temote 1 6 - buacou seiso no faeva esvʉtʉ

¹ i'ola ngoe to ngotohva ci soskuskunu, ntela einva 'o iachi tauke, ci tehes'a 'o'emamzi no cou ho ekuzkuzoa na ongko to hamo ho i'o lamza hia mo'ma'cohio.

² hoci zou sinto na tauke, 'e soskuskunu 'ote i'mi ho zou'so maezo sinto ho 'oha koe'ia, la apuya h'unasa asno'zona aʉt'ʉt'ʉca, maica inamo tiou no koasi ʉmnʉ homo aʉt'ʉt'ʉcʉ 'aeno 'o isi ngohia ci sinto. nteko pahsʉsʉfteni ho eucucufna 'emo maica ci hi'hioa:

meknuyu ci eʉsvʉsvʉtʉ ho a'ʉmtʉ ci yuyupasʉ

³ hoci panola psoyaski nomo h'unasi ci e'e, ho o'te toseolʉ ta mo yuayayokeo ho einu ci e'e to nooe'oca iesu kilisto,

⁴ 'amoeno bobitano ho bimeoisi, mo a'sʉftonʉ nongonongo. 'emo maica ci cou la kokaebʉ micic'o yupa eehcʉvho, 'o'esvocʉ tamo macoconci tposʉ, mooyai i'mizi no smo'eubut'u, youbobai, ekuzkuzo, totmaakoknuyu,

⁵ ec'ʉvi 'ola mipeyu 'o 'tohʉngʉ, ho payo'ʉ to so'emio ci cou ho koa o'te tosvo yupa 'eehcʉvho. to 'tohʉngʉhe, 'e siukio mac'o ceonʉ no ma'eayupasʉ.

⁶ 'aeno a'ʉmtʉ. 'emo cihi ci cou hoci ma'mamso, tesi a'ʉmta poa atngaso ta siukio.

⁷ ho mito uhta hpʉhpʉngʉ, uk'a ci ito hafa ci cuma; ma cuma na nteto hafa mongoi ta hpʉhpʉngʉ?

⁸ hocitola maka yaa ana, yaa paceofa, 'antec'ueno ma'mamso.

⁹ i'ola micic'o yuyupasʉ ci cou la supeohʉ to ma'pepecvai, noa tʉtpʉta to man'i ci nongonongo ho ito te koa kuzo ci ma'kokonvosʉ, ataveicu sʉhcʉ'o ho meaapayo'ʉ.

¹⁰ zou 'oi'miza no mav'ov'o ci kuzo 'e konvosʉ no yupasʉ. pantola nomio no konvosʉ to yupasʉ ho pef'uhu to singkoo, nongcʉngci to ma'tutumzo ho poa auz'oz'o 'o piepiya.

eʉsvʉsvʉti 'o temote

¹¹ inacu suu, lasi atuhca titha to hamo ci cou, la totoefʉngʉ ta acʉcʉhʉ tan'e. e'ofeihni no moulʉlʉ, einu, singkoo, himngonghi, luaveica, ho ma'cocacni.

¹² yonta yupa toosa'o no singkoo ho pnanfi na tonʉ ho peayofʉ, yaeni no 'auesiesi nsou 'e iachi; 'amoeno nomio ta isi mituhci tan'e, miko noa eoho'a to hamo, yonta tuhcu tamo botngonʉ ho apa'ta esansana 'omo yonghu ci singkoo.

¹³ a'ʉmtʉsi, ne mosola mi'usnu to pangsiu pilato ho 'akasi 'o kilisto iesu, mosola maezo yaa totiski ci yonghu ci mahsansano. yonto tuhcu to mosola mofi no nsou ta aʉcʉcʉhʉ ci hamo ho ito iesu, te'o eucufna suu:

¹⁴ la meot'ʉt'ʉcʉ, uk'a 'o'emamzi no koica ho pee'ofeihni 'e osko tiova ci mashʉyʉ, ac'ʉhʉ no hiesi ho tac'u aopa'to 'o nooe'oca iesu kilisto.

¹⁵ ho tac'u toc'ʉha na hiesi tasi poa aopa'to to hamo; 'o hamo tee peelʉi tohmomoengʉi, zou cihic'o ho soyaatonʉa, honte to mahohonte, nooe'oca to manonooe'oca.

¹⁶ i'oc'o hamo na o'ate kuzo ho aapayo'ʉ. mo yonto o'ate peelʉi ohcum'a ta cou ci tiskova; uk'a mocu ci mosola baito ci cou, maezo o'ate peelʉi aiti ta cou. na taotofsi'i ho 'auesiesi ci tonʉ te no'usnu to hamo! 'aamen.

¹⁷ mi'usnu tomo atngaso ta maitan'e ci cou, tekola engahva ho o'te poa bitano. nala ta'usni teav'a toe'ocneni ta o'ate peelʉi noe'oci ci yupasʉ, la noe'ocʉ tomo mofi ta at'otngaso ci macucuma ho poa titheni a'to ci hamo.

¹⁸ teko eucucufna ho poa popeis'ʉ'ʉmnʉ, lua peismi no ʉmnʉ ci hi'hioa, mealʉ ho luetato'usnu, conino to'usnu.

¹⁹ maicac'o, ihecu a'pʉ'pʉneni no yupasʉ 'e iachi, p'eac'eni no bʉʉlʉlʉ ci te i'tohungvi ho noana'o, peelʉi tʉyʉca na nsou, 'ai'oeno a'ʉmtʉ nsou.

²⁰ temote, teko bumemeala tiʉt'ʉca 'o osko tiova ci eutotavei. la totoefʉngi 'ola 'oha einu ci e'ankʉ ho i'ola i'mizi no yupa eehcʉvho ci lahe yainca .

²¹ pantola ma'unano micu'so yaa maica ci mau'to'tohʉngʉ, hocu payo'a na mi'ausna no singkoo. na mengumi to hamo pafeni'sio muu!