petelo 1 3 - buacou seiso no faeva esvʉtʉ

navconga

¹ totiski, 'e mamespingi, ntemu meo'uzo to iachi vcongʉ, te ko'ko buhmi no lamu ʉmnʉ ci peipeis'ausna na o'amo tmaa'uzo ci vcongʉ ho aezuhu. o'atemu nama man'i ci e'e,

² maica tehe aiti na lamu hia cofkoya ho peislʉlʉ ci peipeis'ausna.

³ 'ote noe'ocʉ no mismisisi ho ayoyonghua 'e iachi, 'ote ma'nou no yainca mate ti'vo'vona na f'ʉsʉ, maasku no king ci ehoehongsʉ, maceofʉ nomo mainenu ci yʉsʉ.

⁴ ntemu yaa yonghu ci 'ayumona, boemi no o'ate aapayo'ʉ ci ma'cocacni ho teyai ehoehongsʉ; na eni isi atva'esa hupepea to hamo.

⁵ maica, i'o mosola mingeou to hamo ho acocofkoya ci maamespingi. ohela yaeza ieni no meot'ʉcʉ no vcongʉ ho ehoehongsʉa na iachi.

⁶ 'amoeno maezo maica 'o saala; la meot'ʉcʉ to 'avulahamu, yainca . lamu yaa ʉmnʉ ci peipeis'ausna, o'te smoyo no cuma, temucu acʉhʉ oko no mamespingi to saala.

⁷ totiski, na hahocngʉ, lamu iepoepohʉ 'o vcongʉ ho yunsou, nte peu'uzva hola'so yoz'uhe muu. la einva, maica mo totiski muu ho tiou no isi pafeni to hamo ci faeva ci nsou. hoci meelʉ maicac'o, na 'inolimu o'a nate yaa eftongi.

nomio no moulʉlʉ ho 'atutumio

⁸ hoci ensoha: temu aa'pucu tohmʉskʉ. yupa ma'cocoveoyi, himngonghi mais'a nat'ohaesa, boemi no ma'cocacni ho ma'einu ho yu'tat'ʉcʉ.

⁹ 'ote boemi no kuzo ho auski no kuzo, boemi no ekvo'ʉ ho euski ekvo'ʉ; apuyu, la boemi no tooyokeo ho evei, maica ina atuhcusi to hamo ho isi eyoho'a muu tesi akoeva no pafi no ʉm'ʉmnʉ.

¹⁰ aʉlʉ mais'a 'o isi engha to seiso: siya nate tma'upu no 'aveoveoyʉ ci hia yunsou. tata'e no mino mo ʉmnʉ ci hie, te tomʉti 'e umo hoci ekuzkuzo, tomʉti 'e sumsu hoci meknuyu,

¹¹ nte totoefʉngʉ no kuzo ho peis'ʉ'ʉmnʉ, conci 'tohʉngʉ ho biebimi no moususeomʉ.

¹² maica lasi so'eʉt'ʉca to hamo 'o coumoʉlʉlʉ, talʉi 'o 'inolihe; at'inghi la teokvo'ʉ tola peiskuzkuzo ci cou.

¹³ hocimu asno'zonʉ peis'ʉ'ʉmnʉ, siya nate akuzkuzo muu?

¹⁴ 'upena hocieno nomio no moulʉlʉ ho 'atutumio, tec'o maezo a'ʉmtʉ ʉm'ʉmnʉ! 'ote smoyo ho lahe auepihza to mocmo ci cou, maezo 'ote ngoheʉngeʉ.

¹⁵ la yaa ma'einu to kilisto ci 'tohʉngʉ, la atuhca mie'oci. hoci panonte mi'usnu muu ho poa esansaneni nalamu ta'usni ta 'tohʉngʉ, la coni no ae'ayocʉ ho yut'inga;

¹⁶ at'inghi tela boemi no ma'cocacni ho ma'eaceaco ci koyu ho yut'ingi. la yaa cofkoya ho ʉmnʉ ci 'tohʉngʉ, poa iachi ma'kokoe'i 'ola aokoe'i muu, ho lamu tmaa'uzo to kilisto ho popeis'ʉ'ʉmnʉ.

¹⁷ hoci zou 'tohʉngʉ to hamo na osko elʉa ci 'atutumio ho miko peislʉlʉ, na eni te na'nohe tosa'o no nomio no peiskuzkuzo ho 'atutumio.

¹⁸ maica 'o kilisto mosola maezo peisnʉskʉ aepʉnga ho mcoineni na kuisi. isi peʉezi to moulʉlʉ 'o 'oha moulʉlʉ, akoeva no hafa muu ho uhto tuhcu to hamo. noa opcoza 'o feangosi, at'inghi isi pa'eunsova 'o piepiyasi.

¹⁹ ohsila ieni ta piepiya tan'e ho mi'usnu to isi poekotva ci piepiya ho epeaska na e'e to hamo.

²⁰ 'emo maica ci piepiya o'amo tmaa'uzo to hamo - 'e piepiya eni 'aeno 'o ohsila uveica totea to hamo ci piepiya ne ohsin'a ayoca 'o 'apangʉ to noa. ne mio o'amo botngonʉ 'o moso yʉmeʉmʉ to 'apangʉ, mosoc'o voyu ci cou, oho i'mi to chumu ho to'usni;

²¹ 'e chumu eni 'aisieno epo'usa no toonono. maitan'e 'e toonono eni isi to'usni muu, o'a isis'a yainca isi toonvi na ca'i ta feangomu, mamo boemi no cofkoya ci 'tohʉngʉ ho mi'usnu to hamo ho ekoyu; 'e toonono eni isi ieni to smoevovei to iesu kilisto hocu to'usni muu.

²² micu uhne pepe 'o iesu kilisto, maicutan'e mo yonto vhona to hamo, aʉt'ʉca na afu'u tensi ho inala aʉt'ʉcʉ ho yaa tonʉa ta mouhpʉhpʉngʉ.