temote 1 3 - buacou seiso no faeva esvʉtʉ

so'ehti ta kiokai

¹ 'e e'e eni te peelʉi noe'oci. pantola mainca: siya nate ma'koyu no so'ehti ta kiokai 'aeno siya nala tata'e no yonghu ci hioa.

² na so'ehti ta kiokai. la asansano uk'a 'o'emamzi. tec'o cihi na vcongʉsi. hola mi'usnu to mocmo la eyʉyʉcʉ, peelʉi atʉkca 'e iachi, suce 'o h'oyunsova, smoekaebʉ aʉt'ʉcʉ tola i'mocvihi. la meemealʉ mo'ma'cohio,

³ o'ala voemi, o'ala eyobai, ma'cocacni ci yu'ausna, o'ala ma'konvosʉ no yupasʉ.

⁴ la meemealʉ asusuce ta iachi emoo, poa bochio no meot'ʉt'ʉcʉ na 'o'oko, aa'pucu einu.

⁵ 'emo cihi ci cou hoci o'te cohivi na asusuce ta iachi emoo, nteeno meelʉ smo'eʉt'ʉcʉ ta kiokai to hamo?

⁶ inate so'ehti ta kiokai o'ante ina mon'a ahoi uhta kiokai ci cou, sokoeva no cmʉfeʉ na bitano ci 'tohʉngʉ. su'ayumonʉ no h'oepona no 'akuma ho noa topci no kuisi.

⁷ hola yonta yafana la maezo taotofsi'i ci ongko, tes'a noa eayaezoya, ho su'ayumonʉ no h'oepona no 'akuma.

leto'usnu to so'ehti ta kiokai

⁸ i'ola to'usnu to so'ehti ta kiokai te maezo yaa ʉmnʉ ci yu'ausna. la 'o'emio hola aomotʉ'ʉ. o'ala voemi, o'ala ma'konvosʉ no yupasʉ;

⁹ nte boemi no cofkoya ho tʉs'ʉ ci 'tohʉngʉ ho noyʉci na moumsʉ'eonʉ ta singkoo.

¹⁰ nte auyu tiou no hʉsvʉta. asansano uk'a 'o'emamzi, niantec'u tovei note hioa.

¹¹ na vcongʉhe te maezo yaa ʉmnʉ ci peipeis'ausna, o'te buusumsu. la ayʉyʉcʉ. aa'pucu eʉlʉ ho tae'oci.

¹² nala to'usnu ta so'ehti ta kiokai tec'o cihi na vcongʉ. a'vinano meemealʉ aʉt'ʉcʉ ta 'o'oko ho tisusucza 'e emoo.

¹³ i'ola yaa ʉmnʉ ci humzi cila to'usnu, homo yaahioai la elʉ no taotofsi'i ci ongko. meelʉ uk'a eh'eftongi ho eʉsvʉsvʉta na singkoohe hola mi'usnu to kilisto iesu.

someoino moumsʉ'eonʉ

¹⁴ os'o tposi 'e tengami eni, yaeza tata'za ho ci'u meelʉ aupcio baito muu;

¹⁵ hoci ma'i poha'o, 'e tengami eni tesi eʉsvʉta muu, ho lato yonta emoo to hamo ntee mainenu na teto h'oyunsova. 'e emoo eni 'aeno kiokai to no'auesiesi ci hamo, zou sʉesʉ ho totnguca ta so'emio.

¹⁶ la toehunga esansana, 'e moumsʉ'eonʉ ta singkooto mo mainenu na hia pepe ho mʉ'eona: isi ieni ta feango ta cou ho aopa'to, soomei to seilei zou moulʉlʉ, noa aiti to matetensi. noa psoyaska ta mauhpʉhpʉngʉ, noa taa'uzva ta yatatiskova, noa esifova ne pepe.