petelo 2 3 - buacou seiso no faeva esvʉtʉ

teomneni ho i'vaho cmʉ'ho 'o nooe'oca

¹ songohia ci maananghia, 'e os'o tposi ci tengami maitan'e os'ocuc'o pa'ivaha. ta 'ayumona tamo yuso ci tengami, os'o conino poutʉs'ʉa muu 'emo ma'maica ci hi'hioa, poot'ova namo cofkoya ci lamu hia ma'to'tohʉngʉ.

² te'o poa talʉaneni muu 'o niala maee'e to eyongensa, hoi'o ohsila ieni to sitoo ho psoecʉ'ha muu ci mashʉyʉ to nooe'oca.

³ na sotva'esa zou, temu asansana cohivi, ta puesona ta hie, panto cou la noa atʉkca to iachi ma'konvosʉ, la yuyafo ho potfʉnga muu,

⁴ yainca:

⁵ ihe ezua o'te cumasa 'o hamo ho ohsi boemi no e'esi ho teyai 'e hpʉhpʉngʉ. 'e ceoa moso i'mi no chumu ieni no chumu ho teoyafa;

⁶ 'emo noana'o ci hpʉhpʉngʉ mo maezo i'mi to chumu, 'ai'o ohsieno aapayo'a to fozu ci chumu.

⁷ 'e engʉca ho ceoa maitan'e, te totiski ieni no e'e to hamo ho songacva, tena totea na hiesi ho tac'u noa yʉsvʉta, ho aapayo'a 'o o'amo tmaa'uzo ci cou, ko'ko boemi no puzu ho hmoi.

⁸ at'inghi, songohia ci maananghia, mo conci hioa o'atemula ta'payo'a: yono mcoo to nooe'oca, 'emo toposifova, mais'ac'o conohie, 'emo conohie mais'a mo toposifova.

⁹ i'o nooe'oca o'amo mais'a 'ela ta'to'tohʉngva ta cou, aononhʉnga o'te poa esmi na ohsila teomneni. apuyu. isi coveoza muu; maica o'aisi ʉmnʉa hoci cihi nate suhcʉhcʉ, isi totea hoci ma'vovei 'emo macicihi ci cou.

¹⁰ at'inghi, na hiesi no i'vaho cmʉ'ho 'o nooe'oca te mais'a thokeainʉ ho aemo'au cmʉ'ho. no hiesi ho mio, 'e maepepe tena yono meoino no yamumi ho aapayo'ʉ, 'e mouhpʉhpʉngʉ te yono yafeu ho yunzou, 'e ceoa ho acʉcʉhʉ ci macucuma te acʉha aapayo'a.

¹¹ ho teeno maica na tesi hia aapapayo'ʉ ta acʉcʉhʉ, ntemu no'usnu nomo mainenu ci cou? ntemu mino mo cofkoya, ho einu ci h'oyunsova,

¹² mooteo no hiesi to hamo, bitotonʉ ho poa aupcio cmʉ'ho. to hiesi ho mio. te hoapayo'ʉ 'e maepepe. te hos'ʉs'ʉ no yafeu 'e mouhpʉhpʉngʉ.

¹³ at'inghi, mito mooteo no ohsi la teomneni to hamo ci faeva ci hpʉhpʉngʉ; ne ne'e, mo no'upu na moulʉlʉ.

¹⁴ ko'koeno, songohia ci maananghia, ho mimueno mooteo no hiesi ho mio, nte asno'zonʉ yonto tuhcu to hamo ho acocofkoya, uk'a e'omamzi no koica ci h'oyunsova, naovei to hamo.

¹⁵ te ieni no buveici to nooe'oca ho noa 'oc'ocic'o to'usni, aʉlʉ mais'a 'o nanghia ci poolo moso boemi no ohsi la faeni to hamo ci moutʉs'ʉ ho pa'i'usni to tengami ho poucufna muu.

¹⁶ to nia afu'usi tengami ohsi acʉha e'upa 'emo maica ci hi'hioa. to tengamisi panto mo ake'i ngoveo ci e'a'ausna, lahe lua titha to o'amo motposʉ ho itola ma'vaevoezuhu ci cou ho eknon'a, mais'a holahe eknon'a 'o mocmo ci e'e to seiso, atavei iachi meapapayo'ʉ.

¹⁷ at'inghi, songohia ci maananghia, imucu aueva cohivi 'emo maica ci hi'hioa, ntela etngoeva, tehes'ala boemi tola epeu ci eʉsvʉsvʉtʉ ho e'usna nomo yupeevai ci ceonʉ, ho poa mongoi nomo mahtʉicʉ cila yac'i.

¹⁸ temula yonto 'ayumona to nooe'oca - to mengumi to nooe'oca iesu kilisto ho ino hiato honga, a'cʉ'cʉnʉ ohsuhcu, no'usnu'sio to nooe'oca na psoevohngʉ, ahoi maitan'e ac'ʉhʉ no 'auesiesi! 'aamen.