tesalonike 2 1 - buacou seiso no faeva esvʉtʉ

¹ zou poolo a'o; mimza toehungu 'e siila ho temote ho tengami ta kiokai ta tesalonike - tamo tma'usnu to amohamo ho nooe'oca iesu kilisto ci sinto.

² faeni'sio muu to amohamo hoito nooe'oca iesu kilisto na mengumi, ho ina soanonosi!

yʉsvʉta to kilisto ho tena i'vaho cmʉ'ho

³ maanat'ohaesa, mantemza asngʉcva 'aveoveoneni to hamo na muu. 'aeno a'ʉmtʉ; maica homo meoino asuhcu na singkoomu, na yupa himngonghi ci 'tohʉngʉ mo maezo meoino apuhngu.

⁴ i'mi tan'e, leamza mi'usnu to makikiokai to hamo ho emomoengʉa muu. imu mia na mav'ov'o ci pohtutumzo, 'atutumzo, ho a'cʉ'cʉnʉ tmaa'uzo, a'cʉ'cʉnʉ buveici; 'aeno eni na imza koa emomoengʉa.

⁵ na eni aʉla humzi ho zou ahmʉskʉ ci yʉsvʉtʉ to hamo, soomei temu 'aseolʉ no tma'upu no ʉm'ʉmnʉ to hpʉhpʉngʉ to hamo. 'amimueno nomio ta hpʉhpʉngʉ tan'e ho a'cʉ'cʉnʉ buveici no 'atutumzo.

⁶ tesi hioa to hamo na moulʉlʉ. tesi poa elʉ no ku'kuici na mosola pohtutumzo muu;

⁷ 'e mimu notutumzo ci cou tesi poa totiski a'mi ho psoevoyunga. 'o nooe'oca iesu ho i'o yaa tonʉa ci tensi ho tena i'mi ne pepe ho no'ayumonʉ to yafeu ho aopa'to, tesicu hioa to hamo na eni.

⁸ tesi patvovei 'omo me'o'o'te bohngʉ, ho o'te tmalʉ to fukuin to nooe'oca iesu ci cou.

⁹ to hiesi no i'vaho cmʉ'ho 'o nooe'oca, 'emo maica ci cou tena noa patvovei, 'auesiesi aapayo'ʉ. tahesa to tuhcu to nooe'oca, mongoi to psoevohngʉ ci tonʉ to hamo.

¹⁰ to hiesi ho mio, tena i'mi ta sinto ho elʉ no psoevohngʉ, a'vinano tiou no tohmomoengʉ. tenamu maezo to'upu to 'ayumonahe, maica ho imu taa'uzva 'e imza psoyaska ci fukuin.

¹¹ nomio ta isi mituhci tan'e, lamza conino 'inolineni muu, eyoho'ʉ to hamo ho o'te poa yuszozʉ no koa ohsi eyoho'a na muu. tesi'sola boemi no taso ci tonʉsi ho to'usni muu, acʉha'so peiseafi namo mi'usnu no ʉmnʉ ci 'tohʉngʉsi, peihcʉ'hi na ohmu boemi no singkoo ho hioa ci hi'hioa.

¹² maicac'o, 'o ongko to nooe'ocato ci iesu te i'mi muu ho elʉ no psoevohngʉ, temu maezo i'mi to iesu ho elʉ no psoevohngʉ; na eni isi ieni to mengumi to hamo ho ito nooe'oca iesu kilisto ho esmi.