petelo 1 5 - buacou seiso no faeva esvʉtʉ

mamomoatʉ'nʉ to hamo

¹ te'o ieni ta ongko no'u coolo ho mi'usnu ta mimu maezo coolo ci haah'o ho noa 'tohʉngʉ. na a'o la'u 'akasi 'o 'atutumzo to kilisto ci cou, tma'upu to tenala epa'teni ci psoevohngʉ ho noana'o. te'o m'em'ene muu,

² la aʉt'ʉca 'o isi toveineni muu to hamo ci mamomoatʉ'nʉ, peiskakaebʉ ho maino 'tohʉngʉ to hamo ho aʉt'ʉca, o'ate i'mino meumzomzo; o'amo akoyu no m'ehno ho yaahioa, mate iachi smoekaebʉ ho fifiho.

³ teav'a anga ayʉca 'o lamu aʉt'ʉca ci moatʉ'nʉ, mate mooyai no tehela hu'ofeihni to moatʉ'nʉ.

⁴ maicac'o, ho tena cmʉ'ho 'o meoino le'aʉt'ʉcʉ moatʉ'nʉ, temueno meelʉ tiou to 'auesiesi o'te afsi na psoevohngʉsi ci tafange.

⁵ totiski, 'emimu yu'fafoinana ntemu meo'uzo to mamameoi. acʉhʉ ekuyungu to ma'einu ci taf'u, yupania fifiho; maica isi yainca to seiso:

⁶ ko'koeno, temula noskufu to sotonʉa ci hamo ho ma'einu, maicac'o, ho tac'u seoseolʉa na hiesi tasila poepza na muu.

⁷ temula toveineni to hamo na afu'u ma'tipvongʉ. maica lasi siya no 'tohʉngʉsi muu.

⁸ temu aʉtʉs'ʉ ho etngou! 'o hangʉmu - 'akuma aʉlʉ mais'a muhiei ci sisi ho biyavovei, eseiseiti no tesi peelʉi pnʉska ci cou.

⁹ temula poa mahtʉicʉ na singkoo ho yutasufka, maica imu cohivi namo tmaa'uzo to nooe'oca ci maanat'ohaesa ta mauhpʉhpʉngʉ mo acʉhʉ maezo smaimio tamo totiski ci 'atutumio.

¹⁰ at'inghi, ataveisi ho mimu tiou ta akameosʉ ci 'atutumio, i'ola mofi to afu'u mengumi ci hamo, 'ai'omoeno eyoho'ʉ muu ho ieni to kilisto iesu ho yuecnguhu ho toehungu tma'upu no psoevohngʉ ci hamo, 'atasi ahtao'te iachia p'eʉlʉlʉa. amamahtʉica, pafi no tonʉ ho ino tmaʉlʉlʉ ci totnguca na muu.

¹¹ no'usnu'sio to hamo na tonʉ, 'auesiesi uk'a noc'ʉhi! 'aamen.

sotavei ci tuayokeo

¹² yonto hia to'usnu to meot'ʉt'ʉcʉ ci siila, mi'o tmopsʉ ta moc'o nanʉhtʉ ci tengami ho faeni muu. te'o poucufna muu, a'vinano 'akasi 'o mou'ʉmtʉ ci mengumi to hamo. temula yonta mengumi tan'e ho bʉʉlʉlʉ o'te aot'ou.

¹³ 'omo totiski muu ho noa epeiya ci kiokai ta papilong mo mi'usnu muu ho tuayokeo; 'o oko'u ci maluko maezo tuayokeo muu.

¹⁴ temu boemi no cofkoya ci kisu ho yupa tuayokeo. 'e mimu tma'usnu to kilisto ci macicihi acʉhʉ'sola elʉ no soanono!