petelo 1 2 - buacou seiso no faeva esvʉtʉ

yaansou ci fatu ho socofkoya ci hpʉhpʉngʉ

¹ ko'koeno, temula yuse'va na afu'u kuzo ci hi'hioa, 'ote i'vaho meknuyu, me'ʉ'ʉmnʉ, smo'eubot'u, hocieno eayaezoyʉ no cou ci e'e;

² la mais'a 'o mon'a yuhoi ci foinana, conino tongsoyʉ no cofkoya ci nun'u no piepiya, ieni ho yusuhci, elʉ no to'usnu.

³ aʉlʉ mais'a 'o isi yainca to seiso:

⁴ la smacmu'u to nooe'oca - yaansou ci fatu; ihe e'vono ciha ta cou, at'inghi isi epeiya to hamo ho angongohia.

⁵ temula maezo mais'a yaansou ci fatu, titha m'eac'ʉ nomo tma'usnu no piepiya ci seiten, yonto ic'o ho socofkoya ci saisi, ieni to iesu kilisto ho sʉ'teni ci isi ʉmnʉa to hamo cimo no'usnu no piepiya ci sʉ'ta.

⁶ maica isi yainca to seiso: mi'o epei tamo sopepea ci fatu totnguca ta cuculili ta tonghifa ta sii'an; namo afu'u tmaa'uzo ho noe'ocʉ ci cou, o'ate ahtu ma'papayo'ʉ.

⁷ mi'usnu ta mimu tmaa'uzo ci cou, 'e fatu eni mo a'ʉmtʉ sopepea; at'inghi, hoci mi'usnu to o'amo tmaa'uzo ci cou: 'e ihe tose'veni tamo yaahioa ci fatu. cu sotva'esa ci totnguca!

⁸ to h'unasi ci isi tposi to seiso isi yainca: 'emo coni cite paepekosi ci fatu. tee ekosi ta cou ci fatu. ho ihe ekosi, maica ho o'a ihe taa'uzva 'e a'ʉmtʉ e'e; na eni 'amoeno maezo i'mi no 'tohʉngʉ to hamo.

⁹ at'inghi, isi epeiya to hamo ci suezopʉ na muu, zou saisi to emoo to honte, socofkoya ci hpʉhpʉngʉ, 'o'oko to hamo. isi epeiya to hamo na muu ho poa mongoi no voecʉvcʉ, yʉmeʉmʉ no tiskovasi, ho poa psoyaski no taunona'vʉ ci lasi peipeis'ausna.

¹⁰ ne auyusi o'a 'o'oko to hamo na muu, maitan'e zoucu 'o'okosi; ne auyusi o'a ohsila coveoza to hamo, maitan'e mimucu elʉ no himcocoveoisi.

soskuskunu to hamo

¹¹ songohia ci maananghia, ho mimu yonta hpʉhpʉngʉ moc'o nouchichipi, la covnʉ ci cou. te'o eucufna muu. teav'a poa 'aʉnpʉnpʉ no poc'ou si feangomu; 'emo maica ci poc'ou la conino ehtothomneni 'e piepiya.

¹² ho lamu no'ayumonʉ ta couyafana, ntemula yaa peislʉlʉ ci peipeis'ausna, i'ola ekuzkuzo, ho maus'os'osʉ muu ci cou, i'mi ho lahe aiti na lamu hia popeislʉlʉ, yono hiesi no ivaho cmʉ'ho 'o nooe'oca, tehe ta'usna to hamo na psoevohngʉ.

¹³ nomio to nooe'oca, temula meo'uzo tola aʉt'ʉt'ʉcʉ ta yatatiskova: 'ai'oeno la suepe ci honte.

¹⁴ ho i'olasi tovei cila himhohioa tohno to ʉmnʉ ho patvovei 'omo kuzo ci taicini.

¹⁵ maica na 'tohʉngʉ to hamo. tesi poa boemi no lamu hia popeislʉlʉ ho tomʉti 'o ngayo tola ma'nongonongo ci cou.

¹⁶ zou couziu na muu, at'inghi teav'a titha na ziu ho tofeʉ'si na afu'u kokuzo; tela noa soskuskunu to hamo.

¹⁷ temula einva 'emo macicihi ci cou; la ngohia 'omo tmaa'uzo to nooe'oca ci nanat'ot'ohaesa; la smoyoa 'o hamo; einva 'o honte.

yoyayaeza 'o buveici no 'atutumzo to kilisto

¹⁸ i'ola noa soskuskunu, temula einu ho meot'ʉcʉ to tauke, o'a anouc'o 'omo ma'cocacni ci tauke na temu la yaica, i'omo mouyʉcʉ ci tauke teec'o totiski.

¹⁹ hocimu i'mi no ta'hongi ho zou 'tohʉngʉ to hamo na eni, meelʉ buveici ta o'antemu anana'va elʉa ci 'atutumio, 'atasi ahtao'te pafi no ʉm'ʉmnʉ to hamo na muu.

²⁰ hocimu nomio no peis'epo ho noa ti'usna, cuma nate koa emomoengʉa? 'ai'olac'o i'mi no peis'ʉ'ʉmnʉ ho buveici no 'atutumio ci cou na tesi pafi no ʉm'ʉmnʉ to hamo.

²¹ na atuhcusi ho isi eyoho'a to hamo na muu 'amoeno yontan'e; maica 'o kilisto mo nomio muu ho 'atutumzo, teongasneni no temula huomza, akoeva no 'ucia poa msa'ofeihni no cocaphʉsi na muu.

²² o'amosola peismi no kuisi; uk'a ci mosola tmalʉ hoci meknuyu.

²³ o'ala mahsuski ho isi ekvo'i, o'amo maosmoyo ho isi tikuzkuzoa, lac'o mingeou nola moulʉlʉ ci leyʉsvʉtʉ.

²⁴ isi iachia hafa to kilisto na kuisito ho uhto zuuzika, poa o'tena i'vaho yaansou no 'ayumona no kuisi na a'to, c'o nomio no moulʉlʉ ho yaansou. i'mi to isi tiova ci alolongʉ, mimu meelʉ yov'o.

²⁵ ne auyusi mohmula mais'a eapayo'ʉ ci moatʉ'nʉ, maitan'e mimucu yuovei, to'ofeihni to lepocengi ho ito lemʉʉt'ʉcʉ to piepiyamu.