mokusi 9 - buacou seiso no faeva esvʉtʉ

¹ mo meela'pa 'omo toeimo to tensi, os'o teolʉi 'omo conci congeoha mo i'mi ne pepe ho supeohʉ ho su'ta ceoa. 'e congeoha eni mo tiou to 'oyomza maavo to uk'a puesona ci mʉ'eona.

² isi paavi 'o uk'a puesona ci mʉ'eona, cu i'mi to 'ayumonasi 'o feufeu ho meiyafo, mais'a mo i'mi no meoino pupuzu; 'o hie ho i'e engʉca isi tovoecʉvci ta mo i'mi ne mʉ'eona ci feufeu.

³ panto liu cimo i'mi to feufeu ho yuyafo, supeopeohʉ ta ceoa; mo tiou to tonʉ, totiski to eepa ta ceoa na tonʉhe.

⁴ mo tmalʉ to e'e ho o'aihe akuzkuzoa 'o kukuzo, evi, hocieno 'o mocmo ci cacʉfea ta ceoa, tec'o akuzkuzoa 'o o'aisi topci to toopca to hamo 'o sapcihe ci cou.

⁵ uk'a citesi tonʉ no opcoi tamo maica ci cou 'o liu, tec'o poa eimo no feohʉ hote poa tiou no 'atutumzo 'e cou. 'e 'atutumzo eni mo mais'a 'e cou ho isi yo'eoca to eepa.

⁶ tamo eimo no feohʉ, o'ate mcoi hoci m'eya mcoi, mici mcoi o'ate tuv'ohʉ.

⁷ 'o mi'a'ausna to liu mo mais'a 'ote ehtothomʉ ci 'uma. 'o isi topuneni to fnguusi mo mais'a 'o king ci tafange; 'o sapcihe mo mais'a sapci ta cou.

⁸ 'o f'ʉsʉhe mo mais'a f'ʉsʉ no mamespingi, 'o hisihe mo mais'a hisi no sisi.

⁹ 'o isi ngov'eni to t'oengahe, mo mais'a meemeno ci pihci, 'omo i'mi to yopnguhe ci fihngau mo mais'a yamumi cimo ponsohʉ ci kuyai no yu'susuyumo.

¹⁰ mo cmʉfeʉ 'o civci ho i'o cʉmʉ, mais'a 'o eepa, 'ai'eeno civci eni 'emo yaa tonʉ no poa eimo no feohʉ ho 'atutumzo 'e cou.

¹¹ panto cihi ci honte isi aʉt'ʉca; 'e honte eni 'ai'oeno tensi cimo aʉt'ʉcʉ to uk'a puesona ci mʉ'eona. hoci buahevulu zou 'apatung 'o ongkosi, buangilisia zou 'apolong.

¹² cu sucaefi 'e ahoisi ta meakvo'ʉ; totea eno, ten'a yusno meakvo'ʉ 'otena ivaho cmʉ'ho.

¹³ mo meela'pa 'o tonomʉ to tensi, os'o talʉi. panto fihngau cimo i'mi to sʉptʉ ci cuculili to king ci 'oyona sʉ'tʉ to tuhcu to hamo.

¹⁴ 'e fihngau eni mo mi'usnu tomo meela'pa ci tonomʉ ci tensi ho yainca:

¹⁵ isicu poesih'a 'omo sʉptʉ ci tensi. ohecu noana'va ae'ayoca, te yonta tonsoha tan'e, feohʉ tan'e, hie tan'e, te pohcʉcʉha 'omo ateua coni ta yatatiskova.

¹⁶ os'o tac'ʉhi na hia botngonʉ to heetai no 'uma mo yuso'oku.

¹⁷ to mavolosi, os'ocu teolʉi 'o 'uma ho i'o heetai. 'o pihci to heetai no 'uma mo mais'a puzu 'o hiasi fʉhngoya, 'o hiasi enghova mo mais'a enghova no hooseki. 'o hiasi hof'oya mo mais'a hof'oya no liukoo. 'o fnguu to 'uma mo mais'a fnguu no sisi, i'mito ngayohe mo smoyafo 'o puzu, feufeu, ho i'o liukoo.

¹⁸ 'omo ateua coni ta yatatiskova isi pohcʉcʉha tomo smoyafo to ngayo to 'uma ci puzu, feufeu, ho ito liukoo.

¹⁹ 'o tonʉ to 'uma mo yonto ngayo ho ito civcihe. 'o civcihe mo mais'a fkoi, panto fnguu to skoskopnasi; 'aiheeno yomza ta fnguu tan'e ho pohtutumza 'e cou.

²⁰ 'o ang'osʉsi to o'aisi pot'upa ta meakvo'ʉ tan'e ci cou, o'amoc'o h'unano ma'vovei, o'aihe ciha 'o ihe iachia teyai ci uacoua, mioc'o maica ho m'ohkuyu to 'akuma. ho ito isic'o teyai to o'amo teolʉ, o'amo tmalʉ, o'amo coeconʉ ci king, nging, too, fatu, ho evi.

²¹ ihe hioa na opcoi, aokvo'ʉ, smoc'ou, meo'eoi ci kuisi, maezo o'amo ma'vovei.