tesalonike 1 1 - buacou seiso no faeva esvʉtʉ

¹ zou poolo a'o; mimza toehungu 'e siila ho i'e temote tmopsʉ ta tengami ho pa'i'usna ta kiokai ta tesalonike - tomo tma'usnu to amohamo ho ito nooe'oca iesu kilisto ci masisinto. temu'sola acʉhʉ elʉ no mengumi ho soanono!

h'oyunsova ho singkoo to yane tesalonike

² lamza nomio muu ho asngʉcva 'aveoveoneni to hamo, conino e'upa muu ho lamza 'inoli,

³ yonto tuhcu to hamo ho talʉa, lamu yainenu na hia peiseafi 'o imu taa'uzva, yainenu na hia ieni no himngonghi ho asno'zonʉ yaahioa, yainenu na hia nomahtʉicʉ no 'tohʉngʉ ho mingeou to nooe'oca iesu kilisto.

⁴ maanat'ohaesa, imza cohivi isi ngohia to hamo na muu, isi epeiya muu.

⁵ ho imza psoecʉ'ha muu 'e fukuin eni, o'atec'o anou boemi no e'e, la maezo noe'ocʉ to tonʉ to seilei, a'vinano i'tohungu no a'sʉftonʉ tmaa'uzo to fukuin. mimu acʉhʉ bochio, mo mainenu na h'oyunsovamia ne momza la no'upu muu; acʉcʉhʉ coninoc'o inate koa ʉmnʉ muu na imza hioa.

⁶ mimucu momaemaezo a'mi, maezo momaemaezo to nooe'oca; mimu e'vono elʉ to meoino no 'atutumzo, mimuc'on'a yono isi pafeni to seilei ci 'aveoveoyʉ ho tiou ta fukuin.

⁷ i'mi tan'e, ihecu huomza no singkoo to sinto ne makitong ho 'akaiya.

⁸ i'o fukuin to nooe'oca o'amo anou i'mi muu ho psoecʉ'ha ta makitong ho 'akaiya, na singkoomu no mi'usnu to hamo yaeza psoecʉ'ha tamo cum'u ho covhi ci hpʉhpʉngʉ; na eni a'ʉmtʉ o'a temia nama 'aoko eman'i.

⁹ ihe toehunga epeaska: ne momza uso ho baito muu, 'o nia hiamu aʉt'ʉt'ʉca a'mi, mo mainenu na hiamu mongoi to uacoua ho miezuhu to hamo, fifiho tomo a'ʉmtʉ ho yaansou ci hamo,

¹⁰ a'vinano mingeovi 'o okosi ci iesu hocic'u i'mi ne pepe ho ohpueho. i'e iesu eni. 'ai'oeno 'o ohsi i'mi no mcoi ho poa smoevovei to hamo ci ic'o; isi poa mongoi note esmi ci sʉ'no to hamo na a'to.