temote 2 3 - buacou seiso no faeva esvʉtʉ

puesona ta hpʉhpʉngʉ

¹ teko cohivi, no puesona ta hpʉhpʉngʉ tena yaa mav'ov'o ci 'atutumzo.

² ho mio, 'e cou i'ec'o iachi nate aʉt'ʉca, ma'konvosʉ no yupasʉ, efnaso, bobitano, ekuzkuzo, yutasufku no maameoi, luema'payo'ʉ no mengumi no mocmo, 'oha acocofkoya,

³ uk'a na'oahnga, peispapak'i, kaebʉ buusumsu, moezʉezʉhʉ. pak'i, himsʉ'no no mou'ʉmnʉ.

⁴ lahe phieni 'o tauke ho nanghia, peis'ankʉ, 'o'efnaso, na kokaebʉ eabobonʉ mo nosa'ohe no himngonghi to hamo.

⁵ la sikuhcu ta yʉsʉno siukio, bʉʉpsʉpsʉ no a'ʉmtʉsi ta siukio. 'emo maica ci cou, temula totoefʉngi.

⁶ ta 'ayumonahe pantola yupopaezumo to phingi to mocmo, yʉmeʉmʉ to emoo to cou, topani 'ola 'oha taso 'o 'tohʉngʉ, ho noa skotpʉta to kuisi ho ito mav'ov'o ci ma'konvosʉ ci maamespingi.

⁷ 'emo maica ci maamespingi la e'vono mici asno'zonʉ momaemaezo nomo ʉmnʉ, at'inghi o'anamo meelʉ bohngʉ to so'emio.

⁸ mo mais'a ne noana'o i'o yaani ho yampulei moso mainenu na hia yutasufku to moose, maitan'e 'emo maica ci cou mioc'o totiski ho yutasufku to so'emio. mo ton'on'o 'o 'tohʉngʉhe, o'anamo yaa tonʉ no tiou no hʉsvʉta na singkoo,

⁹ o'a nate i'vaho yaa a'a'ausna; maica i'o peisloʉngʉhe tena acʉcʉha hupopayoi tamo botngonʉ, totiski to yaani ho i'o yampulei.

sotavei ci pahsʉsʉfta

¹⁰ at'inghi, mikocu mee'ofeihni ta hia'u mo'ma'cohio ho ita la'u h'oyunsova, momaemaezo ta la'u peipeis'ausna, singkoo, ma'cocoyʉ, himngonghi ci 'tohʉngʉ, luaveica,

¹¹ a'vinano e'paevai ta os'o tiova ci akuzkuzo ho 'atutumzo. osko acʉha cohivi 'o os'o yupteilʉneni ho uveica ci akuzkuzo ne mo'u yone 'antia, 'ikonen, ho ine lusuto; at'inghi, isi to'usni to nooe'oca a'o ho poa momeesih'i ta acʉcʉhʉ tan'e.

¹² namo afu'u bikoyu no to'ofeihni to kilisto iesu, mino mo einu ci h'oyunsova ci cou, la acʉhʉ yupteilʉ no akuzkuzoa.

¹³ i'ola kokuzo ci cou ho i'ola lolekoknuyu te huhucmasi ausuhcu kuzo; la meknuyu to mocmo, lea maezo noa peknui.

¹⁴ inacu suu, teko noyʉyʉci 'o osko tiova ho ta'sansana ci so'emio. osko cohivi zou siya na lema'cohiosu;

¹⁵ osko yaeza talʉa miko ahoi ne mosun'a oko ho bochio to seiso, 'ai'oeno tposʉ cimo mofi no moutʉs'ʉ ho pahceoceoni suu, ieni to tmaa'uzo to kilisto iesu ho ko'ko mayo no to'usnu.

¹⁶ acʉcʉhʉ 'e seiso mo tiou no piepiya to hamo ho tposi, homo ma'cohio ta so'emio, koicʉ no epeu, esngʉcvi namo emo'epo, ma'cohio no emio ci ceonʉ, mo acʉhʉ yaa ʉmnʉsi.

¹⁷ tesi poa a'sʉftonʉ ae'ayocʉ 'ela fifiho to hamo ci cou, meelʉ peismi no mav'ov'o ci ʉmnʉ ci hi'hioa.