pilipi 1 - buacou seiso no faeva esvʉtʉ

¹ na a'o - poolo ho i'e temote zou soskuskunu to kilisto iesu. temia tmopsʉ ta tengami ho faeni ta mimu yone fuilipi ci afu'u 'o'oko to hamo, 'ai'oeno 'omo tma'usnu to kilisto iesu ci sinto, ho i'o masoso'ehti ho itola matoto'usnu ta kiokai ci haah'o.

² faeni'sio muu to amohamo ho ito nooe'oca iesu kilisto na mengumi, ho ina soanonosi!

'inolineni to poolo nate tiou ta tengami

³ cono hola'u talʉa muu, ta'ucu 'aveoveoyʉ to hamo.

⁴ cono hola'u 'inolineni muu la'u asngʉcʉ yaa kokaekaebʉ ci 'tohʉngʉ;

⁵ maica ahoi to ahoisi ac'ʉhʉ maitan'e. to hi'hioa no psoyaski ta fukuin lamu asngʉcva to'to'usni a'o.

⁶ la'u amsʉ'eona taa'uzva, i'omo yonto 'tohʉngʉmu ho i'eongceni tamo maica yonghu ci hi'hioa ci hamo, 'atesi ahta o'te a'cʉ'cʉna hi'hioa eni. aepʉnga no hiesi ho tac'u i'vaho cmʉ'ho 'o iesu kilisto.

⁷ la acʉhʉ asngʉcʉ yonta 'tohʉngʉ'u na muu! 'ate'oeno anana'va asngʉcva taaecingia muu; maica, 'upena ho mi'o yonta poo'usna maitan'e, hocieno ne mo'un'a meelʉ ziu ho ehcʉvheni 'e fukuin ho 'akasi, mimucu acʉhʉ tma'upu no isi pafeni a'o to hamo ci afnaso ci tonʉ.

⁸ isi cohivi to hamo, os'o yainca la'u titho to himngonghi to kilisto iesu ho a'ʉmta taaecingia muu, 'e e'e eni mo eʉlʉ.

⁹ i'o la'u 'inolineni muu: ina himngonghimu te fiho no a'ʉmtʉ mau'to'tohʉngʉ ho ino bocbochio ho acʉhʉ ohsuhcu,

¹⁰ temu meelʉ epei tomo so'ʉmnʉa. maicac'o, yono hiesi no i'vaho cmʉ'ho 'o kilisto, temu meelʉ cofkoya ho uk'a 'o'emamzi no koica.

¹¹ na h'oyunsovamu te nongcʉngcʉ na isi ieni to iesu kilisto ho yayo ci beahci no moulʉlʉ, ho psoevohngʉ tohmomoengʉ to hamo.

nomio to kilisto ho yaansou

¹² maanat'ohaesa, te'o poa cohivneni muu, i'e os'o elʉa isi apuya to'usni ho ohsuhcu 'e fukuin.

¹³ to ataveisi, acʉcʉhʉ 'o makekengsacu ta lasi yoni to honte, ho i'o afu'u yatan'e, mo acʉhʉ bochio ho mi'o nomio to kilisto ho noa poekotva.

¹⁴ ho mi'o noekotu, nama mo asuhcu yaa singkoo to nooe'oca 'omo botngonʉ ci sinto, asuhcu 'ʉteʉ, o'amo ake'i ma'sasmoyo ho psoyaska 'o e'e to hamo.

¹⁵ ahtuo'tesio, piyo cimo psoyaski to kilisto mo i'mi no smo'eubut'u ho ma'papak'i ci 'tohʉngʉ, at'inghi panto mo i'mi to ʉmnʉ ci 'tohʉngʉ.

¹⁶ 'eisi engha ta ataveisi mo i'mi no himngonghi ci 'tohʉngʉ ho maica 'o hioahe, maica ihe cohivi ho isi toveineni a'o to hamo 'e hi'hioa no ehcʉvheni 'e fukuin.

¹⁷ 'e isi engha ta auyusi homo psoyaski to kilisto o'amo cofkoya na 'tohʉngʉhe, mo i'mi no ma'papak'i, 'ucia ieni ho mi'o noekotu ho mooyai note asuhcu man'i ci ep'ʉcʉ.

¹⁸ at'inghi, na eni cuma na tesi koa natʉ'ca? o'ate cumasa mio emzo ho o'a na 'tohʉngʉhe, hoci maka psoyom'a 'o kilisto, te'ocu kaebʉ. te'on'a a'cʉ'cʉnʉ kaebʉ;

¹⁹ maica isi cohivi ieni no 'inolimu ho ino to'usnu to piepiya to iesu kilisto, 'ata'u ahtuo'te yuovei ziu.

²⁰ i'ela'u atva'esa tongsoya ho ta'usni: o'ate'o yuszozʉ no te'o anana'va sviei ci hi'hioa, apuyu conino, aavaho ta maitan'e la a'sʉftonʉ yaa 'ʉteʉ, 'upena hoci mcoi ho yaansoua, boemi ta aucunu ci a'o ho psoevohngʉ to kilisto.

²¹ maica hoci e'usna a'o, ho mi'o yaansoua, te nomio to kilisto; hoci'u mcoi, te asuhcu yaa tov'oha!

²² at'inghi, hoci'u yaansou ho meelʉ man'i na nte'o hioa cimo koa ʉmnʉ, o'ana os'o cohivi nte'ocu epei note mainenu.

²³ mi'o notaico tamo yusno ma'ngongoveo. mi'o na'no kaebʉ hoci'u mongoi ta hpʉhpʉngʉ, ho no'upu to kilisto, uk'a cite ʉmnʉhe tan'e.

²⁴ at'inghi, nomio muu, te asuhcu ʉmnʉhe hoci'u yaansoua.

²⁵ ta tan'e, la'u amsʉ'eona taa'uzva ho o'te ma'pepecvai; os'o cohivi te'on'a a'cʉ'cʉnʉ yaansoua, a'vinano te'o a'cʉ'cʉnʉ no'upu muu, to'usni muu ho poa asuhcu yusuhci na singkoo, asuhcu yaa kokaekaebʉ,

²⁶ na atuhcusi ho tena'u i'vaho baito muu, temu yonto 'ayumona to kilisto iesu ho asuhca ieni a'o ho etotofsi'za!

²⁷ ina te sotva'esa zou: na h'oyunsovamu la poa toseolʉ to fukuin to kilisto. maicac'o, 'upena hoci'u o'te meelʉ baito muu, te'oc'o acʉha cohivi lamu yaa totiski cite mituhci, mahtʉicʉ ho o'te aezuhu, tohmʉskʉ ci 'tohʉngʉ toteuyuneni na tonʉ ho nomio no singkoo ta fukuin ho 'aanana'o ehtothomʉ.

²⁸ yonta mav'ov'o ci hi'hioa ho o'te ngoheʉngeʉ no maosmoyo tola yutasufku muu ci cou; la 'ʉteʉ, ieni tan'e ho soomei, tehe ahta o'te elʉa na meaapayo'ʉ, temu asansano elʉ no to'usnu, maica na eni zou hi'hioa to hamo.

²⁹ mimu mayo no afnaso ci tonʉ ho fifiho to kilisto, o'a te anovac'o taa'uzva, te maezo nomio to kilisto ho tiou no 'atutumzo.

³⁰ maitan'e, temucu meelʉ toeei'si a'o ho i'upu yu'susuyumo; 'e yu'susuyumo eni, ohmu aiti o'ucula hioa, 'aimu ahtao'te tac'ʉhi, os'on'a asngʉcva hioa 'emo totiski ci yu'susuyumo.