pilipi 3 - buacou seiso no faeva esvʉtʉ

aʉ'ʉmtʉ ci moulʉlʉ

¹ maanat'ohaesa, panto te'on'a e'e. temu'sola no'ayumonʉ to nooe'oca ho kokaekaebʉ! te'o patvaha 'e o'ucula mi'usneni muu ho engha ci e'e ne auyusi, uk'acite nama koa ma'pap'ʉcʉ a'o, nama te apuyu koa ʉmnʉ muu.

² temula etngoeva 'ola popeiskuzkuzo ci cou, 'ola toetoehungu ci kuhku ho av'u, 'ai'olaeno emamahtʉicʉ no iachia s'e'honga 'e feango ci cou.

³ a'ʉmtʉsi, i'omo tiou no a'ʉmtʉ s'e'honga, o'as'a hin'i, ma a'to. maica ho mito boemi to piepiya to hamo ho m'ohkuyu; 'o ito etanveni zou kilisto iesu. o'ate'o bie'ocʉ nolac'o huyafi ci meesi.

⁴ hoci panonte ma'unano tee meelʉ bie'ocʉ no lac'o huyafi ci meesi, 'amante'o asuhcu meelʉ maica.

⁵ miveohi ho mo'ucu yayo cu tiou no s'e'honga. ahoi ho mo'ucu yayo zoucu cou'isolaelu, tma'usnu to suezopʉ to penyaming, zou mʉntʉ'ca no a'ʉmtʉ couhevulu. hoci e'usna no meot'ʉcʉ no 'ofifiha ta yutayakio, mi'o ma'hi'usnu to falisai;

⁶ hoci e'usnu no hia asno'zonʉ, o'ula akuzkuzoa 'o kiokai. ko'koeno, hoci tamza no moulʉlʉ homo meot'ʉcʉ to hoolicu to moose, uk'a cinte nama emzi no koica a'o.

⁷ at'inghi, i'o o'ula asonghoza ta'unano pano koasi ʉmnʉ, maitan'e mi'o nomio to kilisto, micu koakuzo ho os'o aiti.

⁸ o'amo anouc'o maica, os'o h'unasa hukokoakuzoa 'e acʉcʉhʉ ci hi'hioa, maica ho os'o angongohia ho mi'o bohngʉ to nooe'oca kilisto iesu. nomio to kilisto, os'o ciha 'e acʉcʉhʉ, ho ta'upa no pucu, te'o 'uciahe elʉa 'o kilisto.

⁹ a'sʉftonʉ yuecnguhu to kilisto. 'anami'o 'aoko mais'a mo yaa moulʉlʉ homo meot'ʉcʉ to hoolicu. 'e moulʉlʉ'u maitan'e mo i'mi ho mi'o tmaa'uzo to kilisto. isi pafeni to hamo eni. mo i'tohungu no tmaa'uzo.

¹⁰ la'uc'o tongsoyʉ no bohngʉ to kilisto, ta'hongi na meoino tonʉ no smoevovei, e'paevai no 'atutumiosi, emoothoma 'e nia hiasi mcoi,

¹¹ tata'za hoci'u maezo i'mi no mcoi ho smoevovei.

mi'usnu to isi mituhci ho pa'eusngʉcʉ

¹² o'aos'o yainca mi'ocus'a peihcʉ'ho, hocieno yainca cu a'sʉftonʉ. la'u a'cʉ'cʉnʉ peayofʉ, conino 'ucia elʉa 'o hnoo ic'o; a'ʉmtʉsi, akoeva no poa ehcʉ'ho ta oso'o mituhci. 'o kilisto iesu isicu auevahe elʉa a'o.

¹³ maanat'ohaesa, o'amocu os'o ta'unano os'ocu elʉa 'e hnoo eni; la'uc'o mimhocni tamo conci hi'hioa: 'aeno ta'payo'a 'e f'uhu, toteuyuneni na tonʉ ho peishʉhʉi 'emo yonta tuhcu'u ci hi'hioa.

¹⁴ mi'o mi'usnu ta os'o mituhci ho pa'eusngʉcʉ, akoyu no mayo no hnoo; 'e hnoo eni 'aeno 'omo tma'usnu ne pepe ci faeva ci nsou, isi ieni to kilisto iesu to hamo ho eyoho'a a'o ho poa tiovneni.

¹⁵ ko'koeno, ta 'ayumonato hoci pano micu yuepʉngi na piepiya te acʉhʉ maica nate ta'usni; hoci pano mo h'unasi ci hiamu ma'to'tohʉngʉ, tesi pahsansani to hamo na muu.

¹⁶ 'upena hoci mainenu, teto ieni to lato asonghoza fihi ci h'ofiha ho emosuhcu.

¹⁷ maanat'ohaesa, temu a'cʉ'cʉnʉ momaemaezo a'o. imzacu p'eac'eni ta temula huomza; temula momaemaezo tola momaemaezo a'mi ci cou.

¹⁸ o'ucula siho eucufna muu, maitan'e te'o yʉesʉ ho i'vaha eucufna: mo piyo ci cou la mihango to zuuzika to kilisto 'o lahe peipeis'ausna.

¹⁹ na tahe atotavei te meaapayo'ʉ, maica i'o hamohe 'ai'oeno iachihe cfu'o. lahe itanveni 'ola h'oinveni ci hi'hioa, conino o'te ta'payo'a 'o macucuma ta hpʉhpʉngʉ.

²⁰ nacu a'to zou 'o'oko to hpʉhpʉngʉ ne pepe; lato conci 'tohʉngʉ ho mooteo to leto'usnu ci nooe'oca, 'aeno 'o nooe'oca iesu kilisto te i'mi ne pepe ho ohpueho.

²¹ te boemi to tonʉ nosi poa meo'uzo 'e acʉcʉhʉ, ho poa aezuhu 'emo yoz'u ho ahtuo'te mcoi ci feangoto, poa totiski to kilisto na a'to, yaa psoevohngʉ ci feango.