tesalonike 1 5 - buacou seiso no faeva esvʉtʉ

ae'ayocʉ no yungeou to nooe'oca hote i'vaho cmʉ'ho

¹ maanat'ohaesa, e'usna ta hiesi no esmi 'e a'a'ausna eni, o'ate nama tengami na mocmo ho eʉsvʉta muu;

² maica ho imu iachia cohivi, ho tena cmʉ'ho 'o nooe'oca te mais'a thokeainʉ ho aemo'au cmʉ'ho ho mo feʉngna.

³ homo seolʉa no acʉhʉ mainca te akameosʉ cmʉ'ho 'o meakvo'ʉ, mais'a 'o congo to mamespingi ho tec'u yayo 'o okosi. o'ate meelʉ noesih'i.

⁴ at'inghi. maanat'ohaesa. o'amimu yunsou no 'ayumona no voecʉvcʉ; na hiesi ho mio o'ate mais'a thokeainʉ ho aemo'au esmi.

⁵ zou cou tiskova muu, mo tma'usnu ta hie. o'amito tma'usnu no feʉngna, o'a mo yunsou no 'ayumona no voecʉvcʉ.

⁶ ko'koeno, o'anteto mais'a mocmo ho m'onoi; teto aʉtʉs'ʉ etngou.

⁷ la oengʉtʉ homo feʉngna 'ola oengʉtʉ; 'ola voemi ci cou la moyomo homo feʉngna.

⁸ ho mitoeno no'usnu no hie, 'anteeno anana'o etngou. teto teyai pihci na tmaa'uzo ho himngonghi, teto ceopngu na lato ta'usni ci to'usnu.

⁹ o'aisi epeiya to hamo na a'to ho akoeva no patvovei, matesi ieni to nooe'ocato ci iesu kilisto ho to'usni a'to.

¹⁰ 'o kilisto isi mcoineni a'to, 'upena na micu mcoi hocieno yaansoua, tesi akoeva no poa meelʉ a'upu yaansou ho tenac'u i'vaho cmʉ'ho.

¹¹ i'mi tan'e, temula yupa poucufnu, yupa to'usnu, mais'a 'e imu hioa maitan'e.

sotavei ci pahsʉsʉfta ho tuayokeo

¹² maanat'ohaesa, temia m'ene muu, temula einva 'ola ngoseo yaahioa ta 'ayumonamu - 'ai'o ohsi epeiya to nooe'oca ho poa eucufnu ho kokoicʉ muu.

¹³ nomio to lahe hioa, ntemula boemi no atva'esi meoino himngonghi ho einu ci 'tohʉngʉ ho aʉt'ʉca. temula maezo iachi nananghinghia.

¹⁴ maanat'ohaesa, temia eucufna muu, la engahva 'ola lue'amamza ci cou, poucufna 'ola ma'sasmʉzʉ ci cou, e'oca 'ola yoheoz'u ci cou, uveica 'emo macicihi ci cou.

¹⁵ la bumemealʉ, 'otes'ala boemi no kuzo ho auski no kuzo, la asngʉcʉ yupa smo'eʉt'ʉt'ʉcʉ, ta'to'tohʉngveni no te koa ʉmnʉ na mocmo ci cou.

¹⁶ la asngʉcʉ kokaekaebʉ,

¹⁷ asngʉcʉ 'inoli,

¹⁸ yono mav'ov'o ci a'a'ausna la aa'pucu 'aveoveoyʉ. na eni isi asvʉtneni ta mimu tma'usnu to kilisto iesu ci 'tohʉngʉ to hamo.

¹⁹ teav'ala tomʉti na lasi hi'hioa to seilei;

²⁰ teav'a hupotfʉnga 'e isi psoyaska ci fukuin.

²¹ la ta'sansana 'emo macoconi ci hi'hioa, noyʉci namo yonghu ho ʉmnʉ,

²² bʉʉpsʉpsʉ no afu'u kokuzo.

²³ i'ola mofi a'to to soanono ci hamo tesi'sola poa a'sʉftonʉ cofkoya muu! tesi'sola aʉt'ʉca na piepiya, hzoo, ho feangomu, ho tac'u i'vaho cmʉ'ho 'o nooe'oca iesu kilisto meelʉ h'aucucunu!

²⁴ i'omo epei muu ci hamo la peelʉi taa'uzva ho noe'oci; 'atasi ahtao'te aepʉnga 'e hi'hioa eni.

²⁵ maanat'ohaesa, temu 'inolineni a'mi.

²⁶ la boemi no socofkoya ci kisu ho mi'usnu no nanat'ot'ohaesa ho tuayokeo.

²⁷ te'o epici to ongko to nooe'oca ho eutotaveiya muu, mi'usnu to acʉcʉhʉ ci sinto ho engha 'e tengami eni.

²⁸ tesi'sola pafeni muu to nooe'oca iesu kilisto na mengumisi!