tesalonike 1 3 - buacou seiso no faeva esvʉtʉ

¹ ko'koeno, o'anatemza 'aoko mooteo, petohʉyʉ ma'sansano ho a'cʉ'cʉnʉ yonta yaaten,

² temza popeoskuna 'o ohaesa ci temote ho poa uhta lamu yoni; 'e temote lamza toehungu nomio to hamo ho psoyaski to fukuin to kilisto. na atuhcusi ho imza popeoskuna tesi amamahtʉica ho to'usni na singkoomu.

³ poa o'te yaa i'mi no noa pohtutumza ho boevovei. imu cohivi, teto ahtao'te mia 'e pohtutumza eni.

⁴ ne mohto noteuyunu, omzacu ayoca eʉsvʉta muu na elʉ no pohtutumza ci hi'hioa. 'emo esmi maitan'e aʉlʉ totiski to ohola ta'eoyoca; na eni imu acʉha cohivi.

⁵ i'mi tan'e, ko'kocu popeoskuna 'o temote; 'anate'o 'aoko mooteo. ho os'o popeoskuna, akoeva no cohivi mionana atuhcu mainenu na singkoomu. o'a os'o taa'uzva hocisicu paspepecvazi no 'akuma na muu, ho poa 'afeungu na niala hioamza!

⁶ maitan'e, micu i'mi muu 'o temote ho yuovei; psoevoveiya na ʉmnʉ ci singkoo ho himngonghimu. isi eʉsvʉta ho lamu conino talʉa a'mi, tongsoyʉ no 'ucia aiti a'mi, totiski ho lamza tongsoya no 'ucia aiti muu.

⁷ ko'koeno, maanat'ohaesa, ho mimza yonta acʉcʉhʉ ci ngoveo ho 'atutumzo, i'mi no singkoomu ho elʉ no poucufnu.

⁸ hocimu yaa mahtʉicʉ ci singkoo to nooe'oca, temzacu a'ʉmtʉ sop'o ci 'tohʉngʉ.

⁹ temza peelʉi 'aveoveoneni to hamo na muu. ho temza 'aveoveoyʉ to hamo, mo maica ho imu'so poa kokaekaebʉ ho mimza yonto tuhcu to hamo.

¹⁰ lamza huhucmasi mi'usnu to hamo ho 'inoli, poa'so meelʉ iachi uhsica ho baito muu, ho topuhngi poa am'amso nala o'temocu amso no singkoomu.

¹¹ tesi'so iachia ptuceoneni to hamo - i'o amoto ta pepe ho ito nooe'oca iesu, poa meelʉ uhto lamu yoni na a'mi.

¹² tesi'sola poa yaa 'tohʉngʉ no yupa himngonghi ho yaa 'tohʉngʉ no ngohia 'e yatatiskova, a'vinano huhucmasi yusuhci, totiski ho lamza ma'cucuveu ho ngohia muu.

¹³ maicac'o, tesi poa ma'mahtʉicʉ muu, ho tenac'u cmʉ'ho 'o nooe'oca iesu ho i'o masisintosi, meelʉ yonto tuhcu to hamo ho cofkoya ho uk'a heo'tʉ.