temote 1 5 - buacou seiso no faeva esvʉtʉ

e'usnu note sviei ta sinto

¹ 'otela kokoicʉ to mamameoi; la eucufna mais'a iachi amo. mi'usnu to yu'fafoinana la mais'a nanat'ot'ohaesa;

² mi'usnu to mamameoi ci maamespingi la mais'a mi'usnu no ino; mi'usnu to mon'a foinana ci maamespingi la yaa cofkoya ci 'tohʉngʉ, mais'a nat'ohaesa.

³ la einva 'o mon'a tuvcongʉ ci mamespingi.

⁴ hoci pano 'o'oko hocieno mʉntʉ'casi, 'emo maica cimo yutotavei te yonta emoo ho auyun'a momaemaezo no tela hia meot'ʉt'ʉcʉ, poa evei no amo ino ho ito ak'i ho ba'i, maica na eni lasi ʉm'ʉmnʉa to hamo.

⁵ i'o lan'a tuvcongʉ ci mamespingi, la uk'a noe'oci ho yohcoi, lac'o mingeou to hamo, huhucmasi 'inoli ho noa to'usni.

⁶ i'o lac'o ma'nou no ma'unu no eabobonʉ ho 'aveoveoyʉ ci mo tuvcongʉ mamespingi, e'vono mion'a yaansoua. na a'ʉmtʉsi micu mcoi.

⁷ teko po'pa'cohivi 'emo maica ci mamespingi, ci tes'ala noa koica.

⁸ hoci panola o'te aʉt'ʉcʉ no 'oahngʉ, aavaho ina yano iachi emoo, micu pef'uhu no singkoo, kuzohe to o'amo tmaa'uzo ci cou.

⁹ e'usnu no tposi namo tuvcongʉ ci mamespingi, te ahoza no tomonmʉha niantec'u tposi no tposʉ; ahtuo'te mosoc'o i'nʉskʉ mevcongʉ,

¹⁰ a'vinano asansano yaa popeislʉlʉ ci ongko, maihoci: meemealʉ aʉt'ʉcʉ no 'o'oko, aʉt'ʉt'ʉcʉ no la i'mocovhi, tocaphʉ to sinto, ec'ʉ ho to'usnu tola akokameosʉ 'atutumzo, pnanfi na tonʉ ho peismi tomo mav'ov'o ʉmnʉ ci hi'hioa.

¹¹ i'ocu mon'a foinana ci mo tuvcongʉ ci mamespingi, teav'a tposi no tposʉ; maica holan'a ma'cac'ou 'o 'tohʉngʉhe, lua mongoi to kilisto ho mici i'vaho mevcongʉ,

¹² la pef'uhu to nia esvʉtʉsi, i'mizi no mayo no kuisi.

¹³ a'vinano la at'ocʉ lue'amamza, smaicacni to maemoemoo ho ne'neisu. 'omo asuhcuhe kuzo, la buusumsu, enou to o'ante pateafa ci e'e.

¹⁴ ko'koeno, os'o ʉmnʉahe hoci mevaho mevcongʉ 'emo tuvcongʉ ci mon'a foinana ci mamespingi, yaa 'o'okoa, aʉt'ʉca na iachi emoo, poa o'te yaa 'eo'eongʉ no pohcinghi 'ola mihango a'to ci cou.

¹⁵ maica panto micu piyo ci mo tuvcongʉ ci mamespingi mo mongoi to nia ahoihe 'tohʉngʉ, mee'ofeihni to satan.

¹⁶ ta emoo ta sinto hoci yaa tuvcongʉ ci mamespingi, tela aʉt'ʉt'ʉca, teav'a tomakneni to kiokai na cvʉhʉ; maicac'o, 'e kiokai te peelʉi aʉt'ʉca 'omo a'ʉmtʉ uk'a noe'oci cimo tuvcongʉ ci mamespingi.

¹⁷ 'ola meemealʉ eahahafo ci macocoolo, aavaho 'ola afnaso bitotonʉ no eʉsvʉsvʉtʉ ho mo'ma'cohio, nte mayo no apuhngu ci evei.

¹⁸ maica isi yainca to seiso: ; i'vaha yainca:

¹⁹ hoci panomo ehpʉngʉ to coolo ci hi'hioa, hoci o'te mako yoso tuyu nante soomei ci cou, o'ate 'ahʉya cumasa.

²⁰ la apa'ta koica 'ola afu'u peiskuzkuzo ci cou, te ko'ko maezo tohayo 'o 'tohʉngʉ to mocmo ci cou.

²¹ te'o yonto tuhcu to hamo, kilisto iesu, ho ito isi epeiya ci matetensi, bumemeala eutotaveiya suu ho pee'ofeihni 'emo maica ci hia mahsʉsʉftʉ, 'otes'ala yaa ma'cachi ho ma'peu ci 'tohʉngʉ ta mo mav'ov'o ci hi'hioa.

²² 'ote 'aʉnpʉnpʉ meehoe'ocʉ ta cou. 'ote mea'upu no kuisi no mocmo; la noʉyʉci 'e iachi cofkoya.

²³ maica si feangosu mo yaa tma'congoa, 'ote penou no chumu, la maezo ake'i mimo to emi.

²⁴ pantola nopopayo ho husansana 'o kuisihe, ihecu noana'va tiova na yʉsvʉtʉ; pantola aopoha'va hupopayoi 'o kuisihe.

²⁵ totiski, la lua hupopayoi 'omo popeis'ʉ'ʉmnʉ, 'upena hoci o'te nopopayo o'ate peelʉi efʉnga.