ngalatea 6 - buacou seiso no faeva esvʉtʉ

e'paevai no cvʉhʉ

¹ maanat'ohaesa, hoci panola 'oc'ocic'o peis'epo, i'e mimucu tma'usnu no piepiya ci cou la boemi no bumama'cocacni ho eoveiya. temula maezo iachi bumemealʉ, ci tes'a maezo noa eepecvazi.

² la yupa e'paevai nola ecvʉhneni, hoci maica isicu peihcʉ'hi na mashʉyʉ to kilisto.

³ i'ola uk'a maka conci peelʉi ho iachi ma'unano mo afnaso ci cou isic'o peknui 'e iachi.

⁴ 'emo macicihi ntela yue'iya na iachia peipeis'ausna; hoci pano mo ʉmnʉ ci peipeis'ausna, te peelʉi etotofsi'za, o'ate 'ahʉyʉ yupania patotiska nala peihcʉ'hi no mocmo ci cou.

⁵ 'emo macicihi nte iachia ngoevi na ngotohva.

⁶ i'ola yonto emio ci ceonʉ to kilisto ho tiou no po'pa'cohivi ci cou. nte tma'upu no afu'u ʉmnʉsi to moso mo'ma'cohio ci sensei.

⁷ teav'ala peknui 'e iachi, maezo 'ote meknuyu to hamo. 'emo cihi ci cou zou cuma na isi emʉ'a. 'aeno cuma na tasi tov'oha.

⁸ hoci nomio no ma'mamsoc'o 'e iachi ho miyapo no poc'ou, tena i'mi no poc'ou ho tov'ohʉ no mcoi; hoci nomio no mici mayo no 'aveoveoneni to seilei ho miyapo, tena i'mi to seilei ho tov'ohʉ no 'auesiesi nsou.

⁹ ko'koeno, holato peis'ʉ'ʉmnʉ, o'te suhcʉhcʉ na 'tohʉngʉ; hoci o'te ma'sasmʉzʉ, hotac'u esmi na hiesi tena ahtuo'te yaa tov'oha.

¹⁰ i'mi tan'e, 'upena ho homna, hoci ake'i meemeelʉ la hioa nate koa ʉmnʉ tamo botngonʉ, mi'usnu tamo cono singkoo ci cou nte h'unano maica na te hioa.

engaho ho tuayokeo

¹¹ temu aiti, 'emo maica hia tmameoisi ci tposʉ os'o iachia tposi ho faeni muu!

¹² i'ola kaebʉ paata'e ta yafanasi ci cou. 'ai'olaeno 'ahʉyʉ poa tiou no s'e'honga muu ci cou. homo maica na lahe hioa, 'alaeno ngoheʉngeʉ hoci nomzo to zuuzika to kilisto ho noa pohtutumza.

¹³ a'ʉmtʉsi, ac'ʉhʉ tomo tiou to s'e'honga ci cou maezo o'ala mee'ofeihni to hoolicu; ho ihe 'ahʉya poa tiou no s'e'honga muu, tehe akoevano etanveni ho yainca mimucu peteozu tala hia meesi.

¹⁴ inacu a'o, o'ate'o etanveni na mocmosi, te'oc'o etanveni 'o zuuzika to nooe'oca iesu kilisto. maica, 'e zuuzika eni, hoci e'usna a'o 'e hpʉhpʉngʉ isicu spica to zuuzika; hoci e'usna ta hpʉhpʉngʉ. na a'o isicu spica ta zuuzika.

¹⁵ tiou no s'e'honga ho o'te tiou no s'e'honga. uk'a ci tesi nama a'a'ausnu; nate sotva'esa teto i'vaho faeva ci cou.

¹⁶ namo afu'u mee'ofeihni tamo maica ci h'oceona ci cou, ho ina afu'u 'o'oko to hamo, te'sola acʉhʉ totiski mayo no soanono ho coveoza!

¹⁷ ahoi maitan'e ho ataveisi, teav'anas'a yontamo maica ci hioa ho e'ep'epva a'o, maica 'e feango'u mo mahafo to 'epi to iesu.

¹⁸ maanat'ohaesa, na mengumi to nooe'oca iesu kilisto tesi'sola pafeni muu! 'aamen.