ngalatea 5 - buacou seiso no faeva esvʉtʉ

ziu ta kilisto sinto

¹ te akoeva no poa meelʉ mayo no ziu na a'to, isicu psoevoyunga to kilisto a'to. ko'koeno, temu mit'oengonʉ, teav'a poa peotʉkceni no ngotohva no tolei na muu.

² na a'o - poolo te'o bumemeala eʉsvʉta muu, hocimu tiou no s'e'honga, 'o kilisto uk'a na ci ake'isi koa ʉmnʉ muu.

³ te'o ivaha engahva muu, nate afu'u tiou no s'e'honga ci cou te ahtao'te acʉcʉha pee'ofeihni 'o hoolicu.

⁴ namo mici biftongʉ no mee'ofeihni to hoolicu ho bikoyu no mici toseolʉ na natʉ'ca to hamo ci cou, tec'u hintʉha 'o natʉ'ca to kilisto, iachia antʉha na mengumi to hamo.

⁵ i'o ito atva'esa mingeovi, 'aeno ina teto hia meelʉ yupa toseolʉ na natʉ'ca to hamo; na eni zou tonʉ to seilei ieni no singkooto ho peihcʉ'hi.

⁶ maica, hocitocu no'ayumonʉ no nsou to kilisto iesu, hoci tiou ho o'te tiou no s'e'honga uk'a citesi nama natʉ'ca, inac'o isi boemi no himngonghi ho peispa'teni na singkoo 'aeno eni nate sotva'esi.

⁷ lamu asonghoi bumemealʉ! siya na mos'a vomtʉ muu, ho poa o'tena meo'uzo to so'emio?

⁸ 'emo maica ci maspepecvai o'ates'a ahtu i'mi tomo eyoho'ʉ muu ci hamo.

⁹ yainca to h'oe'ea: <'omoc'o okosi ci smoof'o tesi peelʉi acʉha poa smoesuhcu 'emo cono taucunu ci tungva.>

¹⁰ at'inghi te'oc'on'a a'cʉ'cʉna taa'uzva muu; maica mito noteuyunu to nsou to nooe'oca, os'o amsʉ'eona taa'uzva muu o'amocu te ahtu aʉlʉ ac'ʉhʉ no o'te totiski no la'u buh'a'ausnu. at'inghi 'ola 'afeo'fu'u muu, 'upena na siya. tena tiou no patvovei to hamo.

¹¹ maanat'ohaesa, hoci'u a'cʉ'cʉna psoyaska 'e s'e'honga, maincin'a tiou no pohtutumza? hocin'a maica na nte'o hioa, 'upena hoci'u psoyaska 'o zuuzika to kilisto o'amocu te mooyai nomʉtʉ no lahe hioa.

¹² os'o apuya kaebeni hoci iachi mifcuyu 'ola 'afeo'fu'u muu!

¹³ maanat'ohaesa, ho isi epeiya to hamo muu, tesi poa ziu ci cou na muu. at'inghi 'otes'a boemi ta ziu tan'e ho 'o'emamzʉ no 'aʉnpʉnpʉ, la boemi no himngonghi ho yupa aʉt'ʉt'ʉcʉ.

¹⁴ maica 'e acʉhʉ ta hoolicu mo ehteuyunu ta ci mashʉyʉ.

¹⁵ temula bumemealʉ, hocimu mais'a yuansou ho yupa boecʉ yupa bonʉ, 'atemu ahtuo'te yu'tupapayo'ʉ.

seilei ho i'o yu'ausna ta cou

¹⁶ 'o te'o ep'opnanfa zou: na lamu e'e ho peipeis'ausna la meo'uzo to lasi hia eyahahafo to seilei, 'ote ma'mamso ta iachi ma'konvosʉ ta yu'ausna.

¹⁷ mo'so maica 'e ma'konvosʉ ta yu'ausna mo yupa nahanga 'o seilei, yupania mi'usnu, o'te poa hioaneni 'o ntemu iachia 'ucia hioa.

¹⁸ at'inghi, hocisi eahahafa to seilei na muu, o'anate tiou seotpʉta to hoolicu muu.

¹⁹ 'e ma'konvosʉ ta yu'ausna ta cou la na'na hupopayoi tala hioa; isi humzi ta smoc'ou, peiscaca'i, 'aʉnpʉnpʉ,

²⁰ m'ohkuyu to uacoua, buoyoifo, mihango, youbobai, yʉchʉmʉ, ma'bubut'u, mayʉhcʉvho, boepaevai, bivahvoh'unu,

²¹ smo'eukonvosʉ, voemi, kokuici eabobonʉ, ho i'omo totiski cila hi'hioa. ne auyusi o'ucula engahva muu, te'o ivaha engahva maitan'e na muu: i'ola peis'usnu tamo maica ci cou. o'ate ahta peelʉi ta'okoa to hpʉhpʉngʉ to hamo.

²² inacu beachi to seilei, 'aeno: cocoya ci himngonghi, kokaekaebʉ, moususeomʉ, luaveica, moma'cinghi, mou'ʉmnʉ, meot'ʉt'ʉcʉ,

²³ ma'cocacni, aotʉkcʉ. 'emo maica ci hi'hioa uk'a cite ahtu meelʉ motano ci hoolicu.

²⁴ ina mo tma'usnu to kilisto iesu ci cou. ohecu acʉha spica to zuuzika na afu'u ma'konvosʉ ci yu'ausna.

²⁵ ho isicueno pafi nomo faeva ci nsou to seilei a'to, nteto poa eahahafneni 'e lato h'oyunsova.

²⁶ o'ateto bobitano, 'ote yupa asʉsʉ'no, yupa smo'eubut'u.