temote 2 2 - buacou seiso no faeva esvʉtʉ

maotano to heetai to kilisto

¹ oko'u, teko ieni to isi faeni to kilisto iesu ci mengumi ho yumamahtʉicʉ.

² miko yonto ihe mi'usni tamo botngonʉ ci mo 'akasi ci cou ho tiou ta os'o po'pa'cohivneni, nteko yaeza toveineni no osko taa'uzva cite meelʉ mo'ma'cohio no mocmo ci cou.

³ ho isieno yainca zou maotano to heetai to kilisto iesu, teko e'paevai no 'atutumio.

⁴ 'emon'a ahoi heetai hoci akoyu no mici noa ʉm'ʉmnʉa no taicinisi. o'ate ʉmnʉ hoci poa taip'ʉcneni no hi'hioa ta yafana.

⁵ 'emo toosa'o no mayahe ci cou ho mo seolʉano toosa'o hoci o'te meot'ʉcʉ no h'oesvʉta o'ate meelʉ mayo no hnoo.

⁶ 'ela peisngoseo no emʉemʉm'ʉ ci leyaezoi nte anana'o auyu bonʉ no isi tov'oha.

⁷ teko ta'to'tohʉngva 'e e'e'u. maica tesi ahtao'te poa ta'hongneni suu to nooe'oca 'e acʉcʉhʉ ci hi'hioa.

⁸ teko talʉa 'o iesu kilisto, zou mʉntʉ'ca to tavite, 'o hamo isi poa i'mi to mcoi ho smoevovei; 'aeno eni 'e os'o psoyaska ci fukuin.

⁹ mi'o i'mi no psoyaska 'e fukuin eni ho tiou ta 'atutumio, ac'ʉha no noa seo'eisi, totiski tomo yaa kuisi, at'inghi, na e'e to hamo o'ate peelʉi seo'eisi.

¹⁰ i'mi tan'e, mi'o nomio to isi epeiya to hamo ci 'o'okosi ho uveica 'e acʉcʉhʉ, te ko'ko peelʉi poa maezo mayo tomo i'mi to kilisto iesu ci to'usnu ho 'auesiesi ci psoevohngʉ.

¹¹ 'e e'e ta oi'isi te peelʉi noe'oci: hoci mitocu tu'upu to kilisto, teto maezo i'upu to kilisto ho yaansoua.

¹² hocito apaezumo buveici, teto maezo ti'upu no tonʉ to kilisto. hocito meoo'te honga 'o kilisto, tasila yaeza o'te honga a'to.

¹³ hoci to payo'a na tmaa'uzo, 'o kilisto teec'o asngʉcva tae'oci, maica o'atesi yuszoza na iachi.

noa e'ʉ'ʉmnʉa ci soskuskunu

¹⁴ teko poutʉs'ʉa 'o botngonʉ, yono tuhcu to hamo ho bumemeala pahsʉsʉfti: 'otela yupa 'eehcʉvho no e'e; 'omo maica uk'a ci ake'isi koa ʉmnʉsi, tec'o at'inghi koakuzo tamo tmalʉ ci cou.

¹⁵ la asno'zonʉ yonto tuhcu to hamo ho meelʉ masvo'ho no bʉhsʉftʉ, o'te ma'kokoe'i ci soskuskunu, etuhca ho tekola eʉsvʉsvʉta 'o so'emio ci e'e.

¹⁶ la totoefʉngʉ tola eloʉngʉ ho e'ankʉ, maica 'emo maica ci e'e lac'o poa ausuhcu emomcovhi to hamo 'e cou;

¹⁷ i'o lahe engha mo mais'a 'ola koa ton'on'o ta fou ci h'oh'o. to taico ta cou tan'e mo no'upu 'o suminai ho i'o fuilitu;

¹⁸ mo mongoi ta so'emio, yainca micu noana'o ci hi'hioa na smoevovei, i'mizi no taot'ova 'o singkoo tomo 'enepio ci cou.

¹⁹ at'inghi, i'o ohsi p'eyac'a to hamo ci mo mahtʉicʉ ci totnguca o'ate ahtu tmaot'ou; to bako ta totnguca tan'e panto isi tposi: . isi yaeza tposi:

²⁰ i'omo atngaso ci emoo la man'i ci macucuma, o'amo anouc'o yaa king, nging, maezo yaa macucuma no evi, macucuma no ceoa; pantola titheni to afnasa ci hi'hioa, panto lac'o titheni to h'oyunsova.

²¹ hoci meelʉ iachi acocofkoya 'e cou, mongoi no kokuzo ci hi'hioa, 'atesi ahtao'te meoino titha to nooe'oca; maica ho isicu sʉ'teni to nooe'oca, noa meoino titha to nooe'oca, hioa na mav'ov'o cimo ʉmnʉ ci hi'hioa.

²² 'ote mais'a 'o yu'fafoinana ho maemayahe ci koyu; la fihohe tola cofkoya ci 'tohʉngʉ, conino noa to'usnu to nooe'oca ho toehungu biebimi no moulʉlʉ, singkoo, himngonghi, ho moususeomʉ.

²³ la bʉʉpsʉpsʉ tola enongonongo ci eehcʉvho; teko cohivi, 'emo maica ci eehcʉvho la lua i'mizi no koa youbobai.

²⁴ na soskuskunu to nooe'oca o'ate eyobai; nte ma'cocacni hola mi'usnu to cou, asno'zonʉ mo'ma'cohio, aa'pucu buveici.

²⁵ boemi no ma'cocacni ho eʉsvʉsvʉti 'ola mihango suu. saho'oa tesin'a fii no tesi hia ma'vovei to hamo, poa bohngʉ no so'emio.

²⁶ maicac'o, e'vono ohsila tʉtpʉta no 'akuma ho 'ahʉya poa meo'uzo, tenaeno o'te ma'tʉtʉs'ʉ, tenala maezo peihsasmome, i'mi no keʉpʉ no 'akuma ho tomeesih'i.