temote 1 2 - buacou seiso no faeva esvʉtʉ

hia m'ohkuyu ta 'ayumona ta kiokai

¹ ahoi, te'o eucufna suu, la mi'usnu to hamo ho eoho'neni 'e afu'u cou, 'inoli, 'inolineni, e'aveoveoyʉ;

² la yaeza 'inolineni 'o honte ho i'o la afu'u yaa suoca'ha ci cou, teto ko'ko meelʉ soanono, suseomʉ, eʉlʉlʉ, einu ci h'oyunsova.

³ mo ʉmnʉ 'emo maica, lasi ʉm'ʉmnʉa to leto'usnu ci hamoto.

⁴ tesi acʉha poa elʉ no to'usnu to hamo 'e yatatiskova, acʉhʉ bohngʉ to so'emio.

⁵ 'e so'emio eni 'aisieno yainca: moc'o cihi 'o hamo, ta pae'ohsa to hamo ho ita cou mo yaa cihi cimo notaico ci cou, 'ai'o moeno tmucou ci kilisto iesu;

⁶ isi ciha 'o iachi ho poa elʉ no ziu 'e yatatiskova, soomei ho tac'u mic'ʉhi 'e hie, tesi acʉha poa elʉ no to'usnu 'e macicihi ci cou.

⁷ nomio ta isi mituhci tan'e, mi'o noa popeoskuna ho lepsoyaski ho sitoo to couyafana, lema'cohio ho poa tmaa'uzo a'vinano bohngʉ ta so'emio. o'a mi'o meknuyu; 'e e'e'u mo acʉhʉ eʉlʉ!

⁸ yontomo mav'ov'o ci nouteuyunu, os'o tata'za 'e haahocngʉ la 'inoli, ma'einu ho eepza 'e emucu ho 'inoli, 'otela masʉ'no, 'otela yupa eehcʉvho.

⁹ la'u yaeza tata'za 'e maamespingi hola ai'i'ihosi hoci mako cofkoya ho suce; 'ote 'ahʉyʉ boemi no h'unasi ci popef'ʉsʉ, maasku no king ho maceofʉ no pepe ci yʉsʉ ho ehoehongsi 'e iachi.

¹⁰ la yaa ʉmnʉ ci peipeis'ausna, e'tatiski 'ola iachia epa'ta ci singkoo.

¹¹ 'e maamespingi la amiocni ho momaemaezo, aa'pucu ma'ceaco.

¹² o'a os'o ʉmnʉa 'e maamespingi hoci mo'ma'cohio ta cou, hocieno atʉkca 'e haahocngʉ; tela amiocni.

¹³ maica ho ohsi aueva teyai to hamo 'o 'atamu, teotavei 'o 'eva.

¹⁴ o'a i'o 'atamu na isi eepepecvazi, ma i'o mamespingi; homo noa paspepecvazi, mo yuszozʉ to hoolicu to hamo.

¹⁵ at'inghi 'e mamespingi hoci iachi atʉkcʉ, noyʉci na singkoo, himngonghi, cofkoya, te meelʉ i'mi no mebabo no 'o'oko ho noa to'usni.