tesalonike 1 4 - buacou seiso no faeva esvʉtʉ

emomoengʉa to hamo ci h'oyunsova

¹ ataveisi, maanat'ohaesa, mimucu meelʉ momaemaezo a'mi ho yono h'oyunsova ho cohivi nate hia noa so'eʉ'ʉmnʉa to hamo - a'ʉmtʉsi, mimu apaezumo maica; maitan'e temia epici to ongko to nooe'oca iesu ho poucufna muu, temu'sola asuhcu bitotonʉ.

² mimu acʉhʉ bochio, cuma na imza ieni to nooe'oca iesu ho po'pa'cohivneni muu.

³ 'o 'tohʉngʉ to hamo tesi 'ucia poa socofkoya muu, asansano o'ate yaa smoc'ou ci hi'hioa.

⁴ 'emo macicihi la acʉhʉ fiho no socofkoya ci peipeis'ausna ho atʉkca 'e iachi feango,

⁵ o'a mos'a i'mi no ma'cac'ou, mais'a 'ola o'te bohngʉ to hamo ci couyafana.

⁶ yonta mo maica ci hi'hioa, 'otes'a yaa 'oha einu tola toteuyunu hocieno yaa aaknuesu ci peipeis'ausna. omzacula mi'usni muu ho eʉsvʉta, yaeza engahva muu: 'atasi ahtao'te patvovei to hamo 'emo maica peis'epo ci cou.

⁷ ho isi epeiya to hamo a'to, o'atesi poa yunsou no 'ayumona no ca'i, ma tesi poa socofkoya a'to.

⁸ ko'koeno nala bʉʉpsʉpsʉ tamo maica ci mo'ma'cohio, o'amos'a bʉʉpsʉpsʉ ta cou, mamo bʉʉpsʉpsʉ tomo mofi to seilei muu ci hamo.

⁹ inacu yupa himngonghi ci hi'hioa, o'ate'o nama fii no tengami muu ho toʉsvʉsvʉtneni; ohsicu po'pa'cohivi to hamo na muu te mainenu na te hia yupa himngonghi,

¹⁰ mimu maezo maito hia mo'ma'cohio tan'e ho aʉt'ʉt'ʉca 'o afu'u sinto ne makitong. at'inghi maanat'ohaesa, te'on'aso eucufna muu ho asuhcu bitotonʉ,

¹¹ la bikoyu no noyʉyʉci 'e iachi, la iachi yaahioa ho iachia e'oca na h'oyunsova, aʉlʉ mais'a 'o niala hiamza mo'ma'cohio muu ne auyusi,

¹² te peelʉi poa einveni to o'ala tmaa'uzo ci cou na muu, maezo o'ate nama noe'ocʉ no to'usni no mocmo ci cou.

te i'vaho cmʉ'ho 'o nooe'oca

¹³ maanat'ohaesa, e'usnu to micu mcoi ci cou, imza tata'za ho cimu ake'a cohivi 'emo piyo ci hi'hioa, temus'ala angu ma'nanac'o. mais'a 'ola uk'a ta'usni ci cou.

¹⁴ imza taa'uzva 'o iesu mo mcoi ho smoevovei, ko'koeno taa'uzva 'o hamo tasila yaeza e'upi to iesu ho hafa 'o micu mcoi ci sinto.

¹⁵ maitan'e temza maito hia mo'ma'cohio to nooe'oca ho eʉsvʉta muu: 'e miton'a yaansou ci cou, no hiesi ho tena i'vaho cmʉ'ho 'o nooe'oca. o'ate auyuhe to micu mcoi ci cou ho yupteilʉ to nooe'oca.

¹⁶ maica, hotena afu'u mashʉyʉ 'o nooe'oca, i'nʉskʉ moozoyʉ 'o tensicoo, i'nʉskʉ muni 'o la'pa to hamo, te iachi i'mi ne pepe 'o nooe'oca ho ohpueho, ho mio; i'o mosola tmaa'uzo to kilisto hocu mcoi ci cou te auyu smoevovei.

¹⁷ acnguhu, 'e miton'a yaansou ci cou te acʉhʉ fiho ho tas'usna to cmʉcmʉ, yone pepe ho yupteilʉ 'o nooe'oca. ahoi tan'e tatocula 'auesiesi no'upu to hamo.

¹⁸ ko'koeno, temula boemi ta e'e tan'e ho yupa ao'pou.