sitoo 17 - buacou seiso no faeva esvʉtʉ

yone tesalonike

¹ mo emo'cʉ'cʉnʉ to tehe mia ci ceonʉ 'o poolo ho siila, sucaefi ne 'anfuipoli. 'apolonia, esmi to tesalonike, to ic'o panto kaitoo to couyutaya.

² maito lasi at'oca 'o poolo ho yʉmeʉmʉ to kaitoo, acngucnguhu tuyu no 'ansokunici, i'tohungu to seiso ho yupa eehcʉvho 'o mocmo ci cou,

³ esansana a'vinano soomei 'o kilisto te ahtuo'ten'a tiou no 'atutumzo, tenac'u i'mi no mcoi ho smoevovei. isi yainca: <'e os'o mi'usneni muu ho epeaska ci iesu, 'ai'oeno kilisto.>

⁴ to 'ayumonahe panto mo tmaa'uzo ci cou, micu cono ceonʉ 'o poolo ho siila; pantomo maezo tmaa'uzo cila m'ohkuyu to hamo ci coungilisia ho i'o la so'ehti to maamespingi mo maezo tmaa'uzo.

⁵ at'inghi 'o couyutaya to ic'o mo smo'eubut'u, eteuyunu to mayayaksai ho biteuyunu, yonta hosa ho ec'ʉ to 'afeo'fu'u, mo toemʉemʉ to emoo to iesun. i'ima 'o poolo ho i'o siila, tehe faeni tomo pak'i ci cou;

⁶ maica ho o'a ihe elʉa, ihecu e'usna to taicini 'o iesun ho i'o piyo ci sinto, ehpʉngneni ho yainca: <'e mo koa 'afeo'fu'u ci cou, maitan'e micu cmʉ'ho ta hosato.

⁷ 'e iesun ita aʉt'ʉca to emoo taini! mihin'i yutasufku to h'oesvʉta to honte, yainca pantomon'a cihi ci mo h'unasi ci honte, zou iesu na ongkosi.>

⁸ 'e e'e eni isi i'mizi no poot'ova 'o taicini ta hosa ho i'o mo botngonʉ ci cou.

⁹ 'o taicini ta hosa isi pashʉya ho tmuhnoi 'o iesun ho i'o mocmo ci cou, isicu ataveiya poesih'a.

yone piliya

¹⁰ ne micu yofna, ihecu osnia poa uhne piliya to sinto 'o poolo ho i'o siila. ne micu esmi ne'e, cu yʉmeʉmʉ to kaitoo to couyutaya.

¹¹ 'e cou tan'e mo ma'cocoyʉhe to coutesalonike. la asno'zonʉ tmalʉ to e'e to fukuin, huhucmasi eocoyʉ to seiso ho patotiska, 'ucia cohivi 'o e'e to poolo mio nana a'ʉmtʉ emio.

¹² to 'ayumonahe mo botngonʉ 'omo tmaa'uzo; mo 'enepio cila einva ci maamespingi ho haahocngʉ to ngilisia mo maezo tmaa'uzo.

¹³ at'inghi, ne ihe tac'ʉhi to couyutaya ne tesalonike homo maezo yone piliya 'o poolo ho psoyaski no e'e to hamo, cu usa ho 'afeo'fu'u, poot'ova 'o botngonʉ.

¹⁴ 'o sinto ihe osnia poa emo'usnu to mia'usnu to aezonʉ to etʉpʉ 'o poolo; 'o siila ho i'o temote mion'a nochʉmʉ ne piliya.

¹⁵ i'o mo poʉt'ʉcʉ to poolo ci cou ihe poc'ʉhan'a ne yaaten, micu yuovei ne piliya, ihe evaha 'o isi eutotaveineni to poolo ci e'e, poa aupcio meecunu 'o siila ho temote, te yupteilʉ ne'e.

yone yaaten

¹⁶ ne mo yone yaaten 'o poolo ho totea 'o siila ho i'o temote, isi yuue'iya mo nongabo to hosa 'o uacoua, mo na'no nac'o 'o 'tohʉngʉsi.

¹⁷ mo yonto kaitoo 'o poolo ho yupa eehcʉvho 'o couyutaya ho i'omo m'ohkuyu to hamo ci couyafana, maezo huhucmasi yonto coca ho yupa eehcʉvho to lasic'o lʉlʉa ci cou.

¹⁸ panto piyo cimo ma'hi'usnu to 'ipikulos ho ma'hi'usnu to sutoya ci coumou'tohʉngʉ la maezo uso ho yupa eehcʉvho to poolo. panto mo mainca: <'e lac'o mimimiyo ci cou mo meefʉc'ʉ no cuma?> panto mo maezo mainca: homo maica 'e e'ehe. mo i'mi ho isi epeaska to poolo 'o iesu ho i'o fukuin no smoevovei.

¹⁹ ihecu hafa uhto ngikai to yale paku 'o poolo, yainca:

²⁰ mo piyo ci hi'hioa 'e imza na'na taunona'vʉ ho imza talʉi, 'ucia asansana zou cuma na e'a'ausnasi.> (

²¹ 'ia mala maica 'e couyaaten ho i'ola nohi'u ci cou h'unano hpʉhpʉngʉ. la kaebʉ ho lahe toʉsvʉsvʉtneni namo faeva ci lahe totalʉi ci a'a'ausna.)

²² mo yac'ʉ to ngikai to yale paku 'o poolo, yainca: <'e cou ta yaaten! os'o cohivi na muu lamu yontamo mav'ov'o ci hi'hioa ho aa'pucva pa'teni na lamu hia asno'zonʉ m'ohkuyu no mahihicu.

²³ ne mi'o smaingongabo ta hosa, yue'iya 'o lamu 'oyona m'ohkuyu, cimi'o teolʉ to mo conci 'oyona sʉ'tʉ, panto isi tposi to skoskopnasi ho yainca <>. maitan'e te'oeno eʉsvʉta muu 'e o'a imu honga, holea at'ingha p'ohkui ci hamo.

²⁴ 'e mosola mooyai ta engʉca, ceoa, ho ita aʉcʉcʉhʉ ci hamo zou nooe'oca ta engʉca ho ceoa. o'ala yonta isi teyai ta cou ci emoo,

²⁵ maezo o'ate nama noa sʉ'ti ta cou; maica ina nsou, peucu, ho i'e acʉcʉhʉ ci macucuma isi iachia faeni ta yatatiskova.

²⁶ mo i'mi to mo cihi ho mooyai masusuezopʉ, poa apeaski ho nongaboi 'e ceoa, a'vinano ayoca esvʉta na tehe hie ho ina tehe yoni ci mahuhupa.

²⁷ ho isi yaica 'a isieno akoeva no poa biebimi to hamo, nenusino te meelʉ yono eangacʉmʉ ho elʉa 'o hamo. a'ʉmtʉsi, 'o hamo o'amo nomcovhi ta mo macicihi.

²⁸ pantola mainca: <<'e h'oyunsovato, hia aut'ot'ou, ho mito yayo mo acʉhʉ yono emucusi.>> maezo mais'a 'o e'e to letohpʉngʉ ta 'ayumonamu: <<'aeno maezo 'o'okosi a'to.>>

²⁹ ho zoueno 'o'okosi a'to, o'anteto ta'ngangacʉma na yu'ausna to hamo ho yainca nteto peelʉi titheni no totontone, boemi no king nging. hocieno fatu ho mooyai uacoua ho yoyayaeza na mi'ausnasi.

³⁰ ho lan'a yono moʉfngʉ ho nongonongo 'e yatatiskova, o'a mocu lasi cumasa to hamo, at'inghi maitan'e isicu pashʉya to hamo 'e yatatiskova ho poa mongoi no mo kokuzo ci ceonʉ.

³¹ maica isicu esvʉta na hiesi, tesi ieni to isi epeiya ci mo cihi, boemi no moulʉlʉ ho yʉsvʉta 'e mauhpʉhpʉngʉ; ieni no i'mi no mcoi ho smoevovei 'emo cihi, isicu faeni ta yatatiskova 'e huomza.>

³² ne ihe talʉi ho isi yue'engha to poolo na i'mi no mcoi ho smoevovei, panto mo potfʉngʉ ho cocvi; panto mo mainca:

³³ micu mongoi to ngikai 'o poolo.

³⁴ mo piyo ci cou 'omo to'ofeihni hocu sinto; to 'ayomonasi panto ngi'in to yalepaku ci tonisiu, ho i'o mon'a cihi ci mamespingi zou tamali 'o ongkosi, ho i'o mo piyo ci cou.