temote 1 4 - buacou seiso no faeva esvʉtʉ

meknuyu ci lema'cohio

¹ cu esansana to seilei, no puesona ta hie, panto tena mochi to singkoo, ho mee'ofeihni to piepiya no meknuyu ho ito e'e to 'akuma.

² 'emo maica ci e'e mo i'mi to lasi ti'a'ausna to totpiei; i'o nia ʉmnʉ ci 'tohʉngʉhe mais'a isicu tomcozi no fkʉngeo ci meemeno.

³ lahe potani hoci yupa totovcongʉ; potani hoci bonʉ no cuma, at'inghi ho ohsi teyai to hamo 'e 'oanʉ eni 'aisieno faeni ta mo bochio no so'emio ci cou ho poa boemi no 'aveoveoyʉ ho ana.

⁴ 'e isi afu'a teyai to hamo mo acʉhʉ ʉmnʉ, nte acʉha titheni no 'aveoveoyʉ ho tiova, o'ate hopsʉpseni.

⁵ maica 'e e'e to hamo ho i'e 'aveoveoyʉ ta cou isicu poa cofkoya 'emo maica ci 'oanʉ.

ʉmnʉ ci soskuskunu to kilisto iesu

⁶ hociko pa'cohivneni to maanat'ohaesa 'e hi'hioa eni, mikocu ʉmnʉ ci soskuskunu to kilisto iesu; a'vinano inamo yaa singkoo ci e'e ho i'o lako asonghoza fihi ci mo emzo ci ceonʉ tesi to'usni na piepiyasu ho poa yusuhci.

⁷ i'ocu 'o koacuma engha cimo e'ankʉ ci ehohamva te ʉmnʉ hoci totoefʉngi; la nomio no einu ci h'oyunsova ho poa biʉsvʉsvʉtʉ 'e iachi.

⁸ mioeno o'te yaa koa ʉmnʉ ho isi poa biʉsvʉsvʉtʉ 'e feango, 'e biʉsvʉsvʉtʉ ta piepiya te mav'ov'o i'ote koa ʉmnʉ suu, maica tesi hafneni no ta'usni ta maitan'e ho noana'o.

⁹ 'e e'e eni te peelʉi noe'oci, peelʉi a'sʉftona tiova.

¹⁰ i'mi tan'e, lamza asno'zonʉ ho ngoseo, nala ta'usni la toveineni to no'auesiesi ci hamo; zou nooe'oca ta yatatiskova. afnaso leto'usnu tamo tmaa'uzo ci cou.

¹¹ teko pahsansana 'emo maica ci hi'hioa, po'pa'cohivneni.

¹² teav'a poa hupotfʉngneni no cou ho mikon'a foinana. 'upena na pat'a'ausna, peipeis'ausna, himngonghi ci 'tohʉngʉ, singkoo, ho acocofkoya, 'emo mav'ov'o, la acʉha teyaineni no tehe hu'ofeihni ta sinto.

¹³ tekola tvaezoya no mo'engho ta seiso, evaho, ho mo'ma'cohio, ac'ʉhʉ ho ta'ucu esmi.

¹⁴ teav'a peaezoni 'e osko elʉa cimo no'usnu no piepiya ci mengumi; 'e mengumi eni isi ieni no ohela eyoca to eyongensa ho ine ho ohe hoe'oci to coolo ho pafeni suu.

¹⁵ tekola mimhocni ho hioa eni, poa honganeni tamo botngonʉ na lako hia ohsuhcu.

¹⁶ tekola iachi bumemealʉ, maezo bumemealʉ to lako hia mo'ma'cohio. la yaa peishʉhʉyʉ ci koyu ho yaahioa; maicac'o, teko to'usni si iachisu, ho yaeza to'usni namo tmalʉ ci cou.