temote 2 4 - buacou seiso no faeva esvʉtʉ

¹ yono tuhcu to hamo ho itote yʉsvʉtʉ tomo afu'u yaansou ho mcoi ci kilisto iesu, ieni hote aopa'to ho ito atuhcusi tonʉ, te'o bueeutotaveiya suu:

² la psoyaska 'e fukuin, 'upena hoci auseoseolʉ ho o'te auseoseolʉ na hie la asno'zona psoyaska, boemi no someoisa ci luaveica ho eucucufnu, kokoicʉ, poucufnu, mo'ma'cohio.

³ ho tac'u cmʉ'ho na hiesi, ho mio 'e cou tahe hose'veni 'emo yutataso ci mahsʉsʉftʉ, mee'ofeihni to iachi ma'konvosʉ, 'akikieingi biebimi no lema'cohio, ko'ko poa ma'mamso 'omo soe'os'o ci koyuhe.

⁴ lahe tʉmʉta 'o koyu ho o'te tmalʉ ta so'emio ci e'e, namala toh'unuhe to e'ankʉ ci ehohamva.

⁵ inacu suu, 'upena hoci yono mo mainenu ci a'a'ausna la asngʉcʉ bumemealʉ; la uveica na 'atutumzo, ho hioa nante anana'va hioa nola lepsoyaski, conci 'tohʉngʉ ho pee'ofeihni na teko hioa ho miko fifiho.

⁶ inacu a'o, micu esmi 'e hiesi no ciha 'e iachi; maitan'e zoucu hiesi no mongoi ta tiskova.

⁷ i'omo 'aseolʉ ci yupania toosa'o no peayofʉ, o'ucula toe'ofeihna; i'onte'o anana'va toemizi ci ceonʉ, os'ocu toepaezuma; 'ente noyʉci ci singkoo, os'ocu noyʉyʉci.

⁸ ahoi maitan'e no ataveisi, isi totea no moulʉlʉ ci tafange a'o, 'ai'oteeno boemi no moulʉlʉ ho hioa na yʉsvʉtʉ ci nooe'oca, tasi pafeni a'o no hiesi ho tena i'vaho cmʉ'ho 'o kilisto, o'atesi anova pafeni a'o. tesi yaeza pafeni tola tata'e hote aopa'to ci cou.

eutotaveineni 'o iachisi hi'hioa

⁹ teko pnanfi aupcio uhtan'e.

¹⁰ mo ma'tata'e ta hpʉhpʉngʉ 'o tima, mongoi a'o hocu uhne tesalonike. mo uhne ngalatea 'o kolosu, uhne tamatai 'o tito,

¹¹ i'oc'o luka 'omo no'upu a'o. teko usa ho i'ima 'o maluko, engocha uhtan'e, maica tesi peelʉi to'usni 'o la'u hioa.

¹² os'ocu popeoskuna 'o tuiciku ho poa uhne 'epeso.

¹³ ho tako uhtan'e. neisu ne toloya ho yaa 'o o'u teongasi to emoo to kapu ci yʉsʉno aoskopa ho hafa uhtan'e; panto mo piyo ci tposʉ, afnaso 'o mo piyo ci tposno feo'u yaeza e'upi.

¹⁴ 'o lemuutu meemeno ci 'alisanta isi na'na akuzkuzoa a'o; 'o nooe'oca tasi yaito isi hioa ho auska.

¹⁵ tekola yaeza etngoeva, maica ho isi itotonveni yutasufka 'o ito psoyaska ci e'e.

¹⁶ ne o'u ahoza ehcʉvheni 'e iachi, uk'a ci moso no'upu a'o, cu acʉhʉ mongoi a'o. tesi'so o'te 'ahʉya topci no kuisi to hamo!

¹⁷ la bichipi to nooe'oca ho e'oca a'o, fii to tonʉ a'o, ho a'sʉftona psoecʉ'ha to couyafana 'e fukuin; mo'u maezo i'mi to ngayo to e'uho ho noa to'usni.

¹⁸ 'atasi ahtao'te to'usni to nooe'oca a'o ho poa momeesih'i no acʉcʉhʉ ci kokuzo, tiova a'o ho poa soanono ho uhto hpʉhpʉngʉsi. 'auesiesi'sio no'usnu to nooe'oca na psoevohngʉ! 'aamen.

sotavei ci tuayokeo

¹⁹ mi'usnu to paicila, 'acila, ho ito conoemoo to 'anisifo ho tuayokeoneni a'o.

²⁰ 'o 'ilatu cu nochʉmʉ ne kolinto. 'o tolofuimo mo tma'congo, os'o poa nongaco ne militu.

²¹ teko pnanfi esmi no auyusi no hosoyʉma. mo acʉhʉ mi'usnu suu ho tuayokeo 'o yopulo, puten, linu, kolautia, ho i'o mocmo ci maanat'ohaesa. mo acʉhʉ mi'usnu suu ho tuayokeo.

²² no'upi'sio to nooe'oca na suu! na mengumi to hamo pafi'sio muu!