sitoo 28 - buacou seiso no faeva esvʉtʉ

yonto hpʉhpʉngʉ ne maota

¹ ne mimzacu tmo'poyapo. cu cohivi la yainca maota 'o ongko to ceoa to ic'o.

² mo na'no bunananghiya a'mi 'o cou tan'e. maica homo mʉchʉ ne mio, a'vinano soyʉmʉ, ihecu soupuzneni, ho aʉt'ʉca a'mi,

³ mo tikoyʉ to tuapzu 'o poolo ho tupuza, panto conci mahiz'o ci fkoi maica homo angu cuveu, cu yuyafo ho maifutu to emucu to poolo.

⁴ ihe aiti to cou to ic'o homo maifutu to emucu to poolo 'o fkoi, mo yupa mainca: <'amosola ahtuo'te opcoi no cou na eni, e'vono esifova ta etʉpʉ o'a isic'o poa yaansou no hicu ta pepe.>

⁵ at'inghi isi tapsʉpsa to poolo 'o fkoi ho poa su'to puzu, iachi o'amo ake'i alolongʉ.

⁶ ihe toehunga totea hoci yuofeo'ʉ 'o emucusi, hocieno aemo'au e'toheʉngcʉ ho mcoi; at'inghi ihe noana'va totea, o'aihe ake'a honga hoci aezuhu, cu aezuhu 'o 'tohʉngʉhe ho yainca:

⁷ to o'amo covhi to ic'o, panto ezoezoyʉ to pupailiu ci yuozomʉ. yungeova a'mi, miteuhi ho isi aʉt'ʉt'ʉca a'mi.

⁸ tuhcusi ne mio, mo cuveu ho poesoso 'o amo to pupailiu ho oevoi to hopo, mo uhto hoposi 'o poolo ho 'inolineni, hoe'oci to emucusi, isicu poa yov'oa.

⁹ maicac'o, 'omo afu'u tma'congo to yatan'e ihecu acʉha hafa uso, maezo acʉhʉ meelʉ yov'o.

¹⁰ ihe fii to man'i ci teonghia; ne tec'u e'ohʉ 'o 'apangʉ ihen'a hafa uhto 'apangʉ 'o temza tititha ne ceonʉ.

i'mi ne maota ho uhne looma

¹¹ sucaefi 'omo tuyu no feohʉ, mimza nofkʉtʉ tomo i'mi ne 'alisanta ho esmi ci 'apangʉ; zou 'o ongko to 'apangʉ, moso tosvo ne'e ho nocaefi no hosoyʉma.

¹² sʉc'ʉhʉ ne silaku 'o 'apangʉ, mimza miteuhi tosvo ne'e.

¹³ micu i'vaho e'ohʉ, sʉc'ʉhʉ to cili'ong. micu hucma mo meiseolʉ 'o poepe, ko'ko moc'o mipsohi cu sʉc'ʉhʉ ne putiuli,

¹⁴ to ic'o yupteilʉ to piyo ci sinto; mo aʉlʉ miptuhi ho ihe tʉtpʉta a'mi ho aʉt'ʉt'ʉca. maicacu mimzacu sʉc'ʉhʉ ne looma.

¹⁵ ihe tac'ʉhi to sinto ne looma ho mimzacu sʉc'ʉhʉ, cu uhto 'api'us ho ine sangkan ho yungeova a'mi. ne isi aiti to poolo cu 'aveoveoyʉ to hamo, asuhcu aʉ'ʉteʉ.

yone looma 'o poolo

¹⁶ ataveisi ne mimzacu sʉc'ʉhʉ ne looma, ihe teomneni 'o poolo, poa no'upu tomo noʉt'ʉcʉ ci heetai ho poa yontomo h'unasi ci 'oyona.

¹⁷ micu i'vaho miteuhi, isi eoho'a to poolo 'o masoso'ehti to couyutaya to ic'o. ne micu esmi, isi mi'usni to poolo ho yainca:

¹⁸ ihe tuucocosi a'o, at'inghi o'aihe elʉa na nte'o meamzi ho koa mcoi, mo yaa 'tohʉngʉ no 'ucia poesih'a a'o.

¹⁹ at'inghi ihe yutasufka to couyutaya, mi'ocu moezʉ ec'ʉhʉ to honte, o'a os'o yainca panote'os'a ehpʉnga 'e 'oahngʉ.

²⁰ nomio tan'e, ko'ko os'oeno eteuyuna muu ho aʉlʉ yupa baito ho yupepeahngʉyʉ. ho os'o ko'ko hafa 'e ekʉka eni, mamo nomio to ito anana'va mingeovi ta 'isolaelu cimo cihi.>

²¹ ihe mi'usnu 'o poolo ho yainca:

²² at'inghi, imza 'ucia talʉi na koyusu, maica ho imza cohivi, 'e osko ma'hi'usni ci cono taucunu ihe toehunga pohcingha to cou.>

²³ micu yupa esvʉtʉ no hiesi no noteuyunu 'o poolo. to hiesi ne mio mo botngonʉ 'omo yu'eteuyunu to isi yoni to poolo; ahoi no taseona ec'ʉhʉ no yofna mi'usnu tamo botngonʉ ho eʉsvʉsvʉta na fukuin to hpʉhpʉngʉ ne pepe. isi e'eo'eonga 'o hoolicu to moose ho i'o tposʉ to eyongensa, tesi poa tmaa'uzo to iesu 'emo tmalʉ.

²⁴ ito isi ma'e'engha, pantomo tmaa'uzo, panto o'amo tmaa'uzo.

²⁵ mo o'te yupa tohmʉskʉ, cu aemo'ʉ. ne o'amocu mo aʉlʉ aemo'ʉ, mion'a matnʉskʉ 'o poolo:

²⁶ yainca to 'izaya: teko eʉsvʉta ta yatatiskova: 'e yatatiskova eni la siho siho tmalʉ, o'a mo mako tma'hongʉ, siho siho aiti o'a isic'o honga.

²⁷ maica 'e yatatiskova eni mo amʉtʉ 'o 'tohʉngʉhe; sngʉsnga 'o koyuhe. m'oyʉcʉ 'o mcoohe. hoci o'te maica, tec'u bohngʉ si mcoohe, maezo tmalʉ si koyuhe. ma'sansano si 'tohʉngʉhe, ho ma'vovei, te'ocu poa yov'o na hin'i.>

²⁸ isicu yainca to poolo:

³⁰ mo topuska to isi yoni ci emoo 'o poolo. i'omo afu'u 'u'uso ci cou, isi acʉha aʉt'ʉt'ʉca.

³¹ mo aʉ'ʉteʉ ho epeaska 'o fukuin to hpʉhpʉngʉ to hamo, po'pa'cohivi tomo natʉ'ca 'o nooe'oca iesu kilisto ci hioa, uk'a cimo ake'i koa nomʉtʉ.