pilipi 4 - buacou seiso no faeva esvʉtʉ

poucufnu 'o poolo

¹ maanat'ohaesa, la'u atva'esa ngohia na muu, la'u a'ʉmtas'a taaecingia muu! zou kokaekaebʉ'u na muu, tafange'u na muu. ngohia ci maananghia, temula noe'ocʉ to nooe'oca ho bʉʉlʉlʉ.

² nat'ohaesa ci yo'ate ho sintuki, te'o cucufni muu la no'ayumonʉ to nooe'oca ho tohmʉskʉ na 'tohʉngʉ.

³ 'o meot'ʉcʉ ci 'oahngʉ'u, te'o maezo m'ene suu ho to'usni 'emo yoso; maica'sio mihin'i yontala hi'hioa ta fukuin ho fiho a'o, ho i'e kolimen, ho ito mocmo cila toetoehungu yaahioa ho i'upu ngoseo; 'o ongko tamo maica ci cou isicu acʉha tposi to tposʉ no nsou to hamo.

⁴ temula i'mi ho mimu yuecnguhu to nooe'oca ho asngʉcʉ kokaekaebʉ. te'o i'vaha yainca, temu la kokaekaebʉ.

⁵ temu la maezo mi'usnu tamo botngonʉ ho pa'teni na ma'einu. tec'u esmi 'o nooe'oca.

⁶ ntemula uk'a ake'i ma'tipvongʉ; la yono 'inoli ho eʉsvʉta to hamo na lamu 'ucia tititha, boemi no to'aveoveoyʉ ci 'tohʉngʉ ho 'inoli.

⁷ na lasi pafeni to hamo ci soanono la nosa'o no lato ta'cʉ'ha ta cou, tesi ieni to kilisto iesu, noyʉci na lato ta'koeva ta 'tohʉngʉto.

⁸ ataveisi, maanat'ohaesa, temula conino buyuyue'iya i'ola ʉmnʉ ho peelʉi tohmoengʉi ci hi'hioa. acʉcʉhʉ 'ola mou'ʉmtʉ, mitohʉngʉ, ahmʉskʉ, cofkoya, ʉm'ʉmnʉa, ho i'ola taotofsi'i ci hi'hioa ntemu la acʉha huecvʉhʉa.

⁹ i'o ohmula yoyayaeza a'o, tiova, hocieno talʉi, aiti ci peipeis'ausna, la acʉha peiseafi. i'ola mofi to soanono ci hamo 'atesi ahtao'te no'upi muu.

to'aveoveoyʉ ci e'e

¹⁰ ho la'u no'ayumonʉ to nsou to nooe'oca la yaa someoino kokaekaebʉ. maica micu aʉlʉ aomane, imu i'vaha aʉt'ʉca a'o maitan'e. a'ʉmtʉsi, leamu anana'va asngʉcva siya no 'tohʉngʉ a'o, lac'oso o'te auseoseolʉ no epa'teni.

¹¹ homo maica co e'e'u, o'amo i'mi no mi'os'a aviovio no cuma; os'ocu peelʉi na ma'mamso ta maitan'e.

¹² os'o cohivi te mainenu nate h'oyunsova hola aviovio, yaeza cohivi na h'oyunsova hola atngaso. mi'ocu elʉ no bocbochio tan'e, 'upena hoci yono mo mainenu, hocieno yoseʉ, hocieno sieo, hocieno atngaso, hocieno aviovio. te'o acʉha ta'mamsoa.

¹³ ieni to isi pafeni to kilisto ci tonʉ, te'o peelʉi noseolʉi 'emo mav'ov'o ci a'a'ausna.

¹⁴ at'inghi, ho la'u 'atutumio, lamu to'usni a'o, te'o a'ʉmtʉ 'aveoveoyʉ.

¹⁵ imu acʉha cohivi ta coufuilipi, ne o'un'a ahoza psoyaska 'e fukuin, mo'u mongoi ne makitong; ne mio i'oc'o kiokaimu 'o moso to'usnu a'o, tma'upu ta ngoseo ho kaebʉ'u.

¹⁶ ne mo'u yone tesalonike o'amoc'o anou i'nʉskʉ, hoci panonte'o 'ucia tititha, tamu cmʉ'ho ho to'usni a'o.

¹⁷ o'ami'o ma'to'tohʉngʉ no teonghi, mala'u 'ucia poa yaa man'i ci tingacva muu, ta'usna no iachimu tposʉ.

¹⁸ 'aeno eni 'ete huomza ta imu faeni a'o; i'e imu taha'veni a'o mo asa'ohe to la'u tititha. 'o 'ipafoti isi pahcʉ'ha 'e imu faeni a'o cimo atngaso ci teonghia, aʉlʉ mais'a meaemo'ʉ ci namusngau, isi ʉm'ʉmnʉa to hamo ci sʉ'ta.

¹⁹ 'o hamo'u tesi ieni tomo yonto kilisto iesu cimo atngaso ci ʉm'ʉmnʉ ho pafi no temula afu'a tititha.

²⁰ no'unu'sio to hamoto na psoevohngʉ, ac'ʉhʉ no 'auesiesi! 'aamen.

sotavei ci tuayokeo

²¹ temun'a mi'usnu tomo afu'u tma'usnu to kilisto iesu ci sinto ho tuayokeo. 'emo no'upu a'o ci sinto te mi'usnu muu ho tuayokeo.

²² acʉcʉhʉ na sinto, afnaso 'omo yonto emoo to honte ci cou, acʉhʉ mi'usnu muu ho tuayokeo.

²³ pafeni'sio muu to nooe'oca iesu kilisto na mengumisi!