temote 2 1 - buacou seiso no faeva esvʉtʉ

¹ zou poolo a'o; mi'o i'mito 'tohʉngʉ to hamo ho sitoo to kilisto iesu, ho psoevaha 'o ohsi ieni to kilisto iesu ho teomneni ci faeva ci nsou.

² te'o tmopsʉ ta tengami ho faeni suu - songohia ci oko'u temote: pafeni'sio suu to amohamo ho ito nooe'oca kilisto iesu na mengumi, himcocoveoi, soanono!

'aveoveoyʉ ho eucufnu

³ te'o 'aveoveoyʉ to hamo, 'ai'o la'ueno totiski to nia maameoi ho boemi to cofkoya ho ʉmnʉ ci 'tohʉngʉ ho p'ohkui ci hamo. yonto la'u huhucmasa 'inoli ho conino taaecingia suu,

⁴ cono hola'u talʉa 'o esʉʉsu ne tetocu yupepeevai, ta'ucu na'na 'ucia aupcieva aiti suu. hoci'u aiti suu; te'o ahtuo'te a'sʉftonʉ kokaekaebʉ.

⁵ os'o talʉa 'o a'ʉmtʉ cofkoya ci singkoosu, 'ai'omoeno mais'a singkoo to ba'isu ci looi ho ito inosu ci iuniki. 'o singkoohe, os'o taa'uzva 'amo ahtuo'te maezo yayo suu.

⁶ ko'koeno, te'o poutʉs'ʉa suu: i'o ohsi faeni to hamo ci mengumi ne o'u hoe'oci suu, tekola poa mais'a puzu ho yunzou ho o'te afsi.

⁷ maica, na isi faeni a'to to hamo ci piepiya o'a tesi poa t'oe'ʉya a'to; apuyu, 'o piepiyasi tesi a'sʉftona poa yaa tonʉa, himngonghi, ho ma'tʉkcʉ a'to.

⁸ i'mi tan'e, 'atekos'a ta'unano isi h'oinveni ci hi'hioa ho teko 'akasi 'o nooe'oca, yaeza teav'a h'oinveni ho mi'o nomio to nooe'oca ho noekotu. teko maino isi faeni to hamo ci tonʉ, nomio ta fukuin ho e'to'usnu no 'atutumio.

⁹ isi to'usni to hamo a'to, eyoho'a a'to ho ta'okoa, o'amos'a i'mi no panos'a ʉmnʉ ci lato peipeis'ausna, mamo i'mi no 'tohʉngʉsi ho ino mengumisi. ohsicu la ahoza ne noana'o ho ieni to kilisto iesu ho faeni a'to 'e mengumi eni,

¹⁰ maitan'e mo i'mi homo cmʉ'ho 'o leto'usnu ci nooe'oca kilisto iesu hocu peispa'teni. 'o kilisto isi aapayo'a na tonʉ no mcoi, asuhca ieni ta fukuin ho epa'teni 'o o'ate aapayo'ʉ ci nsou.

¹¹ nomio ta fukuin tan'e, isi skuna to hamo a'o ho lepsoyaski, sitoo ho lema'cohio.

¹² i'mi tan'e, ko'ko mi'o tiou tamo maica ci 'atutumio. at'inghi, os'oc'o asngʉcva ta'sansana taa'uzva; maica os'o cohivi mi'o noe'ocʉ no siya, yaeza ta'sansana tesi noyʉci 'o isi toveineni a'o. ac'ʉhʉ no hiesi ho tena yuovei 'o nooe'oca.

¹³ tekola noyʉyʉci 'o o'ula faeni suu cimo yoayokeo ci e'e, teko teyai p'ofiha, yaeza noyʉyʉci 'o ito yaa ci singkoo ho himngonghi ho mito yuecnguhu to kilisto iesu.

¹⁴ la ieni tomo yonta 'tohʉngʉto ci seilei ho tʉyʉca 'o isi toveineni suu cimo yonghu ci e'e.

¹⁵ osko cohivi, 'omo yone 'aziasoo ci cou mo acʉhʉ mongoi a'o, a'upu 'o fuicilu ho i'o heimocini.

¹⁶ tesi'so coveoza to nooe'oca 'o conoemoo to 'anisifo, maica isi siho poucufna a'o, poa ma'eayokeo a'o. o'a isi h'oinveni ho mi'o noekotu,

¹⁷ ne micu sʉc'ʉhʉ ne looma isi osnia eukukuyungva a'o, petohʉyacu elʉa.

¹⁸ poa'so elʉ no himcocoveoi to nooe'oca no hiesi ho mio! i'o ohsi hioaneni a'o ne moso yone 'epesocimo man'i ci hi'hioa, osko asansana cohivi.