pilipi 2 - buacou seiso no faeva esvʉtʉ

'tohʉngʉ 'o 'tohʉngʉ to kilisto

¹ inamo yonto kilisto ci nsoumu isicu nana poa yumamahtʉicʉ muu? ina himngonghisi isicu nana poucufna muu? mimucu nana tmucni to seilei? ta 'ayumonamu panocu nana a'ʉmtʉ yupania himngonghi ci 'tohʉngʉ?

² hoci panocu, te'o m'ene muu, temu la yaa hmʉskʉ cite mituhci, totiski ci himngonghi, totiski ci himcocoveoi, ho hmʉskʉ cila hia ma'to'tohʉngʉ, poa ngangcʉngcʉ na kokaekaebʉ'u.

³ 'otela angu ma'konvosʉ, 'ote konvosʉ noc'o ongko, la yupania einu, huepzi na mocmo mo tosa'ohe ta iachi.

⁴ teav'a anovac'o aʉt'ʉca 'e iachi, la yaeza siya no 'tohʉngʉ nate koa ʉmnʉ na mocmo ci cou.

⁵ temula 'tohʉngʉ na 'tohʉngʉ to kilisto iesu:

⁶ mo anana'o yaa yu'ausna to hamo, at'inghi o'aisi tiʉnpʉnpa na totiski afnaso ci tonʉ to hamo.

⁷ apuyu, isi iachia teongasi 'e acʉcʉhʉ, yaahe 'e yu'ausna no soskuskunu. tmuezuhu cou, boemi ta mi'ausna ta cou ho aopa'to.

⁸ iachi yuaceaco, meo'uzo ac'ʉhʉ no mcoi, a'vinano mcoi to zuuzika.

⁹ i'mi tan'e, isi hoepzeni to hamo, ac'ʉhʉ no sopepea, pafi to nosa'ohe to ma'o'ongko ci ongko.

¹⁰ te akoeva no einva 'o ongko to iesu, acʉcʉhʉ na yane pepe, ta hpʉhpʉngʉ, ho ina yane mʉ'eona ta ceoa cila mayayaansoua, te acʉhʉ mi'usnu ho m'ohkuyu.

¹¹ te tmunsohʉ 'o ngayohe ho esansano: zou nooe'oca 'o iesu kilisto, toehungu tohmomoengʉ to psoevohngʉ to amohamo.

tiskova ta hpʉhpʉngʉ

¹² songohia ci maananghia, ne mo'ula no'upu muu lamu asngʉcva talʉi a'o; maitan'e ho o'a mi'o no'upu muu, ntemu h'unasa talʉi a'o, la ma'eopeophi. o'te tosvo asno'zona aepʉnga na to'usni 'e iachi;

¹³ maica la asngʉcʉ yonta 'tohʉngʉmu 'o hamo ho yaahioa, poa smoekaebʉ muu ho a'ʉmta peiseafi na yonghu ci 'tohʉngʉsi.

¹⁴ 'upena hoci cuma nantemu hioa 'otes'ala eubut'u hocieno yupa eehcʉvho,

¹⁵ temueno meelʉ yonta mo kuzo ho aknon'i ci hpʉhpʉngʉ ho cocofkoya, meelʉ uk'a heo'tʉ ci 'o'oko to hamo. temula psoetiskou ta 'ayumona ta yatatiskova, mais'a 'o congeoha hola psoetiskou ta engʉca.

¹⁶ noyʉci 'e ceonʉ no nsou. hoci maica na temu hioa, to hiesi no i'vaho cmʉ'ho 'o kilisto, panote'ocu peelʉi etanveni, maica na eni tec'u peelʉi soomei na acʉcʉhʉ ci nia ngoseo'u o'amo peis'afeungu.

¹⁷ 'upenaeno te'o boemi ta hmuyu'u ho sʉ'teni, sahuneni ta imu yomza no singkoo ho sʉ'teni to hamo ci sʉ'ta, te'oc'o kaebʉ, a'vinano poa tma'upu no kaebʉ'u na muu.

¹⁸ totiski, temula kokaekaebʉ, yaeza poa tma'upu no kokaekaebʉmu a'o.

temote ho i'o 'ipafoti

¹⁹ la'u mie'ocʉ to nooe'oca iesu, tongsoya o'ate noana'o ta'u peelʉi skuna 'o temote ho uso muu, ta'u peelʉi talʉi na a'a'ausnamu ho mayo no ao'pou.

²⁰ zouc'o taini 'omo tohmʉskʉ ta 'tohʉngʉ'u, a'vinano i'mi no a'ʉmtʉ 'tohʉngʉ ho ta'ngongohia muu ci cou.

²¹ 'o mocmo lac'o ma'koyu note koa ʉmnʉ ta iachi, o'ala talʉa na hi'hioa to iesu kilisto.

²² at'inghi 'o lasi hia mi'usnu to cou to temote, leamu na'na asansana, ina natʉ'camia la mais'a natʉ'ca no na'vama, nomio to hi'hioa ta fukuin ho i'upu peisngongoseo.

²³ os'o tongsoya, hota'ucu cohivi na ta'u ataveia a'a'ausna, ta'u osnia popeoskuna ho poa uso muu.

²⁴ os'o amsʉ'eona taa'uzva 'o nooe'oca. ta o'ate noana'o ci hie tenasi iachia poa uso muu na a'o ho baito.

²⁵ yainca no koyu'u, mante'o poa yuovei muu 'o nat'ohaesa ci 'ipafoti. imu epeiya poa uhtan'e ho to'usnu a'o, i'upu a'o ho yaahioa, i'upu a'o ho ehtothomʉ.

²⁶ lasi na'na taaecingia muu, a'vinano isi cohivi ho imu tac'ʉhi homo tma'congo, mo na'no ma'nanac'o.

²⁷ mosoeno o'te a'ʉmtʉ tma'congo ho nia'tes'a kuzo, at'inghi isi coveoza to hamo, o'aisi anova coveoza, isi yaeza coveoza a'o, poa o'te elʉ no meoino nac'o a'o.

²⁸ ko'koeno, os'o h'unasa aupcieva 'ucia popeovoveiya, temu meelʉ kokaekaebʉ ho noteuyuneni; na eni 'ateeno yaeza peelʉi aapayo'a na nac'o'u.

²⁹ os'o tongsoya temu yonto 'ayumona to nooe'oca ho kokaekaebeni aʉt'ʉt'ʉca. temula einva 'emo maica ci cou;

³⁰ maica la nomio to yaahioa to kilisto ho conino mito sokoeva, ac'ʉhʉ no mici peismamcoi, lasi 'ucia peis'upi na o'a lamu peihcʉ'hi ho lamu to'usni a'o.