sitoo 14 - buacou seiso no faeva esvʉtʉ

yone 'ikonen

¹ mo maezo yuyafo ne 'ikonen 'omo totiski ci hi'hioa. mo uhto kaitoo to couyutaya 'o poolo ho panapa; i'o hiahe eʉsvʉsvʉtʉ isi poa sinto 'omo botngonʉ ci couyutaya ho couyafana.

² at'inghi, i'o o'amo tmaa'uzo ci couyutaya ihe poot'ova 'o couyafana, poa himkuzo to sinto.

³ mo aʉlʉ mipiyohi to ic'o 'omo yoso; e'ʉ'ʉteʉ ho engha 'o nooe'oca. isi fii to tonʉ no peispopo'e to nooe'oca, ieni tan'e ho soomei na mou'ʉmtʉsi ta ihe epeaska cimo yaa mengumi ci e'e.

⁴ 'o yata hosa mo botngonʉ 'omo i'mi tan'e ho boepaevai, pantomo bi'upu to couyutaya, panto mo tma'usnu to sitoo.

⁵ at'inghi, i'o couyutaya ho i'o couyafana ac'ʉhʉ to masoso'ehtihe ihe ta'koeva no akuzkuzoa 'o sitoo, yomza to fatu ho mamcozi.

⁶ ihe cohivi 'e hi'hioa eni, micu meʉfngʉ ho p'usnu to lusuto ho thopi ci yusno hosa ne likauni ho ito mia'usnu to cum'usi ci hpʉhpʉngʉ,

⁷ yonto hpʉhpʉngʉ to ic'o ho a'cʉ'cʉnʉ epeaski to fukuin.

yone lusuto ho thopi

⁸ to hosa ne lusuto panto cihi cimo uk'a tonʉ 'o t'angosi ci cou, asonghoi pi'o, o'amocu mosola ahtu coeconʉ.

⁹ mo yusuhngu to ic'o, tmalʉ to poolo homo eʉsvʉsvʉtʉ. isi honga to poolo mo yaa singkooa, te meelʉ yov'o, isicu teochʉmi.

¹⁰ tmunoi ho yainca: micu mofti'i 'o ic'o, ahoi coeconʉ.

¹¹ ihe aiti to botngonʉ 'e isi hioa to poolo, cu bua likauni ho moozoyʉ mainca:

¹² ihe yainca 'o panapa cous, yainca 'o poolo siomi, maica ho zou'so poolo 'omo ephou aomotʉ'ʉ.

¹³ to yafana ta hosa mo cihi ci saisi to vio no cous, mo yaakako to 'uachumu, mahafo to bʉvnʉ, uhto phingi to hosa, te toehungu 'o botngonʉ ho mi'usnu to sitoo ho sʉ'tʉ.

¹⁴ ihe aiti to panapa ho poolo 'o ihe 'ucia hioa, cu eekieki 'o yʉsʉ ho smo'ayumonʉ tomo botngonʉ, tmunoi mainca:

¹⁵

¹⁶ ne noana'o, ohsila poa maino tehe 'ucia mia ci ceonʉ to hamo 'e yatatiskova.

¹⁷ at'inghi, lasi asngʉcva ieni to mav'ov'o cimo ʉmnʉ ci hi'hioa ho epa'teni ho mio yayo 'e iachi, maieno: isi poa i'mi ne pepe 'o mʉchʉ ho faeni muu. maino hiesi ho poa tov'ohʉ muu; isi pafi no 'oanʉ muu, poa nongcʉngceni no kokaekaebʉ na 'tohʉngʉmu.>

¹⁸ e'vono maica 'e e'e to sitoo, isic'o nia'te o'te peelʉi vomti 'o botngonʉ ho tehe mi'usni ho sʉ'tʉ.

¹⁹ at'inghi, panto piyo ci couyutaya mo i'mi to 'antia ne pisiti ho ine 'ikonen ho esmi; ihe teouskuni 'omo botngonʉ ho poa mayo to fatu ho tokʉi 'o poolo, ihe ta'unano micu mcoi, cu easasa ho e'eafi ta hosa.

²⁰ ne ihe seolʉa no paikuyungvi to tesi, mo yac'ʉ 'o poolo ho emoovei to hosa, cu hucma. mo yuyuso 'o panapa ho emo'usnu ne thopi.

yuovei ne 'antia

²¹ 'o poolo ho panapa mo yone thopi ho epeaski to fukuin, poa maezo tesi 'omo botngonʉ ci cou. mo yuovei ne lusuto, atavei uhne 'ikonen, i'vaho uhto 'antia ne pisiti.

²² mo nongongabo ho poa ma'tataso 'o 'tohʉngʉ to tesi, poucufna ho noyʉci na singkoohe, yaeza yainca:

²³ 'omo yoso ihe p'eac'eni to coolo 'o makikiokai, ataveisi no 'inoli ho tanzi, ihecu toveineni to ihe tae'oci ci nooe'oca.

²⁴ mo sucaefi to mia'usnu to pisiti 'emo yoso, sʉc'ʉhʉ ne pangfuiliya.

²⁵ mo yone peka ho epeaski to e'e, atavei uhne yatali.

²⁶ i'mi ne'e ho smo'apangʉ ho yuovei ne 'antia. to ahoisi, 'amosoeno yontan'e ho yonto 'ayumona to mengumi to hamo ho noa tovei ta ihecu aepʉnga ci hioa maitan'e.

²⁷ mo yuovei ne 'antia, ihecu eteuyuna 'o maanat'ohaesa to kiokai, eʉsvʉsvʉta isi yainenu ho isi titha to hamo ho yaahioa, yainenu na hiasi paavneni no phingi no singkoo 'o couyafana.

²⁸ mo aʉlʉ 'enemipiohi no hie homo no'upu to sinto ne'e.