tesalonike 1 2 - buacou seiso no faeva esvʉtʉ

yone tesalonike 'o poolo ho yaahioai

¹ maanat'ohaesa, imu iachia cohivi, ne momza uso ho baito muu o'aisis'a yainca uk'a ci a'a'ausnasi.

² imu cohivi, to auyusi ne momza uso muu, yone fuilipi momzacu elʉ to 'atutumzo, noa aokoe'iya. at'inghi isi fii to 'ʉteʉ to hamo a'mi, yontomo meoino yutasufka. imza peelʉi psoecʉ'ha muu 'e fukuin.

³ i'e lamza eucucufna o'a mos'a i'mi no peoupeou ho kuici koyu, maezo o'aimza 'ucia meknuyu na siya.

⁴ apuyu, isi taa'uzva to hamo a'mi. toveineni a'mi 'ete yaahioa no psoyaski ta fukuin, ko'koeno. lamzac'o pateafa 'o tesi poa pateafneni a'mi ci e'e, o'a lamza noa ʉmnʉa ta cou, lamzac'o noa so'eu'ʉmnʉa tola bʉhsʉftʉ ta 'ayumona ta 'tohʉngʉ ci hamo.

⁵ imu cohivi, ahoi to ahoisi o'amimza ahtu mi'usnu muu ho mo'engho nomo euteoteozu ci e'e, maezo o'amimza ma'sasoe ma'konvosʉ ci koyu; na eni tesi peelʉi 'akasineni to hamo.

⁶ o'a mimza noa emomoengʉa no cou. uk'a ci imza p'enza muu, maezo uk'a ci imza p'enza no mocmo ci cou.

⁷ ho eno feango no sitoo to kilisto a'mi, nte anana'o meelʉ mi'usnu muu ho noa einva; at'inghi ne momza no'upu muu, mimza mi'usnu muu ho bumama'cocacni, mais'a ino hola paun'u to 'o'oko.

⁸ akoeva no ngohia muu, o'a imza anova ʉmnʉa hocimu tma'upu tomo i'mi to hamo ci fukuin, ac'ʉha ta nsoumza temzac'o kaebeni hoci faeni muu, maica ina muu lamza songohia.

⁹ maanat'ohaesa, 'aimus'a ahtao'te talʉa, lea mainenu na lamza hia asno'zonʉ ngoseo yaahioa, mo nomio no o'te poa e'ecvʉhʉ muu ho temza psoyaski ta fukuin to hamo.

¹⁰ mi'usnu ta mimu sinto, 'e lamza e'e ho i'e peipeis'ausna la acʉhʉ cofkoya, ahmʉskʉ, ho uk'a 'o'emamzi no koica. ta tan'e, na muu ho i'o hamo 'ateeno acʉhʉ meelʉ 'akasi.

¹¹ imu cohivi, ho lamza mi'usnu ta mimu macicihi, la totiski no amo hola mi'usnu no iachi 'o'oko.

¹² lamza poucufna muu, ao'pova muu; lamza o'te tosveni eucucufna muu, la yono h'oyunsovamu ho noa ʉm'ʉmnʉa to hamo - isi eoho'a muu ho poa tma'upu no hpʉhpʉngʉ ho psoevohngʉsi.

¹³ leamza maezo asngʉcʉ 'aveoveoyʉ to hamo; maica 'o omzala psoyaska ci e'e, imucu talʉi hocu tiova, a'vinano o'a imu ta'unano moc'o tiou no e'e no cou, mamo tiou nomo a'ʉmtʉ i'mi to hamo ci e'e; maica i'o hamo mo yaahioa ta taico ta mimu tmaa'uzo ci cou.

¹⁴ maanat'ohaesa, 'eimu elʉa mo totiski to ihe elʉa to makikiokai to mia'usnu ne yutaya - i'omo tma'usnu to iesu kilisto ci sinto - lamu noa pohtutumza ta iachi 'oahngʉ, aʉlʉ totiski to ohela tiova ci pohtutumzo to iachihe 'oahngʉ to couyutaya.

¹⁵ i'o couyutaya ohe opcoza 'o iesu ho i'o mayoyongensa, ihen'a peobanga a'mi. mo yu'hango to hamo, maezo mihango ta yatatiskova!

¹⁶ ac'ʉhʉ no vomti hocimza mi'usnu to couyafana ho psoyaska 'ente meelʉ to'usnu to couyafana ci e'e. maicac'o, lahe o'te antʉha no sopuhngi 'o iachihe kuisi, at'oca nongcʉngci to kokuzo; isicueno cmʉ'hi to sʉ'no to hamo 'o feangohe.

mo tata'e no i'vaho uhto kiokai ne tesalonike 'o poolo

¹⁷ maanat'ohaesa, ho mimza akameosʉ ateno muu, mamoc'o ateno ta feango, na 'tohʉngʉmza o'amo ahtu ateno muu. lamza na'na taaecingia muu, tongsoyʉ no huvahi muu!

¹⁸ mimza na'no mici i'vaho uhto lamu yoni. na a'o - poolo o'a mo anouc'o i'nʉskʉ ho mi'o mici yuovei ho petpʉskeni muu, at'inghi isi vomti to satan a'mi.

¹⁹ muu na leamza ta'usni, zou 'aveoveoyʉmza. ho tac'u i'vaho cmʉ'ho 'o nooe'oca iesu, ina tamza epapaata'zeni ci tafange o'as'aeno muu?

²⁰ na muu asansano zou psoevohngʉ ho 'aveoveoyʉmia!