sitoo 18 - buacou seiso no faeva esvʉtʉ

yone kolinto

¹ ataveisi tan'e, mo mongoi ne yaaten 'o poolo, esmi ne kolinto.

² nemo yone'e, isi lʉa 'omo cihi cimoso yayo ne pentu ci couyutaya, zou 'acila 'o ongkosi. ta mihnan'a isi engocha 'o vcongʉsi ci paicila mo i'mine 'italia ho esmi. maica isi pashʉi to kolauti ci honte. te acʉha poa mongoi ne looma na afu'u couyutaya. isi usa to poolo ho aiti 'e navconga.

³ mo nochʉmʉ ho toehungneni yaahioa; maica mosola anana'o noe'ocʉ no mooyai tenmaku 'o poolo ho eansonsou, mo totiski 'e lahe hioa.

⁴ cono hola 'ansokunici, ahtuo'te uhto kaitoo 'o poolo, la yupa eehcʉvho 'o mocmo ci cou, poucufna 'o couyutaya ho coungilisia ho poa tmaa'uzoa.

⁵ ne micu i'mi ne makitong ho esmi 'o siila ho i'o temote. micu 'aanana'o 'o poolo ho peisnovi na epeaski to fukuin, mi'usnu to couyutaya ho 'akasi 'o iesu ho zou kilisto.

⁶ at'inghi, ne ihe yutasufka ho ekuzkuzoa, isicu epsʉpseni 'o yompuhu to yʉsʉsi, mi'usni ho yainca:

⁷ micu mongoi 'o poolo, uhto emoo to mo ma'einu to hamo ci tito yusutu ho no'upu, 'o emoosi mo nocmu'u to kaitoo.

⁸ i'o leaʉt'ʉcʉ to kaitoo ci cilisupu ho i'o conosi emoo mo acʉhʉ tmaa'uzo to nooe'oca; mion'a botngonʉ ci coukolinto 'omo maezo tmaa'uzo ne micu tmac'ʉhʉ to fukuin, a'vinano tiou to toonono.

⁹ moso cono yofna, mo baito to conci mavolosi 'o poolo. mo i'mi to mavolosi 'o nooe'oca mi'usni ho yainca: <'ote ngoheʉngeʉ, at'inghac'o engha, 'ote amzocni,

¹⁰ mi'o no'upu suu, uk'a cite meelʉ akuzkuzo suu, a'vinano ta hosa tan'e. mo botngonʉ 'o 'o'oko'u.>

¹¹ cu yone'e 'o poolo ho aʉlʉ notonsoha ho ang'osʉ, po'pa'cohivi to e'e to hamo 'o yane'e.

¹² nemo seolʉa no sootoku to 'akaiya 'o kalio, mo biteuyunu 'o couyutaya ho suyumi 'o poolo, e'usna to hooin,

¹³ ehpʉnga 'o poolo: <'e cou eni mita euskunu to mocmo ho boemi to o'amo emio ci hioa ho m'ohkuyu to hamo!>

¹⁴ ntec'on'a ahoi mici aomotʉ'ʉ 'o poolo, mo mi'usnu to couyutaya 'o kalio ho yainca:

¹⁵ 'e imu yupa eehcʉvha ho zouc'oeno e'e ta hoolicumu. temu invonva eususeoma, o'aos'o 'ucia yʉsvʉta 'emo maicaci hi'hioa!>

¹⁶ ihecu peteoyafa to hooin.

¹⁷ ihe tʉtpʉta 'o le'aʉt'ʉcʉ kaitoo ci sotini, yonto coca to hooin ho ti'usna. 'emo maica ci hi'hioa o'aisi cumasa to kalio.

yuovei ne 'antia 'o poolo

¹⁸ mion'a aʉlʉ 'enemipzohi homo no'upu to sinto ne kolinto 'o poolo, ataveisi micu mongoi, nʉthʉ 'o paicila ho 'acila yonto 'apangʉ ho uhne siliya. ne o'amocu mo e'ohʉ, mo yone cengkoli ho sko'si'sa 'o f'ʉsʉsi, maica mosola iachi esvʉtʉ.

¹⁹ ne micu sʉc'ʉhʉ ne 'epeso, yone'e, micu mi'usnu to paicila ho yacila 'o poolo ho epeevai, iachi uhto kaitoo ho yupa eehcʉvho 'o couyutaya.

²⁰ ihe toehunga 'ucia tʉtpʉta ho mako mipiyohi no'upu, at'inghi o'amo mimho 'o poolo.

²¹ ne tec'u yupepeevai, isi mi'usni 'omo botngonʉ ho yainca: micu i'vaho mine 'epeso ho smo'apangʉ 'o poolo.

²² ne micu sʉc'ʉhʉ ne kaisalia 'o poolo, cu uhne 'elusalemu ho aopa'to to kiokai, ataveisi micu uhne 'antia.

²³ yone'e ho aʉlʉ miaveivei micu e'ohʉ. isi saingaboa 'one ngalatea ho i'o hpʉhpʉngʉ to mia'usnu ne fulika, auhuca amamahtʉica 'o singkoo to sinto.

yone 'epeso ho kolinto 'o 'apolo

²⁴ panto cihi ci couyutaya zou 'apolo 'o ongkosi, mo esmi ne 'epeso. mosola yayo ne 'alisanta, la mahsosonʉ homo aomotʉ'ʉ ci cou, mo a'sʉftonʉ bocbochio to seiso.

²⁵ yono ohsila pas'ofeihna to nooe'oca ci ceonʉ, mohcula tiou no ʉmnʉ ci aʉsvʉsvʉtʉ, a'vinano cuveu 'o 'tohʉngʉsi, conino esansana eʉsvʉsvʉta 'o iesu, at'inghi, i'oc'o toonono to yohane na isi cohivi.

²⁶ cu ahoi yonto kaitoo 'o 'apolo ho e'ʉ'ʉteʉ eʉsvʉsvʉtʉ; ihe talʉi to paicila ho 'acila, cu eyoho'a ho poa uhto emoohe, asuhca etuhca ho esansana 'o e'e to hamo.

²⁷ ataveisi mo iachi ma'koyu 'o 'apolo te uhne 'akaiya, ihecu to'usni to sinto ne 'epeso, tmopsʉ to tengami ho faeni to sinto ne 'akaiya, poa aʉt'ʉcneni 'o 'apolo. ne micu sʉc'ʉhʉ ne'e, mo na'no meoino to'usnu to micu mayo no mengumi ci sinto.

²⁸ la siho yontola apa'to ci yupa eehcʉvho ho yaa tonʉ no etpʉti 'o couyutaya, i'tohungu to seiso ho soomei 'o iesu ho zou kilisto.