mokusi 8 - buacou seiso no faeva esvʉtʉ

topitu ci toopca

¹ ne isi paavi to okomoatʉ'nʉ 'o pitu ci toopca, asonʉ taico no cono huomza hie homo amiocni 'e engʉca.

² ataveisi, os'o aiti 'omo yac'ʉ to tuhcu to hamo cimo pitu ci tensi; ihe tiova 'omo pitu ci la'pa.

³ pantomo h'unasi cimo cihi ci tensi mo yuyafo, mʉpʉtʉ tomo king ci tvoisia namusngau, yac'ʉ to tuhcu to 'oyona sʉ'tʉ. isi tiova 'o man'i ci namusngau, ti'upa 'o 'inoli to masisinto ho sʉ'teni to tuhcu to suoca'ha ci king ci 'oyona sʉ'tʉ.

⁴ 'o feufeu to namusngau ho i'o 'inoli to masisinto mo i'mi to emucu to tensi ho mea'usnu to tuhcu to hamo.

⁵ acnguhu, isi yaa to tensi 'o tvoisia namusngau, teongcʉngci to puzu to 'oyona sʉ'tʉ 'o tvoisia namusngau, to'seni ta ceoa. micu yaa ak'engʉca, mʉmʉ, moi'hocʉ, ho motoevi.

la'pa

⁶ ataveisi, i'omo mʉpʉtʉ to pitu ci la'pa cimo pitu ci tensi te ae'ayocʉ meela'pa.

⁷ nemo meela'pa 'o tocni to tensi, mo yaa kaceo ho puzu, atvohʉ to hmuyu ho miyuhu ta ceoa, micu ateua coni ta ceoa. ateua coni to ma'e'evi, cu acʉhʉ hoapayo'ʉ; 'o afu'u maukukuzo mo maezocu acʉhʉ hoapayo'ʉ.

⁸ nemo meela'pa 'omo toueso to tensi, panto mais'a mo yunzou ho isi aiti ci hcuyu isi to'seni ne etʉpʉ. 'o etʉpʉ mo ateua coni 'omo tmuhmuyu,

⁹ mo ateua coni ci yuansou ta etʉpʉ 'omo mcoi, maezo ateua coni ci 'apangʉ 'omo aon'oi.

¹⁰ mo meela'pa 'omo toteu to tensi, panto conci meoino congeoha, mais'a yafeu ci veingi, i'mi ta pepe ho supeohʉ, su'to ateua coni ci mavava'hʉ ho ito isi afu'a i'toekui to chumu.

¹¹ ('e congeoha eni zou 'o ongkosi.) micu ateua coni 'omo mayʉmʉ ta chumu. maica homo mayʉmʉ 'o chumu, mo botngonʉ 'omo mcoi homo mimo ta chumu tan'e.

¹² mo meela'pa 'omo tospotʉ to tensi, i'o ateua coni to hie, ateua coni to feohʉ, ateua coni to congeoha isi acʉha ʉha. 'o hie, feohʉ, congeoha cu ateua coni 'omo afsi 'o tiskovasi; ateua coni 'omo o'te tiskova homo hie, maezo ateua coni ta feʉngna 'omo maezo uk'ana tiskova.

¹³ os'o yue'iya, yaeza talʉi 'omo meiepe ci eiski mo tmunoi mainca: