petelo 2 1 - buacou seiso no faeva esvʉtʉ

¹ na a'o - saimong petelo zou sitoo ho soskuskunu to iesu kilisto. te'o tmopsʉ ta tengami ho faeni tamo boemi to moulʉlʉ to hamo ho ito leto'usnu ci iesu kilisto, ho maezo a'mi ho tma'upu no sopepea ci singkoo ci cou:

² temu'sola ieni ho mimu bohngʉ to hamo ho ito nooe'ocato ci iesu kilisto ho elʉ no atngaso ci mengumi ho soanono!

epeiya ho eyoho'ʉ to hamo

³ ina tonʉ to hamo isicu acʉha faeni a'to na teto tititha ho mito boemi no singkoo ho yaansou; 'e mengumi eni isi ieni no bohngʉ tomo eyoho'ʉ a'to ho poa tma'upu no psoevohngʉsi ci hamo ho elʉa.

⁴ maicac'o, isi faeni a'to 'omo atva'esi meoisi ho atva'esa ngohia ci mengumi; ieni ta mengumi tan'e, mimu meelʉ pkaako tate koa meaapayo'ʉ ci ma'konvosʉ ta hpʉhpʉngʉ, ho tma'upu no yu'ausna to hamo.

⁵ nomio tan'e, temu pnanfi na tonʉmu ho yono singkoo ho topuhngi na yonghu ci yu'ausna, na yonghu ci yu'ausna topuhngi no mau'to'tohʉngʉ,

⁶ na mau'to'tohʉngʉ topuhngi no atʉkcʉ, na atʉkcʉ topuhngi no luaveica, na luaveica topuhngi no ma'einu,

⁷ na ma'einu, topuhngi no himngonghi no 'oahngʉ, na himngonghi no 'oahngʉ topuhngi no himngonghi ta acʉcʉhʉ.

⁸ 'aeno eni nantemu anana'va seocavi ci yu'ausna, hocimucu acʉha poa noemʉhʉ eni, 'atemu ahtuo'te h'unano tvaezoya h'unano mipo'ʉ'ʉmtʉ no 'ucia a'ʉmta honga 'o nooe'oca iesu kilisto.

⁹ at'inghi, namo aviovio tamo maica ʉmnʉ ci yu'ausna ci cou mo buhnanʉhtʉ, mo bʉkngʉ, ta'payo'a na nia noana'o ci kuisihe ho isicu toʉlʉi toonvi.

¹⁰ ko'koeno, maanat'ohaesa, temula h'unano asno'zonʉ, temu 'auesia ta'hongi ho ohsila eyoho'a ho epeiya to hamo; hocimucu ta'hongi eni, 'anatemu 'aoko suhcʉhcʉ.

¹¹ maicac'o, temu a'sʉftonʉ mayo no tonʉ, meelʉ yʉmeʉmʉ no 'auesiesi hpʉhpʉngʉ to nooe'oca - 'o leto'usnu ci iesu kilisto.

¹² i'mi tan'e, imu e'vonocu cohivi na eni, a'vinano bʉʉlʉlʉcu ta imu tiova ci so'emio, te'oc'on'a a'cʉ'cʉna o'te tosveni poutʉs'ʉa na muu.

¹³ os'o yainca no koyu'u, hocin'a mako conohie na te'o hia yunsoua, nte'o asngʉcva to'usni muu ho poa talʉaneni 'e hi'hioa eni.

¹⁴ os'o cohivi, 'anate noana'o ta'ucu mongoi tate anana'o kuzo ci feango; na eni isi eʉsvʉta a'o to nooe'oca iesu kilisto.

¹⁵ te'o pnanfi ho ta'to'tohʉngva ho poa talʉaneni muu 'e hi'hioa eni no ataveisi ho ta'ucu mcoi.

'akasi 'o psoevohngʉ to kilisto

¹⁶ i'e imza eʉsvʉta muu cimo natʉ'ca to meoino no tonʉ ho i'vaho cmʉ'ho 'o nooe'oca iesu kilisto ci hi'hioa, o'a mos'a i'tohungu no isic'o teoteai ho e'ankʉ ci ehohamva; omzala aʉla iachia aiti 'o hiasi taunona'vʉ.

¹⁷ ne moso i'mi to hamo ho tiova 'o so'einva, ho psoevohngʉ, momza acʉhʉ no'upu. ne mio, ohsi mi'usni to sopepea psoevohngʉ ci hamo ho yainca:

¹⁸ mimza noteuyunu to socofkoya ci hcuyu, aʉla iachia talʉi 'emo i'mi ne pepe ci fihngau.

¹⁹ maicac'o, 'o ohela epeaska to eyongensa ci e'e imza h'unasacu ta'sansana. temula a'ʉmta buyuyue'iya 'e e'e eni; maica mo mais'a conci lampu mo psoetiskou tomo voecʉvcʉ, ac'ʉhʉ ho tac'u moseo'ohngʉ. noc'ʉhʉ no hiesi ho tac'u psoetiskou ta 'tohʉngʉmu 'o tiskova to congeoha.

²⁰ ina te sotva'esa zou, temu atatalʉa: 'o afu'u eyoyocʉ to seiso o'ate i'mi no iachi 'tohʉngʉ ho esansana.

²¹ maica, uk'a cimo conci eyocʉ mo i'mi no 'tohʉngʉ ta cou, mamo tiou no poot'ova to seilei 'o eyongensa ho psoecʉ'ha 'e e'e to hamo.