e'usnu no i'vaho cmʉ'ho 'o nooe'oca iesu kilisto, ho ina a'a'ausna ho tasi eteuyuna a'to ho yupteilʉ ci hi'hioa, te'o eutotaveiya muu.

² teav'a poa 'afeo'fu'neni ho ma'pepecvai ho lahe yainca , nenusi no panola mainca 'emo maica pat'a'ausna zou e'emza ho lamza eʉsvʉsvʉtʉ ho psoyaski ta fukuin, hocieno ac'ʉhʉ no panola mainca mo maica na hiamza tmopsʉ ta tengami.

³ teav'a poa peev'ov'ohneni to mav'ov'o ci lahe ti'a'ausna to cou. maica, auyusi hotena cmʉ'ho na hiesi 'atena ahtuo'te auyu yaa yutasufku; i'oisi asvʉta no meaapayo'ʉ ci la popeiskuzkuzo te yuyafo.

⁴ i'ola popeiskuzkuzo tehe acʉha yutasufku 'o afu'u mahihicu ho i'ola afu'a p'ohkui ta cou, hoepzeni 'e iachi ho poa yuepehe ta acʉcʉhʉ; ac'ʉhʉ no yusuhngu to seiten to hamo, ho iachi bihamo.

⁵ o'aimueno talʉa? ne mo'un'a no'upu muu o'ucula eʉsvʉta muu na eni.

⁶ zou cuma namo motano hocic'u esmi maitan'e na eni, imueno o'te cohivi. hotac'u esmi na hiesi, tenac'u biyoyafo 'ola popeiskuzkuzo.

⁷ i'ola nootoefʉngʉ ci la peiskuzkuzo micu ahoi yaahioa; at'inghi, totea ho tasicu ese'veni 'o emucu tomo nomʉtʉ ta hi'hioa, niantec'u yuyafo 'e hi'hioa eni.

⁸ homio, te yuyafo 'ola popeiskuzkuzo, at'inghi ho tena i'vaho cmʉ'ho 'o nooe'oca iesu tasi yomza to peucu to ngayosi ho opcoza, ieni no tiskovasi ho aapayo'a.

⁹ i'ola popeiskuzkuzo te mahafo no tonʉ to satan ho cmʉ'ho, hioa 'omo mav'ov'o ci la huunona'vʉ ci tonʉ, peispa'teni 'omo meknuyu ci mavolosi,

¹⁰ a'vinano mi'usnu to tec'u meaapayo'ʉ ci cou ho boemi to mav'ov'o ci kuici hioa, maica o'a ihe tiova, o'aihe ʉmnʉa 'ete meelʉ to'usnu ci so'emio.

¹¹ i'mi tan'e, 'emo maica ci cou isi fii no kuici ma'peu to hamo, ho poa mee'ofeihni ta eknuyu.

¹² ataveisi, i'omo afu'u o'te tmaa'uzo to so'emio, ho i'o la peiskaebʉ to kuisi ci cou te acʉha topci to kuisi.

epeiya ho poa tiou no mengumi

¹³ ngohia to nooe'oca ci maanat'ohaesa, ntemza anana'va asngʉcva 'aveoveoneni to hamo na muu; maica ho isi epeiya to hamo na muu, ieni to cofkoya ci lasi hioa to seilei ho i'olamu hia mi'usnu to so'emio ci singkoo, poa auyu elʉ no to'usnu muu.

¹⁴ ieni to omzala psoecʉ'ha muu ci fukuin, isi eoho'a to hamo na muu; isi eoho'a muu ho poa tma'upu no psoevohngʉ to nooe'oca iesu kilisto.

¹⁵ ko'koeno, maanat'ohaesa, la yaa bimahtʉicʉ ci singkoo, mi'usnu ta omzala po'pa'cohivneni ci so'emio, 'upena 'o ohola psoyaska ho i'o omza tposi ta tengami. temula acʉha noyʉci.

¹⁶ isi ngohia to hamo a'to, i'mi to mengumisi, isi pafi no 'auesiesi ci 'ʉteʉ ho yonghu ci ta'usni na a'to. 'e amohamo eni ho i'o nooe'oca iesu kilisto tesi'sio,

¹⁷ poucufna muu, poa yaa ma'ʉ'ʉteʉ ci 'tohʉngʉ. psoyaska ho peiseafi 'e acʉcʉhʉ cimo yonghu ci hi'hioa.