temote 1 1 - buacou seiso no faeva esvʉtʉ

¹ zou poolo a'o; te'o epici to leto'usnu ci nooe'oca hamo ho itola mashʉyʉ to lato ta'usni ci kilisto iesu, hocu sitoo to kilisto iesu.

² te'o tmopsʉ ta tengami ho faeni suu - temote, 'aeno yonta singkoo ci a'ʉmtʉ'u oko: pafeni'sio suu to amohamo ho ito nooe'oca iesu kilisto na mengumi, himcocoveoi, soanonosi!

koica 'ola meknuyu ci mahsʉsʉftʉ

³ os'o tata'za ho ciko nochʉmʉ ne 'epeso; ne te'o emo'usnu ne makitong o'ucu eutotaveiya suu. panto piyo ci cou la yone'e ho psoyaski to o'amo emzo ci mahsʉsʉftʉ, teko asansana pashʉi ho potani.

⁴ teko poa teongasneni 'emo maica e'ankʉ ci ehohamva ho i'ola etacvoh'i ci tposno suezopʉ; maica 'e macucuma eni lac'o ec'ʉ no koa eehcʉvho, o'amo ake'i to'usnu bochio no isi ta'koeva to hamo, 'e isi ta'kokoeva tan'e la ieni to singkoo niante peelʉi cohivi.

⁵ na atuhcusi ta mashʉyʉ tan'e la cucufnu no himngonghi; 'e himngonghi eni, la i'mi no cofkoya ci 'tohʉngʉ. ʉmnʉ ci koyu, ho ino a'ʉmtʉ ci singkoo ho cmʉfeʉ.

⁶ pantola emose'u tan'e, ma'papayo'ʉ tala e'ankʉ ci eʉsvʉsvʉtʉ.

⁷ la mici lema'cohio to hoolicu to hamo, at'inghi o'a lahe maka a'ʉmta asansana 'e e'ehe, ac'ʉha no o'te maka asansana 'o ihe iachia ep'opnanfa ci hi'hioa.

⁸ ito cohivi, 'e cou hoci peelʉi tiuseoseolʉa 'e hoolicu, mamo anana'o ʉmnʉ 'e hoolicu.

⁹ 'aeno a'ʉmtʉ, teto cohivi na eni: 'e hoolicu. o'aisis'a teyaineni tomo ʉmnʉ ci cou, maisi teyaineni tola kokuzo, o'te tiou no atʉkca, 'oha einu, peiskuisi, potfʉngʉ ta kiokai, ma'konvosʉ ta hpʉhpʉngʉ, opcoi no maameoi, opcoi no cou,

¹⁰ smoc'ou, vohahocngʉ, topano, meknuyu, ebohtʉ, yutasufku to yuayayokeo ci 'omahsʉfta ci cou.

¹¹ 'e yuayayokeo ci 'omahsʉfta mo i'tohungu to fukuin, 'ai'o isieno toveineni a'o to psoevohngʉ ho peelʉi tohmomoengʉneni ci hamo ho epeaska.

'aveoveoyʉ no himcocoveoi to hamo

¹² te'o 'aveoveoyʉ to nooe'ocato ci kilisto iesu; maica ho isi pafi to tonʉ a'o, taa'uzva a'o, popeoskuna a'o ho poa fifihoa.

¹³ o'ula e'vono ekuzkuzoa, akuzkuzoa ho aokoe'iya. at'inghi isi coveoza to hamo a'o; maica ne mio o'amocu o'u taa'uzva. o'a os'o cohivi cuma na nia hioa'u.

¹⁴ 'o nooe'ocato isi pafi to afnaso ci mengumi a'o, poa yaa singkoo ho himngonghi a'o, na eni mo i'mi ho mo yuecnguhu to kilisto iesu ho cmʉfeʉ.

¹⁵ mo eʉlʉ 'e e'e eni, asansana peelʉi tiova. ta 'ayumona ta coukuisi mi'o sokuzoa cimo cihi,

¹⁶ at'inghi 'aeno eni na koa isi coveoza to hamo a'o, peelʉi i'mi tamo sokuzoa ci coukuisi ho pa'teni na a'sʉftonʉ ci buveicisi, poa buhmi a'o na tenala atavei tmaa'uzo ho tiou no 'auesiesi nsou ci cou.

¹⁷ na koe'ia ho psoevohngʉ. no'unu'sio to 'auesiesi honte ta hpʉhpʉngʉ - i'o o'ate kuzo, o'te teolʉi, cihic'o ci hamo! 'aamen.

¹⁸ oko'u ci temote, i'tohungu tomo natʉ'ca suu ci isi eyoca, te'o toveineni suu 'e mashʉyʉ eni. 'e e'e eni teko soanothʉ ho tekola yu'susuyumo.

¹⁹ la noyʉci na singkoo ho tʉs'ʉ ci koyu. pantola o'te tmalʉ to iachi ʉmnʉ ci koyu, ko'ko laeno smotokʉ 'o singkoohe,

²⁰ ta 'ayumona tan'e panto suminai ho i'o 'alisanta; os'ocu faeni to emucu to satan, poa meelʉ o'tena ekuzkuzo to hamo.