petelo 1 4 - buacou seiso no faeva esvʉtʉ

aezuhucu ci h'oyunsova

¹ homoeno tiou no 'atutumzo 'o feangosi to kilisto, ntemu maezo boemi no totiski ci koyu ho seu'heni 'e iachi, maica ina mohcula mino 'atutumio ci cou micu ateno no kuisi.

² ahoi maitan'e, na ang'osʉsi no temun'a mia ci hie ta hpʉhpʉngʉ temu poa aʉt'ʉcneni no 'tohʉngʉ to hamo, teav'ana i'vaha poa atʉkceni no ma'konvosʉ ci 'tohʉngʉ ta cou.

³ ne auyusi ohmula au'hi'hisa 'e hie, hioa 'o lahe ʉmnʉa hioa to couyafana, h'oyunsova na smoc'ou, 'aʉnpʉnpʉ, voemi, eabobonʉ, soekuzkuzo, ho i'ola so'eʉsʉ'nova ci m'ohkuyu to uacoua.

⁴ maitan'e o'ana lamu peis'upu to lahe hia 'aʉnpʉnpʉ, uk'a atʉkcʉ ci h'oyunsova, lahe yamceni, i'mizi no aokoe'iya muu.

⁵ at'inghi. tenala ahtuo'te mi'usnu to tena yʉsvʉtʉ to mcoi ho yaansou ci hamo ho tasvʉta na ohela hioa.

⁶ nomio tan'e, 'e fukuin ohola yaeza psoecʉ'ha tomo mcoi ci cou, faeni tamo totiski to mocmo ho tiou no yʉsvʉta 'e feango ci cou, ko'ko peelʉi poa mais'a 'o hamo ho yunsou na piepiyahe.

pafi no mengumi to hamo ci ʉmnʉ ci le'aʉt'ʉcʉ emoo

⁷ tec'u noc'ʉhi na puesona ta acʉcʉhʉ. temula bumemeala noʉyʉci 'e iachi, aʉtʉs'ʉ 'inoli.

⁸ na sotva'esasi tela aʉ'ʉmtʉ yupa himngonghi. maica ina himngonghi lasi peelʉi aapayo'a na man'i ci kuisi.

⁹ la asno'zonʉ yupa aʉt'ʉt'ʉcʉ, 'otela eubut'u.

¹⁰ 'e macicihi ho mioeno acʉhʉ yaa mav'ov'o ci mengumi ho ʉmnʉ ci le'aʉt'ʉcʉ emoo to hamo, 'atelaeno maino imu tiova to hamo ci mav'ov'o ci mengumi ho yupa fifiho.

¹¹ siya nala eʉsvʉsvʉtʉ, te eʉsvʉsvʉta 'o e'e to hamo; siya nala fifiho, te i'tohungu no isi faeni to hamo ci tonʉ ho fifiho, te ko'ko meelʉ i'mi to iesu kilisto ho psoevohngʉ to hamo 'e acʉcʉhʉ ci hi'hioa. na psoevohngʉ ho tonʉ acʉhʉ'so no'usnu to hamo, ac'ʉhʉ no 'auesiesi! 'aamen.

buveici no 'atutumzo

¹² ngohia ci maananghia, mimu esmi tamo totiski no puzu ci hʉsvʉta, teav'a yamceni, mais'a mo yupteilʉ nomo afnaso ci hi'hioa.

¹³ mantemu kokaekaebʉ ho mimu e'to'usnu to 'atutumio to kilisto, teeno a'sʉftonʉ kokaekaebʉ ho tac'u aopa'to na psoevohngʉsi.

¹⁴ hocimu i'mi ho mimu'so to'ofeihni to kilisto ho noa aokoe'iya, te yaa ʉm'ʉmnʉ; te humzi tan'e na psoevohngʉ ci seilei, 'aeno piepiya to hamo, mo yonta feangomu.

¹⁵ at'inghi, ta taicomu hoci yaa 'atutumio, 'otes'aso i'mi no opcoi, yaksai, popeiskuzkuzo, hocieno i'mi no buusumsu ho 'atutumio.

¹⁶ hoci i'mi no mio'so tmaa'uzo to kilisto ho tiou no 'atutumio, o'ate ma'kokoe'i, mate i'mi ho osko sikuhca 'o ongko to kilisto ho psoevohngʉ to hamo.

¹⁷ micu sʉc'ʉhʉ 'e hiesi no yʉsvʉtʉ, te aueva yʉsvʉta 'e 'o'oko ta emoo to hamo. hoci ahoi a'to na yʉsvʉta, i'omo o'te tmaa'uzo to fukuin to hamo ci cou ma tenaeno mainenu na tahe atotavei?

¹⁸ aʉlʉ maito isi engha to seiso: micu engha ngoveo hoci elʉ no to'usni 'e coumoʉlʉlʉ. 'omo yaa kuisi ci cou mates'aeno mainenu?

¹⁹ ko'koeno, i'omo i'mi no 'tohʉngʉ to hamo ho tiou no 'atutumio ci cou, nte o'te tosvo a'cʉ'cʉnʉ boemi no ʉmnʉ ci peipeis'ausna, ho peispa'teni ho miko conino a'sʉftonʉ tmae'ocʉ to mou'ʉmtʉ ci mosola mooyai ta hpʉhpʉngʉ ci nooe'oca.