petelo 2 2 - buacou seiso no faeva esvʉtʉ

meyoyongensa

¹ ne auyusi 'o meyoyongensa mosola yuyafo ta 'ayumona ta 'isolaelu; totiski panto tenala yuyafo ta 'ayumonamu ci meknuyu ci lema'cohio. ihe aasoeza e'ayumona 'ote koa meaapayo'ʉ ta cou ci h'omahsʉfta, o'te taa'uzva 'o mosola to'usnu ci nooe'oca, monmon'i iachi noa aapapayo'a.

² e'vono maica, mioc'o engha botngonʉ ci cou 'ola peis'ofeihni to lahe hia 'aʉnpʉnpʉ ci peipeis'ausna, 'amaknocu i'mi to lahe peipeis'ausna ho elʉ no ekuzkuzoa 'e so'emio.

³ 'emo maica ci meyoyongensa nomio no ma'mamso 'o iachihe ma'konvosʉ, la boemi to isic'o teoteai ci ehohamva ho mi'usnu muu ho tʉspʉcʉ no yupasʉ. ahoi ne noana'o, 'o yʉsvʉtʉ to hamo lasi conino totea 'emo maica ci cou; o'atehe ahta noszozi na meaapayo'ʉ!

⁴ ma'i ohsi peteongasa to hamo 'o moso peiskuisi ci tensi, a'vinano to'ayumoneni ne vooecʉvcana, poekotva to 'ayumona tomo vooecʉvcʉ. mooteo no yʉsvʉta.

⁵ yaeza o'aohsi h'unano peteongasa to hamo na nia noana'o, a'vinano boemi to fozu ci chumu ho epʉna na moso uk'a hamo na 'tohʉngʉ ci cou, ohsic'o to'usni 'omoso psoyaski to moulʉlʉ ci noa ho i'omo pitu ci cou.

⁶ ohsi patkuzoi to hamo 'omo yuso ci hosa sotoma ho 'omola, mʉchʉ no puzu ho poa hoapapayo'ʉ, poa huthaeveni tola o'te tmaa'uzo ci cou.

⁷ ohsi to'usni 'o ʉmnʉ ci cou looto; 'e looto lasi nomzi 'ola peis'usnu no smoc'ou ci kuici cou ho meoino ma'nanac'o.

⁸ 'e ʉmnʉ ci cou homo no'ayumonʉ to kuici cou, la huhucmasa aiti, huhucmasi tmalʉ tomo kokuzo ci hi'hioa, la na'no ma'tutumzo 'o 'tohʉngʉ.

^9-10 lasi cohivi to nooe'oca te yainenu na tesi hia to'usnu tola tmaa'uzo ci cou ho poa mongoi no hʉsvʉta, yaeza cohivi te yainenu ho teongasi 'omo kuici cou, aavaho 'ola peisnou no smoc'ou ci feango, ho i'ola potfʉngʉ to tonʉ to hamo ci cou, tasi toteni no hiesi no yʉsvʉtʉ ho patvovei. 'emo maica ci meknuyu ci lema'cohio la yameomʉ ho 'aʉnpʉnpʉ, o'amo anou o'te einu tonte so'einva ne pepe, lean'a apuya aokoe'iya;

¹¹ 'o tensi cimo yaahe tonʉ tamo maica ci meknuyu ci lema'cohio. o'ala mako titho no aokoe'i ci e'e ho mi'usnu to hamo ho ehpʉngneni.

¹² at'inghi, 'emo maica ci cou mo mais'a yuansou, asonghoi anana'va ayocneni no tʉtpʉta ho chua; lac'o fiho no yu'ausna ho aot'ou, ekuzkuzoa 'o o'aihe asansana ci hi'hioa. tena totiski mais'a yuansou ho noa aapayo'a.

¹³ la mooyai 'atutumio, tena ahtao'te tanvonvi na beahcisi. ina lahe yainca mo kokaekaebʉ, 'aeno yonta tiskova ho hioa nate ma'mamso ta feango ci hi'hioa. la coca'i; hola mai'upu muu ho bonʉ, conino ina moezʉezʉhʉ na lahe kokaekaebeni!

¹⁴ 'o coeke ci mcoohe la teochʉmʉ to noasisi, o'ala ahtu ma'mamso na peis'usnu no kuisi ci koyu. la topano tola yoheoz'u ci cou; 'o 'tohʉngʉhe micu at'ocʉ no konvosʉ; zou 'oahngʉ to tesi patvovei to hamo!

¹⁵ la mongoi to atuhcu ceonʉ, emo'usnu tomo emopeu, mo smai'ofeihni to ceonʉ to palan ci oko to pielu. 'o palan 'aeno 'omo ma'konvosʉ to ca'i ci yupasʉ,

¹⁶ i'mi to iachisi peiskuisi ho noa koica. i'omo o'te meelʉ aomotʉ'ʉ ci lova cis'a meelʉ aomotʉ'ʉ ho potani 'o yongensa homo angu peis'epo.

¹⁷ 'emo maica ci cou mo mais'a micu keolo ci esbobuka, mais'a isi peaemo'neni no poepe ci cmʉcmʉ; 'o hamo isicu songacveni no tahe yoni ne voecʉvcʉ ci mʉ'eona.

¹⁸ la mo'engho tomo bitano ho eloʉngʉ ci e'e, la boemi to boevovoyo ci koyu ho topani 'o lan'a aʉlʉ momeesih'i to kokuzo ci h'oyunsova ci cou.

¹⁹ lahe yainca tehe fii no ziu 'e cou, la iachi tolei to kokuzo ci h'oyunsova; maica 'e cou hoci atʉkca no cuma, 'acueno tolei no cuma.

²⁰ 'e cou hoci i'mi homo bohngʉ to nooe'oca - iesu kilisto, i'mi ta tonʉ no tokuzo ta hpʉhpʉngʉ ho tomeesih'i, ataveiya i'vaha tʉtpʉta ho noa atʉkca, na atotaveisi tamo maica ci cou te asuhcuhe kuzo ne auyusi.

²¹ ihe cohivi pano ceonʉ no moulʉlʉ, nama mongoi ta ihe tiova ci socofkoya ci mashʉyʉ; 'emo maica ci cou te ʉmnʉhe hoci o'te bochio tamo moulʉlʉ ci ceonʉ.

²² mo emio 'o mahtuyaecihi, i'o a'a'ausnahe aʉlʉ mais'a <'o av'u lasi ooveia 'o ohsi teavta>, maezo mais'a <'o feʉ'ʉ cu 'afeunga toʉlʉi, mo yuovei to lingki ho tmaifeifei'i.>