sitoo 15 - buacou seiso no faeva esvʉtʉ

yone 'elusalemu ho toʉsvʉsvʉtʉ

¹ pantomo i'mi ne yutaya ho cmʉ'ho ta 'antia, ahoza po'pa'cohivi 'o sinto ho yainca:

² nomio ta e'e tan'e, 'o poolo ho i'o panapa ihe mi'usni ho kuici yupa 'eehcʉvho. i'mi tan'e, ihe toehunga popeoskuna 'o poolo ho panapa ho i'o mo piyo ci cou to kiokai to ic'o ho uhne 'elusalemu, nomio tan'e ho mi'usnu to sitoo ho macocoolo ho noa pas'ofeihna ta hi'hioa tan'e.

³ ihecu peomanzi to kiokai. nemo pcaceoni, mo neisu ne fuiniki ho ine samalia, auhuhuca eʉsvʉta 'o couyafana homo tma'usnu to hamo. ihe tac'ʉhi to afu'u sinto na eni mo acʉhʉ na'no 'aveoveoyʉ.

⁴ ne micu sʉc'ʉhʉ ne 'elusalemu, ihe yungeova to kiokai, sitoo ho ito macocoolo ho aʉt'ʉt'ʉca, micu mi'usnu tamo botngonʉ ho eʉsvʉsvʉta na hiasi titha to hamo ho hioa 'e acʉcʉhʉ ci hi'hioa.

⁵ at'inghi mo piyo ci mo ma'hi'usnu to coufalisai ci sinto mo yac'ʉ ho mainca: <'o couyafana nte ahtuo'te tiou to s'e'honga ho maezo mee'ofeihni to hoolicu to moose.>

⁶ 'o sitoo ho macocoolo ihecu toehunga toʉsvʉsvʉtneni na eni.

⁷ noana'o ci hia yupa eehcʉvho, mo yʉc'ʉ 'e petelo, yainca:

⁸ i'ola smo'eusoyʉ ta 'tohʉngʉ ta cou ci hamo, isi pafi to seilei 'o couyafana, totiski ho isi faeni a'to. i'mi tan'e ho poa husansaneni ho isi yaeza tiova 'o couyafana.

⁹ na a'to ho i'o couyafana, o'aisi yupa apaevaza to hamo, maezo i'mi homo tmaa'uzo ho poa cofkoya 'o 'tohʉngʉhe.

¹⁰ homoeno maica, mainci imu aac'o hʉsvʉta 'o hamo, ahoi to nia maameoito ac'ʉhʉ a'to, 'e o'aito iachia pasvo'ha ci ngotohva, mainci siya ta ei'si ta tesi ta couyafana?

¹¹ o'amo emzo eni! ito taa'uzva ho mito elʉ no to'usni. isi ieni to mengumi to nooe'oca iesu, moc'o totiski ta couyafana.>

¹² mo acʉhʉ amiocni ho talʉi 'o poolo ho panapa ho ihe eʉsvʉsvʉta ho isi titha to hamo ho yonta 'ayumona ta couyafana ho hioa 'emo man'i ci po'e ho taunona'vʉ ci hi'hioa.

¹³ ne micu eepʉngʉ, isi yaeza yainca to yakovu:

¹⁴ ne mihnan'a itacu esansana ta saimong na hiasi aʉt'ʉt'ʉca to hamo 'o couyafana, i'mi to 'ayumonahe ho epeiya 'ote ma'hi'usnu to iachisi ci cou.

¹⁵ 'e nia e'e to eyongensa mo a'sʉftonʉ yupa mʉ'ho. mo maica 'o hia tmopsʉ to seiso:

¹⁶ yainca to nooe'oca: ataveisi tan'e ta'u yuovei, p'eyoveiya 'o moso toczoyʉ ci emoo to tavite. te'o i'mi to ohcu seoovei ho i'momhoma taoveiya, i'vaha poa yac'ʉa.

¹⁷ maicac'o. ina afu'u mocmo ci cou, i'o os'o epeiya ho tma'usnu a'o ci couyafana, te acʉhʉ biebimi to nooe'oca.

¹⁸ i'o moso ahoi ne na'no noana'o hocu masmomolʉ tan'e ci nooe'oca ohsicula yaica ci hia epeaska.>

¹⁹ isi e'cʉ'cʉnʉ to yakovu ho yainca:

²⁰ nteto tmopsʉ no tengami, eutotaveiya ho o'te bonʉ to ohcu titha sʉ'tʉ to uacoua ho 'oha cofkoya ci 'oanʉ, 'otela yaa smoc'ou ci peipeis'ausna, 'ote bonʉ to ohoc'o seoubcikia ci yuansou ho ito hmuyu.

²¹ maica ahoi ne noana'o ac'ʉhʉ maitan'e, cono hola 'ansokunici, yonto makakaitoo la ahtuo'te pantola mo'engho to hoolicu to moose, to mahohosa la ahtuo'te pantola psoyaski to lasi h'oma'cohioa.>

faeni to sinto to couyafana ci tengami

²² tuhcusi tan'e, 'o sitoo ho macocoolo ho i'o acʉcʉhʉ ci kiokai esvʉta no epei note tovei, skuna ho poa fiho to poolo ho panapa ho uhne 'antia. ihe epeiya 'o lahe tos'ongki no pasapa ci yuta ho i'o siila. 'emo yoso eni la anana'va toehunga einva to masisinto.

²³ 'o ihe hafa ci tengami mo maica 'o hia tmopsʉ: <'o sitoo ho i'o mo coolo ci maanat'ohaesa te tuayokeo ta mo yonta 'antia, siliya, cilicia ci afu'u sinto to couyafana!

²⁴ imza tac'ʉhi panto piyo cimo i'mi tan'e ho yuyafo; ina nia e'ehe isi na'na poa ma'pepecvai ho ma'ngongoveo na muu. a'ʉmtʉsi, o'a imza eutotaveiya ho engha 'emo maica ci e'e.

²⁵ ko'koeno imza toehunga toʉsvʉsvʉtneni, tohmʉskʉ ho epei ta isi tovei ho poa uhta lamu yoni. tehin'i to'ofeihni ta nanghiamza ci panapa ho poolo;

²⁶ 'emo yoso eni mohin'ila nomio no fifiho to nooe'oca iesu kilisto ho o'te ma'sokoyu no nsou.

²⁷ ko'ko imza epeiya 'o yuta ho siila; tehe aʉla mi'usneni muu ho eʉsvʉta 'e isi tposi ta tengami.

²⁸ maica isi teomneni to seilei a'mi, tapeoha na piyo cite anana'va hioa ci h'ofifiha, o'ate topuhngi no mocmo ci cvʉhʉ na muu.

²⁹ o'atemu ana 'o ohcu titha sʉ'tʉ to uacoua ci 'oanʉ; o'te bonʉ to hmuyu ho ito oho seoubcikza ci snoecavʉ; maezo o'ate yaa smoc'ou cila peipeis'ausna. hocimu peelʉi peihcʉ'hi 'emo piyo ci h'oesvʉta tec'u ʉmnʉ. temu'sola soanono!>

³⁰ 'o isi skuna micu aot'ou ho uhne 'antia, yone'e ho eteuyuna 'o acʉcʉhʉ ci sinto, faeni 'o tengami.

³¹ ne ihe engha 'o tengami, mo i'mi to epopoucufnu ci e'e ta tengami ho na'no 'aveoveoyʉ.

³² 'o yuta ho siila zou maezo taihio ho evaho to e'e to hamo ci eyongensa; mo man'i 'o ihe mi'usneni to sinto ho engha ci e'e, eucucufni ho amamahtʉica na singkoohe.

³³ aʉlʉ miaveivei ne'e. ihecu 'aveoveoneni to sinto ho peomanzi, tooyokeoi ho meelʉ soanono ho yuovei.

³⁵ 'o poolo ho panapa mo akameosʉn'a yone 'antia; mo toehungu 'omo piyo ho mo'ma'cohio a'vinano epeaska 'o e'e to nooe'oca.

yupeevai 'o poolo ho panapa

³⁶ mohcu mipiyohi, isi mi'usni to poolo 'o panapa ho yainca:

³⁷ isi 'ucia engocha to panapa 'o yohane maluko ho nʉtheni,

³⁸ at'inghi o'aisi ʉmnʉa to poolo; maica ne auyusi moso o'te mimho nongaco ho i'upu yaahioa, mongoi ne moso yone pangfuiliya.

³⁹ mo nomio tan'e ho meoino yupa toohcʉvho 'emo yoso, ataveicu yupeevai. isi hafa to panapa 'o maluko yonto 'apangʉ ho uhne saipulusu,

⁴⁰ isi epeiyahe to poolo 'o siila, ihe toveineni to nooe'oca to sinto ho poa mʉʉt'ʉcneni no mengumisi, micu maezo mongoi.

⁴¹ isi saingaboa to poolo 'one siliya ho cilicia, amamahtʉica na singkoo to maanat'ohaesa to makikiokai.